¹ Ia sa yali ni yaga meu volavola vi ikodou, na veiwekani me'u tukunia na veigauna kei na veiyabaki. ² Ni dou sa kila dina sara vakataki ikodou na na yaco mai na siga ni Turaga, me vaka na daubutako ena bogi. ³ Ni ra kaya tiko, sa mai vakacegu ka tiko vinaka, ena qai yaco vakidacala vei ira na rusa, me vaka na yaluma vuana yalewa sa bukete; a ra na yali ni dro tani. ⁴ Io ko ikodou na veiwekani, dou sa yali ni tiko ena butobuto me yacovi ikodou kinia na siga koya me vaka na daubutako. ⁵ Oi kemudou kece lia na gone ni rarama, kei na gone ni siga: eda sa yali ni gone ni bogi, se gone ni butobuto, ⁶ O koya gona me da qai kakua ni moce, me vakataki ira na tani; me da vakatawa lia ka yalomatua. ⁷ Ia ko ira era daumoce era sa daumce ena bogi, kei ira era daumateni era sa mateni ena bogi. ⁸ Ia koi keda, eda sa gone ni siga, me da yalomatua, me da vaucia na vakabauta kei na loloma mei sasabai ni lomasereda: kei na vakanuinuitakia na bula, mei vakaruru ni uluda. ⁹ Ni sa yali ni lesi keda na Kalou me da rusa meda rawa lia na bula ena vuku ni noda Turaga ko Jisu Karisito, ¹⁰ ni sa mate o koya ena vukuda, me da bula vata kaya, se da yadra se da moce. ¹¹ O koya gona mo dou qai ia na veivakacegui vakai iko dou, ka veivakatataki cake vakai iko dou me vaka dou sa caka tiko. ¹² Ia keitou sa vakamasuti ikodou, na veiwekani, mo dou kilai ira era sa daucakacaka vei ikodou, ka lewai ikodou ena Turaga ka vakavulici ikodou. ¹³ Ia mo dou vakarokorokotaki ira, ka lomani ira vakalevu sara ena vuku ni nodra cakacaka. Ka mo dou veivinakati vakai ikodou. ¹⁴ Ia keitou sa vakasala vei ikodou na veiwekani: modou vunauci ira e ra sa talaidredre, vakacegui ira era sa yalo lailai, vukei ira era sa malumalumu, dau vosoti ira kece lia na tamata. ¹⁵ Raicia me kakua ni dua me veisausaumitakia na ca vua e dua; ko mo dou caka tiko lia na ka e vinaka vi ikodou yadua, vei ira voki lia na tamata kece lia. ¹⁶ Dou reki tiko lia. ¹⁷ Dou masu tiko lia kakua ni mudu. ¹⁸ Dou ia na vakavinavinaka ena vuku ni ka kece lia kakua ni mudu. ¹⁹ Dou kakua ni tarovia na cakacaka ni Yalo Tabu. ²⁰ Dou kakua ni becia na vosa ni parofisai. ²¹ Vakatovolea na ka kece lia, tauria matua na ka e vinaka. ²² Qarauni ikodou mai nai valavala kece lia sa ca. ²³ Ia me vakasavasavataki ikodou sara na Kalou ni veivakacegui, ka me sa maroroi taucoko, me kakua sara ni cala, na yalomudou kei na lomamudou kei na yagomudou, ka yacovia na siga ena qai mai kinia na noda Turaga ko Jisu Karisito. ²⁴ Sa yalodina ko koya sa kacivi ikodou, ka na caka vakakoya ko koya. ²⁵ Oi ikodou na veiwekani, dou masulaki keitou. ²⁶ Sa loloma yani vei ira kece lia na veiwekani ka dou veireguci ena yalo savasava. ²⁷ Au sa varoti ikodou ena yaca ni Turaga, me wili nai vola koya vei ira kece lia na veiwekani yalo savasava. ²⁸ Me nomudou na loloma ni noda Turaga ko Jisu Karisito. Emeni.