¹ Nehoni Nahashi o Mumoni ayepo paka lyumbo lya Jabeshi Giliadi mukaci ko mashwalale. Akwelume wahe omu Jabeshi awopo amba kwa Nahashi, ''Olimbusheke netu ne kenge tukukwamena.'' ² Nahashi o Mumoni ayepo tawa, ''Ame kulimbusheka nenu, shime apa tuliyuva pa shinu shofoci, ci mwaheno munu no munu nimutuyule lithziho lyo shilyo, ne omo moliyo niletela kushomoloka kwa ana Isilaele wahe.'' ³ Nehoni akulu omu Jabeshi awopo amutawa, ''Otushiye tango mu mayuwa mutanu na eli(7), ne ci tutume atumiwi mu litunga lyolihe lyo Isilaele. Nehoni, ngeci kwithsa oyu tuamwena, kenge natulipa kukoe.'' ⁴ Atumiwi awopo akeya ku Gibea, oku nakalanga Saule, ne awopo atongwela anu ei inakwamahala. Anu wahe awopo alila nene. ⁵ Honi Saule ae kuma ashupwelile mapulu ku shilwa. Saule ayepo amba, ''Ine inakwamahala kwa anu ei alila?'' Awopo atongwela Saule ei anaamba akwelume oku Jabeshi. ⁶ Saule apa nayuvu ei naamba, mupepo wa Nyambi awopo umuingena, ne ayepo anjipa nene. ⁷ Ayepo shimba mapulu akalile ku coko, no kuatetaula ipinthzi pinthzi, no kuitutumena mu litunga lyolihe lyo Isilaele ko atumiwi. Ayepo amba, ''Yomuhe oyu kana kwiya munyima thza Saule no munyima thza Samuele ei yoliyo yakukwamahala ku mapulu enji.'' Nehoni kuyapisha kwa Shinda sha moyo akopo kuingena kwa anu, ne awopo akeya pofoci. ⁸ Apa awatalile ku Bezeki, anu a Isilaele kuma akumine pa 300,000, ne akwelume a Juda neli 30,000. ⁹ Awopo amba kwa atumiwi awa akeile, ''Mukaambele anu oku Jabeshi Giliadi ci, 'Peunja, mushikati sho mutanya, litanya ko lipya, kenge amweniwa.''' Ne atumiwi awopo athza kukatongwela anu oku Jabeshi, ne awopo anyanyuka. ¹⁰ Nehoni anu oku Jabeshi awopo aambela Nahashi, ''Peunja kenge tulipa kukoe, ne kenge okwama kukwetu yoihe ei imonahala ci iwa ku kwoe.'' ¹¹ Liyuwa lyahatileko Saule ayepo handula anu luhatu. Awopo akeya pakaci ko shilombo mu shikati sho malungasiku, ne awopo alwisha no kutwesha Amoni kutwala apa nalikapyela liyuwa. Awa napanduka awopo alihanda, ne kwithsa awa ashiyalile eli pofoci. ¹² Nehoni anu awopo aamba kwa Samuele, ''Alye awo naamba ci, 'Kenge Saule atwesha kutuendisha?' Mulete awo akwelume, tuwapaee.'' ¹³ Ambene Saule ayepo amba, ''Kwithsa munu oyu paiwa mu liyuwa lyo lelo, mukonda lelo Shinda sha moyo onaamwena Isilaele.'' ¹⁴ Nehoni Samuele ayepo ambela anu, ''Mukeye, tuthzenu ku Giligali tukakolopishe ofumu.'' ¹⁵ Ne anu wahe awopo athza ku Giligali ne awopo akapaka Saule pa ufumu pa meho a Shinda sha moyo mu Giligali. Oko awopo aleta itavelo yo kuliyala pa meho a Shinda sha moyo, ne Saule no anu a Isilaele wahe awopo anyanyuka nene.