¹ Saule kuli no myaka makumi ahatu(30) thzo kuelekiwa apa atatekile kuendisha; apa aendishile Isilaele pa myaka makumi ane(40), ² ayepo hangula akwelume o kukuma pa 3000 omu Isilaele. O kukuma pa 2000 kuma akalile nenji mu Mikimashi no pa mukinya o Betele, o kukuma pa 1000 awo kuma akalile na Jotani mu Gibea wa Benjamine. Mashwalale wamweya awa ashiyalile ayepo wahusha ku lyumbo, munu no munu ku tende thzenji. ³ Jonatani ayepo lwisha mashwalela o Afilisita awa akalile ku Geba ne Afilisita awopo aiyuva. Nehoni Saule ayepo shika tolombita mu litunga lyolihe, kuamba ci, '' Aheberu ayuve.'' ⁴ Isilaele yomuhe awopo ayuva ci Saule onalwisha ne onatwesha mashwalale o Afilisita, ne kalo ci Isilaela onapiluka shinu shinuka kuola kwa Afilisita. Nehoni mashwalale awopo aishiwa ci naliwane pofoci na Saule ku Giligali. ⁵ Afilisita awopo aliwana pofoci kulwisha Isilaele, no ikocikala 3000, akwelume 6000 awa aendiha ikocikala, no mashwalale owange eci luheke lo pa liya lyo liviya. Awopo akeya kunakwama shilombo ku Mikimashi, ku muvo yuwa o Beti Aveni. ⁶ Ana Isilaele apa amonine ci ali mu ukalu- mukonda anu kuma aingenine mu ukalu, anu awopo aliholeka mu mikoti, mu mapukumuna, mu mawe, mu mashima, no mu mateke. ⁷ Aheberu wamweya awopo ayavukela ku Jodani ku litunga lya Gadi no Gileadi. Ambene Saule aye kuma ashiyalile ku Giligali, ne anu wahe awopo amushupwela kwatutuma. ⁸ Ayepo tatelela mayuwa mutanu na eli(7), mayuwa apakile Samuele. Ambene Samuele kakeile ku Giligali, ne anu awopo alihanda kutunda kwa Saule. ⁹ Saule ayepo amba, ''Muniletele shitavelo sho kutumeka no itavelo yo kuliyala.'' Ne ayepo kwama shitavelo sho kutumeka. ¹⁰ Oshimana pohuma kukwama shitavelo sho kutumeka Samuele ayepo kuma. Saule ayepo thza kukaliwana nenji no kukamuvumenena. ¹¹ Nehoni Samuele ayepo amba, ''Ine onakwama?'' Saule ayepo tawa, ''Apa ninamono ci anu anishiya, kalo owe kokumu mushikati shina pakiwa ne Afilisita analiwa ku Mikimashi, ¹² amepo niamba ci, 'Honi Afilisita kenge akeya kunanilwisha ku Giligali, ne kanilombile okwathsi wa Shinda sha moyo.' Ne amepo niliootela kukwama shitavelo sho kutumeka.'' ¹³ Nehoni Samuele ayepo ambela Saule, ''Onakwama wanga. Komamelile mulao wa Shinda sha moyo Nyambi oe ou nakutumena. Mukonda apo Shinda sha moyo kuma anafoto kukukwama mukakuendisha Isilaele o liyele. ¹⁴ Unohoni kuendisha koe kakwa kuthza posho. Shinda sha moyo onalifotela Mukwelume oyu uloela mucima wenji, ne Shinda sha moyo onamuhangula ci akale mukakuendisha anu enji, mukonda awe komamelile ei nakutumena.'' ¹⁵ Nehoni Samuele ayepo katuka kutunda ku Giligali kuthza ku Gibea wa Benjamine. Nehoni Saule ayepo tala anu awa akalile nenji, akwelume ita mutanu na shofoci (600). ¹⁶ Saule, mwanenji Jonatani, no anu awa akalile no, awopo akala mu Geba wa Benjamine. Ambene Afilisita awopo akwama shilombo ku Mikimashi. ¹⁷ Anu anapiwa kukanyanga anu enu yo awopo alihanda luhatu kutunda ku shilombo sha Afilisita. Omutatekelo awopo atamba ku Ofura, ku litunga lya Shuale. ¹⁸ Wamweya awopo atamba ku Beti Horoni, ne wamweya awopo atamba ku lyanda lya Zeboimi ku mumbulwa kukutu. ¹⁹ Kwithsa mukwa kufula oyu wawaniwile mu Isilaele momuhe, mukonda Afilisita kuma ambile ci, ''Aheveru lelo alifulela miele nji mañothzi.'' ²⁰ Ambene akwelume omu Isilaele wahe kuma nathzanga kwa Afilisita, munu no munu kukashemuna lulimi lo shikekele shenji, litemo lyenji, kamo kenji, no cekesi thzenji. ²¹ Kuma nakulisiwanga mashekele okupitelela licika pa kushemunisha lulimi lo shikekele, no matemo, no mashekeleb okukana kukwana licika pa kushmunisha kamo no kushongonona miondo. ²² Ne pa liyuwa lyo mvo, kwithsa miele nji mañothzi aa nawaniwa mu moko o mashwalale awa nakala na Saule na Jonatani; shime Saule na mwanenji Jonatani pohuma woliyo akalile nayo. ²³ Mashwalale o Afilisita awopo athza ku likuñwa lyo Mikimashi.