¹ O koya koya ni kitou a yali ni vosotia rawa, keirau sa vinakatia me keirau dai taudua tu lia mai Aceni, ² ia keirau sa talai Timoci na wekai keirau, kei nai talatala ni Kalou, kei na neirau tokani enai tukutuku vinaka kei Karisito me vakataudeitaki iko dou, ka vakaroti iko dou ena vuku ni nomu dou vakabauta: ³ me kakua e dua me vakayavalati ena vuku ni rarawa koya: ni dou sa kila sai koya eda sa lesi kinia. ⁴ Sa dina ni keitou a tiko kei iko dou, kitou a tukunia mada e liu vei iko dou ni da na vakararawataki: a sa yaco vakakinia, ia dou sa kila lia. ⁵ Ena vuku ni ka koya, niu a yali vosotia rawa, au a qai talatala yani meu kila na nomu dou vakabautia, de sa veretaki iko dou beka ko koya na dauvere, a sa yaco kinia me ka loa lia na neitou cakacaka. ⁶ Ia ni sa qai mai vei iko dou ko Timoci vei kitou, a sa yadia mai nai rogorogo vinaka ni nomu dou vakabauta kei na loloma, kei na nomu daunanumi kitou vinaka tiko lia, kei na nomu dou vinakatia vakalevu mo dou raici kitou, me vaka na neitou vinakatia voki lia me raici ikodou: ⁷ o koya koya keitou sa vakacegui kinia ena vukumudou, na veiwekani, ena vuku ni nomu dou vakabauta, ena neitou rarawa kece lia kei na vuturi. ⁸ ni keitou sa qai bula, kevaka dou tudei tiko vua na Turaga. ⁹ Ia ka vakaevei na levu ni vakavinavinaka me keitou ia voki vua na Kalou ena vukumu dou, e na vuku ni reki kece lia keitou sa reki kinia e na vukumudou e na mata ni noda Kalou: ¹⁰ ni keitou a masu vakalevu sara ena bogi kei na siga, me keitou raicia na matamudou, me keitou tinia vinaka voki lia na ka sa yali e na nomudou vakabauta ¹¹ Ia me tuberi keitou mada vei ikodou na Kalou na Tamada, kei na noda Turaga ko Jisu. ¹² Ia me vakalevutaki ikodou na Turaga mo dou uasivi cake e na loloma vakai ikodou, ka vei ira kece lia na tamata, me vaka na neitou vei ikodou: ¹³ me vakataudeitakia kinia ko koya na yalomudou me kakua ni ca ni sa savasava ena mata ni Kalou ko Tamada, ni na qai mai na noda Turaga ko Jisu Karisito kei ira vata kaya na nona yalo savasava kece lia.