¹ Nehoni Samuele ayepo shimba livotelea lyo maathzi, ne ayepo amwaela pa mutwi wa Saule, no kumucuveta. Ayepo amba ''Kali Shinda sha moyo onakuweshe ci okale muendishi wa anu awa ashwana ofumu wennji? ² Lelo apa onishiya, kenge owana akwelume eli kunyonga thzo mbumbo thza Rahele, mu litunga lya Benjamine ku Zeleza. Kenge akuambela ci, 'Indongi nofoto inawaniwa. Honi tata oe onashii kuvilaela indongi, ne alishoshomwa yowe, kuamba ci, ''Kenge nikwama ngepi ko mwanange?''' ³ Nehoni kenge otunda apo kuthza, ne kenge okakuma ku shitondo sha Tabori. Akwelume ahatu awa athza kwa Nyambi ku Betele kenge akuwanako, yofoci onashimbi tumembeana tuhatu, yumweya inashimbi ihele ihatu, ne yumweya onashimbi kahupa ko shikanda omu kuli waine. ⁴ Ke akuvumenena no kukupa ihele ili yo ishima, eyo wakushimba mu moko o. ⁵ Kutunda apo, kenga okuma ku mukinya wa Nyambi, oko kuli lyumbo lyo mashwalale o Afilisita. Apa okuma mu mbongi, kenge owana mutapi wa apolofita kwatunda kushivaka sho kuwilu no kambuli, no kangoma, no pala, kalo no halepapa posho thzo; kenge apolofita. ⁶ Mupepo wa Nyambi kenge ukeya kukoe, ne kenge o polofita no, ne kenge opiluka munu wao. ⁷ Honi, eyi imonisha apa ikeya kukoe, okwame yoihe lyoko lyoe likupa kukwama, mukonda Nyambi oli noye. ⁸ Opite pa posho thzange othze ku Giligali. Nehoni kenge nikeya kukoe kuleta itavelo yo kutumeka no kupa itavelo yo kukandelela. Otatiele mayuwa mutanu na eli(7) kupitela apa nikeyela kukoe kunakumonisha ei okwama.'' ⁹ Saule apa napa muongo Samuele kuthza, Nyambi ayepo mupa mucima wao. Nehoni imonisha yoihe ayopo imonahala elyo liyuwa. ¹⁰ Apa akumine ku mukinya, mungi wa apolofita awopo amuhangana, ne mupepo wa Nyambi awopo umuingena ne ayepo polofita no. ¹¹ Munu yomuhe oyu namulimuka apa namumona ku polofita na apolofita, anu awopo aamba munu na mungenjenji, ''Shine shinakwamahala kwa mwana Kishi? Saule seli yumweya wa apolofita honi?'' ¹² Munu oyu watundile oko ku shivaka ayepo tawa, ''Nehoni elye tata wo?'' Mukonda wei, kuneya kuamba ci, ''Ei ne Saule yumweya wa apolofita?'' ¹³ Apa amanine kupolifita ayepo keya ku shivaka sho kuwilu. ¹⁴ Nehoni tata wa Saule o muonye ayepo amba kukwenji na mupikenji, ''Kupi oku namuthzi?'' Ayepo tawa, ''kukufota indongi. Apa natumono ci katuiwanine, atwepo tuthza kwa Samuele.'' ¹⁵ Tata wa Saule omuonye ayepo amba , ''Nalomba onitongwele ei ana kuambela Sanuele.'' ¹⁶ Saule ayepo tawa tata wenji o muonye, ''Onatutongwela po pakenu ci indongi inawaniwa.'' Unone kana mutongwela yo muvuso, ei naamba Smuele. ¹⁷ Honi Samuele ayepo wisha anu wahe ci aliwane pofoci pa posho thza Shinda moyo ku Mizipa. ¹⁸ Ayepo ambela ana Isilaele, ''Ei yoliyo amba Shinda moyo Nyambi wa Isilaele, 'Nanitundisha Isilaele nu Engepita, kalo nanimiamwena ku moko aka Engepita no ku lyoko lyo ikuña yoihe ei naiminyandisha.' ¹⁹ Unone lelo munakana Nyambi wenu oyu namiyoyisha mu ukalu wenu wouhe no mu makando enu; Honi mulimonahalishe pa meho Ashinda noyo ko mishovo thzenu no ikuta yenu.'' ²⁰ Ne Samuele ayepo leta ikuta yoihe ya Isilaele po pepi, Ne shikuta sha Benjamine ashopo shihanguliwa. ²¹ Ne ayepo leta mushovo wa Benjamine popepi ko ikuta yo; ne shikuta sha Matirit ashopo shihanguliwa, ne Saule mwana Kishi ayepo hanguliwa. Unone apa athzile kukamufota, kamuwanine. ²² Ne anu afotile kuipula Nyambi yo kuipula yoingi, ''Apa ne kwali munu yumweya oyu keya?'' Shinda sha moyo ayepo tawa, ''Onaliholeka mu ito.'' ²³ Nehoni awopo andandumuka kukatundisha Saule mu ito. Apa aimanine mukaci ko anu, apitelela anu wahe ku ole amukumishela pa mapee. ²⁴ Nehoni Samuele ayepo ambela anu, ''Munamono munu oyu anahangula Shinda sha moyo? Kwithsa o kulipitula nenji mukaci ko anu wahe!'' Anu wahe awopo akuwelela, ''Oyoye fumu!'' ²⁵ Nehoni Samuele ayepo tongwela anu shithzo no milao thzo ufumu, ayepo thziñola mu vuka, no kuthzipaka pa posho thza Shinda sha moyo. Samuele ayepo ambela anu ci mu u no munu ahuke ku njiyo thzenji. ²⁶ Saule naye ayepo thza ku njiyo thzenji ku Gibea, ne ayepo thza no akwelume owakolo awo nakwata micima thzo Nyambi. ²⁷ Unone anu wamweya owamango awopo aamba, ''Ngepi nga atwesha kutuyoyisha oyu munu?'' Awa anu kuma nashwaula Saule ne kwithsa shipiwa eshi namuletela. Unone Saule ayepo tutwala.