¹ Sa vo lia o ikodou na veiwekani, me kitou vakamasuti ikodou, ka vakasalataki ikodou ena vuku ni Turaga ko Jisu, mo dou uasivi cake vakalevu sara, me vaka dou a vakavulici mai vei kitou enai valavala sa kilikili kei ikodou mo dou ia tiko, mo dou vinaka vua na Kalou. ² Ni dou sa kila nai vakaro keitou a tukunia vei ikodou ena vuku ni Turaga ko JIsu ³ Ni sa loma ni Kalou koya, mo dou yalo savasava, mo dou kakua ni dauyalewa: ⁴ ia dou dui kila yadua mo dou maroroya na yagomudou me vakasavasavataki ka me dokai; ⁵ me kakua ni rawai koya na dodomo ca, me vakai ira na veimatanitu era sa yali ni kila na Kalou: ⁶ me kakua e dua me la'ki lawaki ca se vakacacania na kai nona ena ka koya, ni sa cudrutakia na ka kece lia koya na Turaga, me vaka voki lia ni keitou a vakasalataki ikodou kinia iliu ka dau tukunia. ⁷ Ni sa yali kacivi keda na Kalou me da dukadukali, me da yalo savasava lia. ⁸ Ia ko koya sa becia, sa yali ni becia na tamata, sa becia na Kalou, o koya ka solia mai vei ita na nona Yalo Tabu. ⁹ Ia ena vuku ni veilomani vakaveitacini, sa yali ni yaga meu vola vei ikodou; ni dou sa vakatavulici mai vua na Kalou mo dou veilomani tiko. ¹⁰ Ka sa dina ni dou sa caka voki lia vei ira kece na veiwekani mai Masitonia taucoko: ia keitou sa vakamasuti ikodou, na veiwekani, mo dou uasivi cake vakalevu sara; ¹¹ ka mo dou gumatua sara mo dou toka vakamalua, ka dau ia tiko lia na nomudou cakacaka, ka dou cakacaka ena ligamudou, me vaka keitou a vakasalatakia vei ikodou; ¹² mo dou ia tiko lia nai valavala e kilikili kivei ira e taudaku, ka mo dou kakua ni dravudravua ena dua na ka. ¹³ Ia kau sa vinakatia, oi ikodou na veiwekani, mo dou kakua ni guilecavia ena vukudra era sa moce tu, mo dou kakua kinia ni yasovakia, me vakataki ira na tani sa yali na nodrai nuinui. ¹⁴ Ia kevaka eda sa vakadinatia ni sa mate ko Jisu ka tucake voki mai, ena vaka voki lia kinia ko ira sa moce ni ra tu vata kei Jisu, ena yadi ira voki vua na Kalou. ¹⁵ Ni keitou sa tukunia lia oqo vei ikodou me vaka na vosa ni Turaga, ni da na yali ni liu vei ira era sa moce tu koi keda eda sa bula tiko me ycovia na nona qai voki mai na Turaga. ¹⁶ Ni na qai sobu mai lomalagi ko koya na Turaga ena kaila, kei na domo ni agilosi turaga, kei na davui ni Kalou: ena qai tucake mada iliu ko ira na mate era sa tu vata kei Karisito: ¹⁷ e muri ko ita, eda sa bula tiko lia, eda na yadi cake vata kei ira e na o, me da veitata kei na Turaga e na macawa: ia ena vaka kinia eda na qai tiko vata kaya na Turaga ka yali ni mudu. ¹⁸ O koya mo dou qai ia na veivakacegui vakataki ikodou ena vosa koya.