¹ Kwakalile mukwelume o kushikuta sha Benjamine, mukwelume oyu wakalile no lufumo lolukulu. Lithzina lyenji neli Kishi mwana Abiele mwana Zerori mwana Bekorati mwana Afia, mwana o shikuta sha Benjamine. ² Kuma akalile no mwana o lithzina lyo Saule, mushumba omuwa. Kakwakalile mukwelume kwa ana Isilaele omuwa kumupita. Kutunda pa mapee enji kuthza muwilu neli mule kupita anu wahe. ³ Honi indongi ya Kishi, tata wa Saule, ayopo iyonga. Kishi ayepo amba kwa Saule mwanenji, ''Oshimbeko mupika yofoci nowe; mukatuke muthze mukafote indongi.'' ⁴ Ne Saule ayepo thza kupita mu mikinya thza litunga lya Eframi no kuthza mu litunga lya Shalisha, unone kaiwanine. Ne awopo apita mu litunga lya Shalimi, unone kayakalile ko. Nehoni awopo apita mu litunga lyaka shikuta sha Benjamine, unone kaiwanine. ⁵ Apa akumine ku litunga lya Zufi, Saule ayepo ambela mupikenji oyu aendile nenji, ''Wiye, tuthze tuhuke, ou tukana kukwama kengeyo tata kenge ashia kuvilaela indongi ne kenge kulishoshomwa atwe.'' ⁶ Unone mupika ayepo amba kukwenji, ''Omone, kwali munu wa Nyambi omu mu mbongi. Munu o mulemmu; enu yoihe ei aamba yakala yoshemwa. Tuthzeko, nahimi kenge atutongwele ci tuthzele kupi mu muendo wetu.'' ⁷ Nehoni Saule ayepo amba kwa mupikenji, ''Unone shanga atwe tuthza ko ine tumutwalela? Mukonda makende anakala mu mikotana thzetu anapu, kalo kwithsa yokukapa munu wa Nyambi. ine tuli naayo? ⁸ Mupika ayepo tawa Saule no kuamba ci, ''Pano nili no shelenyi yofoci ku mashelenyi ane o mashekele o shilivera oyu nikapa munu wa Nyambi, ci atutongwele oku tuloela kuthza.'' ⁹ (Kukale mu Isilaele, munu apa athza kukaipula kwa Nyambi, amba ci, ''Okeye, tuthze kwa muka kumona.'' Mukonda awa apolofita o lelo kukale kuma naaishiwanga ci akakumona.) ¹⁰ Nehoni Saule ayepo amba kwa mupikenji, ''Onaamba nawa. Tuthze.'' Ne awopo athza ku mbongi oku akalile munu wa Nyambi. ¹¹ Apa nakanduka mukinya kengeyo kuthza ku mbongi, awopo ahangana ambanda kwa keya ku kuveta meyu; Saule na mupikkenji awopo aamba kukwo, ''Muka kumona mwali muno?'' ¹² Awopo atawa no kuamba ci, ''Mwali; mumone, oyo li pa posho thzenu. Muyokolole, mukonda akeya mu mbongi lelo, mukonda anu aleta itavelo lelo ku shivaka sho kulumba. ¹³ Mushiingena pohuma mu mbongi kenge mumuwana, kushime kuthza ku shivaka sho kulumba kukalya. Anu kali kupitela apa akuma, mukonda yoliyo fiyawethza shitavelo; munyima awa anakumuniwa kenge alya. Honi mukanduke, mukonda pano mwene kenge mukamuwana.'' ¹⁴ Ne awopo akanduka ku mbongi. Kwakengena mu mbongi, awopo amona Samuele kukeya kukwo, kuthza ku shivaka sho kulumba. ¹⁵ Honi Samuele kushime kukeya, Shinda sha moyo kuma nambela Samuele: ¹⁶ ''Peunja shino shikati kenge nikutumena munu kutunda ku litunga lya Benjamine, ne kenge omuwesha ci akale muka kuendisha anu ange Isilaele. Kenge akuamwena anu ange ku lyoko lyo aka Filisita. Mukonda ninataneka anu ange ko ñeke mukonda kulila ko kunanakumu kukwange.'' ¹⁷ Samuele apa namono Saule, Shinda sha moyo ayepo muambela, ''Yoliyo oyu nanikutongwela! Yoliyo wakuendisha anu ange.'' ¹⁸ Nehoni Saule ayepo henyena kwa Samuele ku shelo no kuamba, ''Onitongwele oku thzili njiyo thza muka kumona?'' ¹⁹ Samuele ayepo tawa Saule no kuamba, ''Yame muka kumona. Okanduke ku shivaka sho kulumba pa posho thzange, mukonda lelo kenge olya nange. Ku mashikushiku kenge nikushia ci othze, ne kenge nikutongwela yoihe ei ili mu maayalo oe. ²⁰ Eci indongi yoe ei naiyongo mayuwa ahatu anapu, lelo walishoshomwa, mukonda inawaniwa. Nehoni ihima ya Isilaele kwalye ili? Kali kukoe no wahe aka njiyo thza tata oe? ²¹ Saule ayepo tawa no kuamba, ''Kali no mukashikuta sha Benjamine, shikuta shoshionye kumanenena mu Isilaele? Shikuta shange kali sholiyo shoshionye ku mushobo wa Banjamine? Honi ine onaambela kengeya kukwange? ²² Ne Samuele ayepo shimba Saule no mupikenji, kuwaleta mu njiyo, no kuwakalisha ku kuipula yo kuposho yawa anakumuniwa, awa nakumu pa anu makumi ahatu. ²³ Samuele ayepo ambela muka kuteleka, ''Olete ilya ei ninakupa, iya ninakuambela ci, 'Oipake kunyonga.''' ²⁴ Ne muka kuteleka ayepo shimba litambaulu nei naikalapo no kuitenekela Saule. Nehoni Samuele ayepo amba ci, ''Omone ei inatulekiwa inatenekiwa pa posho thzoe. Oilye, mukonda kuma naitulekiwa yowe kupitela shikati nashiambiwa, kutunda shikati apa naniamba ci, 'ninakumuna anu.''' Ne Saule ayepo lya na Samuele elyo liyuwa. ²⁵ Nehoni apa naulumuka kutunda ku shibaka sho kulumba kuthza mu mbongi, Samuele ayepo amba na Saule kwali peulu thzo shituwa. ²⁶ Nehoni mashikushiku lyuwa ko lifota kuva, Samuele ayepo isha Saule peulu thzo Shituwa no kuamba ci, ''Opinduke, ne othze mu muendo oe.'' Ne Saule ayepo pinduka, ne muwili wo aye na Samuele awopo athza mu likuñwa. ²⁷ Apa naende kengeyo kutunda mu mbongi, Samuele ayepo amba kwa Saule, ''Oambele mupika alitangethze ku posho thzetu''- ne ayepo thza kuposho- unone owe okale muno tango, ci nikutongwele iamba itunda kwa Nyambi.''