¹ مسیح اَمرَه آزادَ کود تا آزادْ بیبیم. پس اُستوار بِئسید و دوباره خودتانَ شریعتِ قید و بندِ گرفتار نوکونید. ² اَنَ کی گوفتَأن درمَ شیمی گوشِ آویزه بوکونید، منْ، پولسْ، شمرَه گویم کی اگر ختنه بیبید مسیحْ دِ شمرَه هیچ فایده ایی نَئره. ³ بازم تکرار کونم، هر کی بخَأیه ختنه بوستَأنِ مرَه خدایَ خوشحالَ کونه، مجبوره و وَأستی باقی شریعتم اجرا بوکونه، وگرنه هلاکتَه محکوم به. ⁴ شومَأنی کی تلاش کونید شریعتِ اَمرَه خدا مقبول بیبید، مسیح دِ شمرَه فایده ایی نَئره، و خدا فیضِ جَه دورَه بوسته اید. ⁵ چون اَمَأن بواسطۀ روح القدس، و اون ایمانی وَسی کی دَأریم خدا حضورِ جَه بی گوناه به حساب اَئیم. ⁶ و اَمرِه کی مسیح جَه حیاتِ جاودانی یَ دریافت بوکوده ایم، ختنه بوستَأن یا نوبوستَأن اَهمیتی نَئره، بلکی اَمرِه مهمْ، فقط ایمانی ایسه کی اونِ جَه مُحبت بیرون اَیه. ⁷ خُب دُووَستَأن دیبید، کی شیمی سدِ راه بوبُست تا اَطو راهِ راستِ جَه مُنحرفَ بید؟ ⁸ مطمئنم اَ مورد خدا طرفِ جَه نییه، چون اون خودش شمرَه دخَأده تا بواسطۀ عیسی آزاد بیبید. ⁹ «ایبچه خمیرمایه کلِ خمیرَ مُخَمِر کونه» ¹⁰ مطمئنم خداوند در اَن خصوص شمرَه می اَمرَه هم عقیده کونه، ولی هر کی شیمی فکرَ خرابَ کونه، هَسَه هر کی خَأیه بیبه خدا اونِ جزایَ دِهه. ¹¹ ای برأرأن، اگر من هنوز ختنه بوستَأنْ و انجام اعمالِ مذهبی یَ موعظه کودِم، دِ چره اَقدر آزار دِئِم؟ چون اونموقع صلیبِ لغزش، و صلیبِ نارضایتی جی میَأن شوئه. ¹² ای کاش اوشَأنی کی شیمی فکرَ مضطرب کوند و هی گویده کی وَأستی ختنه بیبید، کارَ تومامَ کوده بِد، و یهو خودشانَ جی مردی تَأوَأدَه ئِد! ¹³ ای برأرأن، خدا شمرَه آزادی رِه دَخَأده، ولی اَ آزادی یَ فرصتی نوکونید تا شیمی نفسِ خواسته یانَ انجام بدید، بلکی محبتِ اَمرَه همدیگرَ خدمت بوکونید. ¹⁴ چره کی همۀ شریعتْ ایتَه حکمِ دورون خلاصه بِه، یعنی :«تی همساده یَ، خودتِ مَأنستَأن دوست بدَأر» ¹⁵ ولی اگر همش همدیگرِ جَه ایراد بیگیرید و همدیگرَ زَخم بزنید، مواظب بیبید کی همدیگرِ دسِ اَمرَه هلاکَ نیبید. ¹⁶ هَنه وَسی شمره گویم کی به روح القدس رفتار بوکونید، اون شمرَه یاد دِهه چی بوکونید و چی نوکونید، و اَطو دِ نفْسِ تمایلاتَ بجا نَأورید. ¹⁷ چون نفْسِ تمایلاتْ بر خلافِ روحه، و روحِ تمایلات بر خلاف نَفسْ، و اَ دو تَه بر ضدِ همدیگرد، و طوریه کی شومَأن اونچی کی شیمی دیل خَأیه یَ نتَأنید انجام بدید. ¹⁸ ولی اگر روحِ جَه هدایت بیبید دِ در قیدِ شریعت نیئید. ¹⁹ نفْسِ اعمال مشخصه: بی عفتی، ناپاکی، هرزگی، ²⁰ بُت پرستی، جادوگری، دوشمنی، دو به هم زنی، کینه، عصبانیت، خودخواهی، نِفاق، دسته بندی، ²¹ حسادت، مستی، عیاشی، و اَشَأنِ مَأنستَأن، هوطو کی پیشترانم شمرَه هشدار بدَه دَأرم، بازم گویم، کسانی کی اَ کارانَ کوند، خدا ملکوتِ وارث نوبود. ²² ولی ثمراتی کی روح به بار اَوره: محبت، شادی، آرامش، صبر، مهربانی، خیرخواهی، وفاداری، ²³ فروتنی و پرهیزکاریه، هیچ شریعتی اَشَأنِ مرَه مخالف نییه، ²⁴ و اوشَأنی کی مسیحِه شیند، خوشَأنِ نفْسَ، همۀ اونِ هوسایِ ناپاکِ مرَه به صلیب فَأکشه دَأرد. ²⁵ اگر خدا روحِ اَمرَه زندگی کونیم، اَمی زندگی هدایت گرم وَأستی اون بیبه و به روح رفتار بوکونیم. ²⁶ خودخواه نیبیم و همدیگرَ عصبانی نوکونیم، و حسودی کودَأنِ جَه دس بکشیم.