¹ Ni dou sa kila na veiwekani, na neitou laki tiko vi ikodou, ni sa yali ni ka loa lia: ² ia keitou a vakararawataki mada e liu, ka vakacacani sara mai FIlipai, me vaka dou sa kila, keitou sa qai doudou lia ena vuku ni neitou Kalou me tukunia sara vi iko dou nai tukutuku vinaka ni Kalou, a sa ka levu na veivorati. ³ Ni sa yali sara ni ia na neitou ivakaro e na veivakacalai, se na yalo tawa savasava se na veivakaisini: ⁴ ia ni sa vinakati kitou na Kalou me kitou lesi me vunautakia nai tukutuku vinaka, kitou sa vosa vakakinia, sa yali lia ni kitou vakaloma vinakataki ira na tamata, ia me vakalomavinakataki lia na Kalou, o koya sa lewa na yalo i keitou ⁵ Ni dou sa kila kitou sa yali ni vosa vakaveicavilaki, se ia na kocokoco enai lawaki rairai vinaka; ka sai vakadinadina na Kalou: ⁶ kitou yali voki lia ni qara me ra dokai keitou ko ira na tamata, se koikodou, se ko ira na tamata tani, ka dina lia ni keitou sa veivakacolati beka ena vuku ni keitou sai apositolo i Karisito. ⁷ Ia kitou a yalovinaka ena kemudou maliwa me vaka na dau meimei ni sa susugi ira na luvena; ⁸ ia sa vaka kinia, ni kitou sa yalo loloma sara vei ikodou, kitou sa vinakatia me solia vei ikodou na tukutuku - vinaka ni Kalou, ia ka yali ni o koya loa lia, a nitou bula voki lia, ni kitou sa lomani iko dou vakalevu. ⁹ Ni dou sa nanumia, na veiwekani, na neitou daucakacaka kei na nitou oca ni kitou sa dau cakacaka tiko ena bogi kei na siga me kitou kakua sara kinia ni vakabibitaki ikodou ni kitou sa vunautakia vi ikodou nai tukutuku vinaka ni Kalou. ¹⁰ Dou a raicia dina kei na Kalou voki lia ni savasava ka dodonu ka yali ni cala na neitou i valavala ena kemudou maliwa, oi kemudou sa vakabautia. ¹¹ NI dou sa kila keitou sa vakasalatakia vei ikodou ka vakadretia vei ikodou yadua, me vaka na tamana vei ira na luvena, ¹² mo dou ia nai valavala sa kilikili kei ira sa nona na Kalou, o koya sa kacivi ikodou kinia na nona matanitu kina vanua vakaiukuuku. ¹³ Ena vuku ni ka koya, kitou sa vakavinavinaka jiko liavua na KAlou, ni gauna dou a vakabautia kinia na vosa ni Kalou dou a rogocia mai vi kitou dou sa yali ni vakabautia me vaka e vosa ni tamata, me vaka lia na kena dina, na vosa ni Kalou, oqori na cakacaka yaco voki lia vi ikodou sa vakabautia. ¹⁴ Ni dou a vakadamurimuri ira na vei soqosoqo lewe ni lotu ni Kalou mai Jiutia era sa tu vata kei Karisito Jisu o ikodou na veiwekani: ni dou a vosotia na veika ca mai vei ira na wekamudou, me vaka era sa vosotia mai vei ira na ka Jiutia, ¹⁵ o ira sa vakamatea na Turaga ko Jisu, kei ira voki lia na parofita a ra sa vakacacani kitou, e ra sa yali vinaka vua na Kalou, a ra sa veicati voki lia kei ira na tamata, ¹⁶ a ra sa tarovi kitou, ni keitou sa vosa vei ira era sa yali ni lotu me ra bula kinia, me ra sa vakasinatia tiko lia na nodrai valavala ca: ia sa yaco vei ira na cudruvi ni ra sa ca sara. ¹⁷ Ia ko kitou ni kitou sa yadi tani mai vei iko dou na veiwekani ena gauna lekaleka lia- sa vakayago lia ka yali ni vakayalo keitou sa gumatua sara kinia ka vinakatia sara vakalevu me da veiraici ena matana votu. ¹⁸ o koya koya keitou a via qai yani kinia vi iko dou, o au ko Paula, kau a sasaga vakavica ia ka sa vakataotakia na nitou sala o Setani. ¹⁹ Ia ka cava na nitou nuinui se marau, se nitou sala ni reki? sa yali lia ni ko ikodou ena mata ni noda Turaga ko Jisu ena nona lesu voki mai? ²⁰ Ni sai iko dou na vuni nitou lagilagi kei na vuni nitou reki.