1
هو موقع چن نفر، عیسی رِه خبر بَأوردد کی پیلاتُس ایتَه جرگه جی جلیلیانَ کی بوشو بود اورشلیم، و خدا خانه میَأن قربانی تقدیم کودَأن دوبودَه، بوکوشته دَأره.
2
عیسی اوشَأنَ جواب بدَه:«خیال کونید چون اَ جلیلیانِ سر اَجور بلا بأمو، جی مابقی جلیلیان گوناهکارتر بُد؟
3
شومرَه گویم کی اَطو نیه، اگر توبه نوکونید شومَأنم همه تَه هلاکَ بید.
4
گومان کونید کی اون هیژده نفری کی سَلوامِ بُرج، اوشَأنِ سر فؤوَست و بِمِردد، اورشلیمِ دیگر مردمانِ جَه گوناهکارتر بُد؟
5
اَنَ بدَأنید کی اَجور نیِه، و اگر توبه نوکونید، همه تَه یِ شومَأن اوشَأنِ مَأنَستَأن هلاکَ بید.»
6
بازن عیسی اَ میثالَ بَأورد:«اینفر خو تاکستانِ دورون ایتَه انجیر دار بکاشت، وختی بأمو کی اَنجیر بیچینه، چیزی دار رو پیدا نوکود.
7
پس خو باغبانَ بوگوفت؛ سه ساله اَیم کی اَ دارِ میوه یَ بیچینم، ولی چیزی پیدا نوکونم، هَچین اَمی جایَ بیگیفته دَأره، اونَ وَأوین.
8
اما باغبان جواب بدَه؛ ارباب، وَأهَأل ایتِه سالم بِمَأنه، اونِ دؤرَ کِنِم و کود زِنِم،
9
اگر سال دیگه میوه بَأورد کی هیچ، اگر نأورد، اونموقع اونَ وَأوین.»
10
و سبّت روزِ رِه عیسی ایتَه جی کنیسه یانِ دورون تعلیم دَأئِه.
11
او جمعِ میَأن ایتَه زنای ایسَه بو کی هیژده سال بو اونِ کمر غوز بوکوده بو و فَچَمَستِه بو و هیچ جور نِتَأنِسته راس بِئسِه، و ایتَه روحِ خبیث اونِ اَمرَه اَ کارَه بوکوده بو.
12
وختی عیسی اونَ بیدِه، اونَ خو ورجَه دِخَأد و بوگوفت:«ای زن، تو اَ مرضِ جَه شفا پیدا کودی.»
13
و خو دسَأنَ اون زناکِ رو بِنَه، و او زنای هو لحظه راس بِئسَه و خدایَ شُکر بوکود.
14
اما کنیسه رئیس جی اَن کی عیسی شنبه روزِ رِه شفا بدَه بو توندَ بوست و مردمَ بوگوفت:«در هفته شیش روز وَأستی کار کودَأن، ایتَه جی او روزَأن بَأئید و شفا بیگیرید، نه شنبه رِه کی روزِ سبّتِ.»
15
عیسی اونَ جواب بدَه:«ای ریاکار، آیا هیچ کودام جی شومَأن، شنبه روزِ رِه خو خر گاوِ لافندَه طویله جَه وَأنکونه تا آب دَئَنِ رِه بوبوره بیرون؟
16
پس آیا نَوَأستی اَ زنَایَ کی ابراهیمِ دختره و شیطان اونَ هیژده سال اسیر بوکوده بویَ سبّت روزِ رِه آزادَه کودَأن؟»
17
وختی اَنَ بوگوفت اونِ مخالفان همه تَه شرمنده بوبَستد، اما همۀ جمعیت اونِ معجزه یان و عجیبِ کارانِ وَسی شادمان بود.
18
بازن عیسی بوگوفت:«خدا ملکوت چیه مَأنه و اونَ شمرِه چیه میثال بِزِنم؟
19
ایتَه خردل دانه یَ مَأنِه کی اینفر بیگیفت خو باغِ دورون بِکاشت، بازن دانه رُشد بوکود و ایتَه پیلِه دار بوبوست، جوری کی آسمانِ پرنده یان بأمود و اونِ شاخه یانِ میَأن لانه چَأکودد.»
20
باز بوگوفت:«خدا ملکوتِ رِه چی میثالی بَأورم؟
21
خمیر مایه ای مَأنه کی زنی اوسَد و سه تَه کیسه آردِ اَمرَه مخلوط بوکود تا همۀ خمیر ور بأمو.»
22
و عیسی شهرانُ دهاتان گردسته و مردمَ تعلیم دَئِه و هوطو شوئِه اورشلیمِ طرف.
23
ایبار اینفر اونَ بوگوفت:«ای آقا، آیا کسایی کی نجات پیدا کوند کمِد؟» عیسی جواب بدَه:«
24
سخت تقلا بوکونید تا تنگِ درَ بودورون بیشید، چون شمرَه گوفتَأن دِرِم، خیلیَأن خَأیِد بوشود بودورون، ولی نِتَأنِد.
25
وختی صابخانه ویریزه و درَ دَوَده، شومَأن بیرون ایسید و در زنید و گوئید؛ ای ارباب، درَ وَأکون، اما اون جواب دِهِه؛ شومرَه نشناسم، نَأنم جی کایَه بأموئید.
26
شومَأن گوئیدی؛ اَمَأن تی مرَه بوخوردیم و وَأخوردیم، و تو اَمی کوچه یانِ دورون تعلیم دَأیی، چوطو اَمرَه نشناسی؟
27
اما جواب ایشتَأوید؛ شمرَه نشناسم، نَأنم جی کایَه بأموئید، جی اَیَ بیشید ای بدکاران.
28
اونموقع وختی فَأندرید بیدینید ابراهیم و اسحاق و یعقوب و مابقی پیغمبرَأن خدا ملکوتِ دورون ایسَد، اما شومَأن محروم بوبستید، جی غورصه، زار زنید و شیمی دندانانَ به هم ساوید.
29
مردم جی مشرقُ مغرب و شمالُ جنوب اَید و خدا ملکوتِ سُفره دؤر نیشیند.
30
بله، ایسَد آخریانی کی اول بُد، و اولیانی کی آخر بد.»
31
هو روز دورون چن نفر جی فریسیان بأمود و عیسیَ بوگوفتد: «جی اَیَه بوشو ایتِه جایِ دیگر، چون هیرودیس خَأیِه ترَه بوکوشه»
32
اون جواب بدَه:«بیشید و اون روباهَ بوگوئید؛ ایمروز و فردا دیوَأنَ بیرونَ کونم و مردمَ شفا دِهِم و سومین روزِ رِه می کارَه تومامَ کونم.
33
بله، ایمروز و فردا و پسفردا وَأستی می کارَه ایدامه بدم، چون ایمکان نَئره کی پیغمبرَ اورشلیمِ بیرونِ جَه بوکوشد.
34
ای اورشلیم، ای اورشلیم، ای پیغمبرَأنِ قاتل، ای کی رسولانی کی تی ورجَه اوسه بوبَستدَه سنگسار بوکودی، چن بار بخَأستم اون کُلوش کنی مَأنَستَأن، کی خو کیجیانَ خو بالِ و پرِ میَأن گیره، تی زَأکانَ تی دؤر جمعَ کونم، ولی نخَأستی.
35
هَسَه شیمی معبد، هَطو ویران شمرَه واگذارَ بِه، و شمرَه گویم کی دِ مرَه نیدینید، تا روزی کی بوگوئید؛ مبارک بیبه اونِ قدمی کی به نام خداوند اَیِه»