¹ Samuele ayepo ambela ana Isilaele wahe, ''Ninayuvu enu yoihe munaniambela, ne ninamipa fumu ci amiendeshe. ² Ne, fumu oyu enda posho thzenu; ame ninakulupala no mutwi wange ukenu mvi; no, anange owakwelume ali nenu. Ninamiendisha kutunda ku wanuke wange kuleta lelo. ³ Yame ono; mupe upaki pa meho a Shinda sha moyo no pa meho a munu wenji naweshiwa. Pulu walye ninashimbi?Shindongi shalye ninashimbi? Elye ninashimbela shinu shenji ko kumuangela? Elye ninatalula? Ku lyoko lyalye ninatambula mali okweta ci nilikwame okukana kumona? Mupe upaki ne kenge nimihushela yo.'' ⁴ Awopo amba, ''Ko shimbile enu yetu ko kutuangela, kotutalulile, nji kuithza shinu ku lyoko lyo munu.'' ⁵ Ayepo waambela, ''Shinda sha moyo yoliyo paki, no muweshiwi wenji naye paki lelo, ci yahi munawana mu lyoko lyange.'' Awopo atawa, ''Shinda sha moyo yo paki.'' ⁶ Samuele ayepo ambela anu, ''Shinda sha moyo yoliyo wahangulie Mushe na Aruni, kalo yoliyo watundishile a tata wenu mu litunga lya Engepita. ⁷ Nehoni, muimane, ne nithsombe nenu posho thza Shinda sha moyo yo ekwama yoihe yo kuluka ya Shinda sha moyo, ei anamikwamena na tata wenu. ⁸ Jakobo apa akeile ku Engepita, ne akwa thsañulu enu awopo alile kwa Shinda sha moyo, nehoni Shinda sha moyo ayepo tuma Mushe na Aruni , awa natundisha akwa thsañulu enu mu Engepita ne awopo nakala muno mushivaka. ⁹ Ambene navulama Shinda sha moyo Nyambi o; Ayepo wapa mu moko a Sisare, muendishi o mashwalale oku Hazori, no mu moko o Afilisita, no mu moko a fumu wa Amoavi; wahe awa kuma alwishile akwa thsañulu enu. ¹⁰ Awopo alile kwa Shinda sha moyo no kuamba, 'Tunakwama shivi, mukonda tunashii Shinda sha moyo ne tunakwamena Baale no Ashitaroti. Ambene pano otuamwene ku moko akwethzimbo yetu, ne kenge tukukwamena.' ¹¹ Ne Shinda sha moyo ayepo tuma Jerubaale, Bedani, Jafeta, no Samuele, no kumiamwena kwa akwethzimbo yenu awa namithzinguluka, ne ci mukale mo kuliyala. ¹² Apa namumono Nahashi fumu o Amoni kukeya kunamilwisha, amwepo muniambela ci, 'Lyombo, kukale fumu tuendisha'- shanga ci Shinda sha moyo Nyambi wenu neli yoliyo fumu wenu. ¹³ Ne oyu fumu munahangula, oyu munalombo no oyu anahangula Shinda sha moyo ci akale fumu wemu. ¹⁴ Ngeci mwayapa Shinda sha moyo, mumukwamene, muyuve liywi lyenji, ne mwalitundulela milao thza Shinda sha moyo, nehoni namwe no fumu oyu miendisha kenge mukala aka kushupwela Shinda sha moyo Nyambi wenu. ¹⁵ Ngeci kamuyuvu liywi lya Shinda sha moyo, ambene mwalitundulela milao thza Shinda sha moyo, nehoni lyoko lya Shinda sha mouyo kenge limialukela, eci omu nalialukela akwa thsañulu enu. ¹⁶ Shanga pano mutatiele ne mumone enu yoikulu ei akwama Shinda sha moyo pa meho enu. ¹⁷ Lelo kali liyuwa lyo kuyanga uloto? Kenge niisha kwa Shinda sha moyo, ci atume mishika no mvula. Nehoni kenge mulimuka no kumona ci omango wenu ukulu, ou munakwama mun meho a Shinda sha moyo, pa kulilombela fumu.'' ¹⁸ Ne Samuele ayepo isha kwa Shinda sha moyo; ne omu liyuwa elyo mwene Shinda sha moyo ayepo tuma mishika no mvula. Nehoni anu wahe awopo ayapa nene Shinda sha moyo na Samuele. ¹⁹ Nehoni anu wahe awopo ambela Samuele ci, ''Olombelele apikoe kwa Shinda sha moyo Nyambi oe, ci lelo twafa. Mukonda tunavungisha ku ivi yetu yoihe ou omango o kulilombela fumu atwe twashinda.'' ²⁰ Samuele ayepo tawa, ''Lelo mwayapa. Munakwama ou omango ouhe, ambene lelo mwaalukela kwako kutunda kwa Shinda sha moyo, ambene mukwamene Shinda sha moyo ko micima thzenu thzothzihe. ²¹ Mwashungumukela ku enu yo tumbako apa mukana kuwana shimweya nji kumiamwena, mukonda kaili no okwathsi. ²² Mukonda o lithzina lyenji lyo likulu, Shinda sha moyo ka kukana anu enji, mukonda shinanyanyukisha Shinda sha moyo pa kumikwama anu enji aye shinda. ²³ Eci kukwange, kulepe ngepi kana kukwama shivi kwa Shinda sha moyo ko kushiya kumilombelela. Kenge nimifundisha likuñwa lyo liwa lyo kuluka. ²⁴ Muyape Shinda sha moyo pohuma ne mumukwame mu shemwa ko micima thzenu thzothzihe. Muvuluke enu yoikulu ei anamikwamena. ²⁵ Ambene ngeci mukwatelele kukwama omango, namwe no fumu wenu kenge muipishiwa.''