¹ موسیٰ کی وفات تب موسیٰ موآب کے میدان سے کوہِ نبُو کی طرف پسگہ کی چوٹی پر جو یریحو کے مقُابل ہے چڑھا ۔ اور خُداوند نے اُسے سارا ملکِ جلعاد سے لے کر دان تک دِکھایا۔ ² کل نفتالی اور افرائیم اور مَنسی کا ملک اور یہوداہ کا سارا ملک مغڑب سمنُدر تک ۔ ³ اور جنُوب اور یردن کی وادی یعنی کھجوروں کے شہر یریحو کا میدان ضغر تک۔ ⁴ اور خُداوند نے اُس سے کہا ۔ یہ وہ ملک ہے جس کی بابت میَں نے ابراہام اور اضحاق اور یعقُوب سے قسم کھا کر کہا کہ اُن کی نسل کو دُوں گا ۔ تُو نے اپنی آنکھوں سے اُسے دیکھ لیِا ہے ۔لیکن تُو وہاں پار نہ جائے گا۔ ⁵ چُنانچہ موسیٰ خُداوند کا خادم وہاں پر خُداوند کے کہنے کے موافق موآب کے ملک میں فوت ہُؤا۔ ⁶ اور موآب کی وادی میں بیت فغور کے مقُابل دفنایا گیا ۔ مگر اُس کی قبر کو آج کے دِن تک کوئی نہیں جانتا ۔ ⁷ اور موسیٰ اپنی موت کے وقت ایک سو بیس برس کی عمر کا تھا ۔ اُس کی آنکھیں نہ دھندلائیں اور نہ اُس کی جسمانی قُوت کم ہُوئی۔ ⁸ تب بنی اِسرائیل نے موسیٰ کے لئے موآب کے میدان میں تیس دِن تک ماتم کیِا ۔ جب تک کہ موسیٰ پر ماتم کرنے کے دِن پُورے نہ ہوئے۔ ⁹ اور یشوُع بِن نُون حکمت سے معمور تھا ۔ کیونکہ موسیٰ نے اپنے ہاتھ اُس پر رکھے تھے ۔ اور بنی اِسرائیل نے اُس کی تابعداری کی اور جیسا خُداوند نے موسیٰ کو دِیا عمل میں لائے ۔ ¹⁰ اور بعد اِزاں اِسرائیل میں کوئی نبی موسیٰ کی مانند نہ اُٹھا ۔ جس کےساتھ خُداوند نے رُو برُو بات کی ہو۔ ¹¹ اِن سب نشانات اور عجائبات میں جو خُداوندنے دئیے کہ اُنہیں مصر کی سر زمین میں فرعون اور اُس کے تمام وُزرا اور اُس کے سارے ملک کے لئے کرے۔ ¹² اور تمام زورآور ہاتھ اور عظیم معجزوں میں جو موسیٰ نے سارے بنی اِسرائیل کی آنکھوں کے سامنے دِکھائے۔