¹ ای برأرأن، اگر کسی گوناهی یَ گرفتارَ بِه، شومَأن کی روحانی ترید روحِ فروتنی اَمرَه اونَ راستِ راه طرف وَأگردَأنید، و به یاد بدَأرید کی شومَأنم ممکنه وسوسه یَ دوچارَ بید و خطا بوکونید. ² مشکلات و مسائلِ میَأن همدیگرِ بارایِ سنگینَ حمل بوکونید و اَطو مسیحِ شریعتَ بجا بأورید. ³ اگر کسی چنان خورَه پیله کس دَأنه کی حاضر نیه اَ جور چیزانَ قبول بوکونه، در حالی کی اَصلاً کسی نییه، اون خودشَ گول زَئَن دَأره و نشَه اَجور شخصَ ایماندارِ واقعی دَأنستن. ⁴ هر کس وَأستی خو وظیفه یَ انجام بده و بازن خورَه آزمایش بوکونه، اگر خو کارِ جَه رضایت دَأشته تَأنه خورَه افتخار بوکونه و نیازی نییه خورَه دیگرانِ اَمرَه مقایسه بوکونه. ⁵ چون هر کودامِ اَمَأن، خودمانِ اعمال و رفتارِ مسئولیم. ⁶ اوشَأنی کی خدا کلامِ جَه تعلیم دیند، وظیفه دَأرد خوشَأنِ معلمَ همۀ چیزایِ خوبِ میَأن شریک بوکوند. ⁷ اشتباه نوکونید، خدایَ نشَه گول زَئَن، چون اونچی کی آدمی بکاره، هونَ دِرو کونه. ⁸ مثلاً اگر کسی خو نفْسِ رِه بکاره، نفسِ جَه، فساد و نابودی یَ دِرو کونه، و هر کی روح رِه بکاره، روحِ جَه حیاتِ اَبدی دِرو کونه. ⁹ ای برأرأن، کارِ نیکو اَنجام دَئنِ جَه خستَه نیبیم، چون اگر کارِ جَه دس نکشیم، وختِ مناسبِ رِه محصولَ دِرو کونیم. ¹⁰ پس تا جایی کی تَأنیم و فرصت دَأریم همۀ مردمَ خوبی بوکونیم، مخصوصاً مسیحیانِ مؤمنَ. ¹¹ بیدینید حروفِ دوروشتِ اَمرَه خودمِ دسِ اَمرَه شمرَه نیویشتَأن درم! ¹² اوشَأنی کی خَأید خوشأنَ به ظاهر خوب نشان بدد و اوشَأنِ شهرتَ لطمه ایی وارد نیبه، شمرَه وادار کوند ختنه بیبید، فقط اَنِ وَسی کی نوکونه مسیحِ صلیبِ وَسی آزاری بیدیند. ¹³ اَجور معلمان کی ختنه هم بوبُسته دَأرد، حاضر نیید خودشانم شریعتِ باقی اَحکام بجا باورد، و فقط خَأید شومَأن ختنه بیبید تا شیمی جسمَ افتخار بوکوند و بوگوید شومَأن اوشَأنِ مُریدید. ¹⁴ ولی خدا نوکونه کی من جُز اَمی خداوندِ صلیبَ افتخار بوکونم کی بواسطۀ اون دونیا مِرِه مصلوب بوبُستْ و من دونیا رِه. ¹⁵ چون ختنه بوستَأن یا نوبوستَأن مهم نییه، بلکی فقط خلقتِ تازه مهمه. ¹⁶ سلامتی و رَحمت بر همۀ اوشَأنی کی اَن اصلِ جَه پیروی کوند و همینطور خدا اسرائیلِ رِه. ¹⁷ دِ دربارۀ اَ موضوعات می مرَه بحث نوکونید و مرَه زحمت ندید، چون دوشمنان زخمهایی می بدنِ رو ایجاد بوکوده دَأرد، من خداوند عیسی داغَ می بدنِ رو دَأرم. ¹⁸ ای برأرأن، اَمی خداوند عیسی مسیح فیض شیمی روحِ اَمرَه بیبه. آمین آمین