¹ Yame, Paulusi, namilomba, mu uwa no n'eke thza Kilesite. Nalihusha pashi kunili mukaci kenu, unone namikwama ko ukolo kunili kokule. ² Namilomba ci, kunili nenu kana kukwama ko ukolo ou nianekela ci oliyo niloela kukwama ou nihumbisha wamweya awa aanekela ci twaenda mu nyama. ³ Mukonda shanga ci twaenda mu nyama, katulu mu ndwa ko nyama. ⁴ Mukonda ilwisho tulwisha kali ya nyama. Unone, ili no ukolo wa Nyambi ou utwesha kuipisha matala. Yatwesha kumanisha likan'i lyokopila oku litwala. ⁵ Kalo twaipisha enu yoshokolo eyi ilwisha maano a Nyambi. Twaanga maayalo oahe ci ayuvele Kilesite. ⁶ Kalo twaliloishela kupa milandu ekwama yoihe yokupila likute, likute lyenu ou lyakukwana shuwana. ⁷ Mutaneke eshi shili pa posho thzenu. Ngeci munu yomuhe ayepo tawa ci wa Kilesite, abuluke ci eli ali wa Kilesite, natwe lyotuli. ⁸ Mukonda shanga ci nalishangala kamanaana ko okolo tuli nao, ou atupile Fumu ci tumikwame ne kali kumi ipisha, kana kuyuva honyi. ⁹ Kanifotile ci kumonahale ci namiyapisha ko man'olo ange. ¹⁰ Mukonda anu amweya ambanga ci, ''Man'olo enji alemu no okolo, unone aye kuliko mu elama kali munu omuwa. Maywi enji kaloelile kuateelela.'' ¹¹ Anu okengeyo alimuke ci omu tunakalela mu maywi o man'olo etu ngeci katuliko moliyo twakukalela mu ekwama yetu ou twakukala ko. ¹² Atwe katuliwaneka nji kulianekethza twashinda nawa alishangala ashinda. Unone ou alipima no kulianekathza ashinda kayuvishisha. ¹³ Atwe, shanga kengeyo, katwakuliyuvishisha nene. Unone, kenge twakukwama omu anatupela Nyambi, eci omu anamipela namwe. ¹⁴ Mukonda katulikulisha twashinda eci kanatukumu kukwenu. Atwe omutatekelo kulimuka evangeli thza Kilesite. ¹⁵ Katulishangalile nene kupitelela ekwama yangenjetu. Unone, tunakulupela ci shitawo shenu ou shikula, ekwama yetu mukaci kenu kenge ikula nene, ¹⁶ ci twakukutathze evangeli no mu matunga okule, kokupila kulishangala ko ekwama inakwamamiwa mu matunga angenjenu. ¹⁷ ''Unone munu yomuhe lishangala, alishangale kwa Fumu.'' ¹⁸ Mukonda kali munu oyu lipaka aye shinda oyu tawethziwa, unone oyu apaka Fumu.