¹ موسیٰ کی برکت یہ وہ برکت ہے جس سے مرد ِخُدا موسیٰ نے اپنی وفات سے پیشتر بنی اِسرائیل کو دُعا دی۔ ² اُس نے کہا۔ خُداوند سینا سے آیا ۔ اور شعیر سے اپنی قوم پر طلوع ہُؤا۔ وہ کوہِ فاران سے جلوہ گر ہُؤا ۔ اور مریبہ قادس میں آیا ۔ اُس کے دہنے ہاتھ سے شعلہ زن آتش پھو ٹ نکلی ۔ ³ اُس کے قہر نے اقوام کو تباہ کر دیا ۔ اُس کے تمام مقدسین تیرے ہاتھ میں تھے ۔ اور وہ تیر ے قدموں میں بیٹھے ۔ اُنہوں نے اُس کی باتوں سے روشنی پائی ۔ ⁴ شریعت کا حکم جو موسیٰ نے فرمایا ۔ یعقُوب کی جماعت اُس کی ملکیت ہے ۔ ⁵ اور وہ یسورون میں بادشاہ ہُؤا۔ جب قوم کے سردار فراہم ہُوئے ۔ بنی اِسرائیل کے قبائل اِکٹھے ہُوئے ۔ ⁶ روبِن کے حق میں اُس نے کہا روبن جیِتا رہے اور نہ مرے۔ اگرچہ اُس کے مرد تھوڑے ہوں۔ ⁷ اور یہوداہ کے حق میں اُس نے یوُں کہا اَے خُداوند !یہوُداہ کی سُن اور اُسے اُس کی قوم کے پاس پہنچا ۔ تیرا ہاتھ اُس کے لئے جنگ کرے۔ اور اُس کے دُشمنو ں کے خلاف تُو اُس کی مدد کر۔ ⁸ اور لاوی کے حق میں اُس نے کہا لاوی کے پاس تیر اتمہیم ہو۔ تیرے اُس مرد خُدا کے پاس تیر اُوریم ہو۔ جِسے تُو نے مسہ پر آزمالیا ۔ اور جس کے ساتھ مریبہ کے پانی پر تُو نے جھگڑا کیِا۔ ⁹ جس نے اپنے ماں باپ کے حق میں کہا ۔ کہ اُنہیں میَں دیکھتا نہیں۔ جس نے اپنے بھائیوں کو اپنا نہیں مانا ۔ جس نے اپنے بیٹوں کو نہیں پہچانا ۔ مگر تیری باتوں کو یاد رکھا۔ اور تیرے عہد کی اِحتیاط کی۔ ¹⁰ وہ یعقُوب کو تیرے احکام ۔ اور اِسرائیل کو تیری شریعت سِکھاتے ہیں۔ وہ تیر ے آگے بخُور ۔ اور سوختنی قُربانیاں مَذبح پر رکھتے ہیں۔ ¹¹ اَے خُداوند ! اُس کی ملکیت کو برکت دے ۔ اور اُس کے ہاتھوں کے کام قبُول فرما۔ اور اُس کے دُشمنوں کی رانوں کو ناقِص کر، یعنی اُس کے مخالفوں کی ۔ تاکہ وہ قائم نہ رہیں۔ ¹² اور بنیمین کے حق میں اُس نے کہا خُداوند کا محبُوب بنیمین ہے ۔ سلامتی سے اُس کے ہاں وہ رہے گا ۔ وہ دِن بھر اُس کی حفاظت کرتا ہے ۔ وہ اُس کے کندھوں کے بیچ سکُونت کرتا ہے ۔ ¹³ اور یُوسف کے حق میں اُس نے کہا اُس کی سرزمین خُداوند کی طرف سے مبُارک ہو۔ اور آسمان کے عُمدہ تحائف ۔ وہ گہرا پانی جو نیچے ہے۔ ¹⁴ سُورج کے اُگائے ہُوئے عُمدہ تحائف ۔ چاندی کے پکائے ہُوئے عُمدہ تحائف ۔ ¹⁵ قدیم پہاڑوں کی عمدگی ۔ ابدی ٹیلوں کے عُمدہ تحائف ¹⁶ زمین اور اُس کی معموری کے عُمدہ تحائف ۔ اور اُس کی خُوشنُودی جو جھاڑی میں رہتا ہے۔ یُوسف کے سر پر نازل ہوں۔ بلکہ اُس کے سر کی چاندی جو اپنے بھائیوں میں رئیس ہے۔ ¹⁷ اُس کی شوکت بَیل کے پہلوٹھے کی سی ہے۔ اور اُس کے سینگ جنگلی سانڈ کے سینگ ہیں۔ اُن ہی سے وہ سب قوموں کو ۔ بلکہ زمین کی انتہا تک سب کو دھکیلے گا ۔ اور افرائیم کے لاکھوں لاکھ ۔ اور منسی کے ہزاروں ہزار ہیں۔ ¹⁸ اور زبُولون کے حق میں اُس نے کہا اَے زبُولون تُو اپنے باہر جانے میں ۔ اور اے اشکار تُو اپنے خیموں میں خُوش رہ ۔ ¹⁹ وہ قوموں کو اُن پہاڑوں پر بُلاتے ہیں۔ جہاں وہ صداقت کی قُربانیاں گزرانتے ہیں۔ کیونکہ وہ سمندروں کی فراوانی چُوستے ۔ اور ساحل کے چھپے ہُوئے خزانوں کو جمع کرتے ہیں۔ ²⁰ اور جد کے حق میں اُس نے کہا مبُارک ہےوہ جو جد کو بڑھائے ۔ اور شیر کی طرح گھات میں بیٹھا ۔ اور بازو بلکہ سر بھی پھاڑ ڈالتا ہے۔ ²¹ اُس نے پہلا بخرہ اپنے لئے چُن لیِا ۔ کیونکہ شاہانہ حصہ وہاں الگ کیِا گیا تھا۔ وہ قوموں کے سرداروں کے ساتھ آیا۔ اُس نے خُداوند کی صداقت ۔ اور اِسرائیل کے ساتھ اُس کے احکام کو پُورا کیا۔ ²² اور دان کے حق میں اُ س نے کہا دان شیر کا وہ بچہ ہے جو بسن سے کُود کر آتا ہے۔ ²³ اور نفتالی کے حق میں اُس نے کہا اَے نفتالی تُو جو خُوشنُودی سے سیر۔ اور خُداوند کی برکت سے معمور ہے۔ وہ مغرب اور جنُوب کا مالک ہے۔ ²⁴ اور آشر کے حق میں اُس نے کہا آشر بیٹوں کے درمیان سب سے مبُارک ہو۔ وہ اپنے بھائیوں میں زیادہ مقبُول ہو۔ وہ اپنے پاؤں تیل میں ڈبوئے ۔ ²⁵ تیرے بینڈے لوہے اور پیتل کے ہوں۔ اور تیرے ایام کے انجام تک تیری راحت قائم ہو۔ ²⁶ یسورون کے خُدا کی مانند کوئی نہیں جو فضا بلکہ بادلوں پر حشمت سے سَوار ہو کر تیری مدد کو آئے ²⁷ ازلی خُدا تیری جائے پناہ ہے اور ابدی بازُو نیچے ہیں۔ اُس نے دُشمن کو تیرے سامنے سے نکال دِیا۔ اور کہا کہ ہلاک کر۔ ²⁸ لہٰذا اِسرائیل سلامتی سے ۔ اور یعقُوب کا چشمہ اکیلا۔ گیہوں اور مَے کی سرزمین میں بسے گا ۔ اور اُس کے لئے فلک سے شبنم پڑے گی۔