¹ Liyuwa limweya, Jonatani mwana Saule ayepo ambela mushumba oyu nashimbanga ilwisho yenjii ci, ''Okeye, tuthze musambwa ku shilombo sho mashwalale o Afilisita.'' Ambene katongwelile tata wenji. ² Saule aye kuma nakalanga kuhula o Gibea mushi thzo shitondo sho garaneti mu Migoroni. Akwelume ita mutanu ma shofoci (600) woliyo nakalanga nenji, ³ neli Akija mwana Akitubi (mukulwa Ikabodi) mwana Finehasi mwana Eli, mupulisita wa Shinda sha moyo ku Shilo, oyu wabatangile efoda. Anu kalimukile ci Jonatani onathzi. ⁴ Mu likuñwa eli afotile kupita Jonatani ci athze ku shilombo sho mashwalalel o Afilissita, kuma kwakalile liwe lyo likulu eli linathzi muwilu ku sambwa oku napitela kalo liwe limweya kusambwa limweya. liwe limweya neli alita lithzina lyo Bozezi, ne liwe limweya neli alita lithzina lyo Seni. ⁵ Liwe limweya kuma nalikalela ku mutulo ku posho thzo Mikimashi, ne limweya kuma nalikalela ku mboelaku posho thzo Geba. ⁶ Jonatani ayepo ambela oyo muka kumushimbela ilwisho, ''Okeya, tuyavukele ku shilombo sho mashwalale awa angenjetu ana kana kuthza ku mukanda. Nahini Shinda sa moyo kenge atukwamena, mukonda kwithsa eshi shitwesha kukwangisha Shinda sha moyo kuyoyisha ko owangi nji anu owapu. ⁷ Muka kumushimbela ilwisho ayepo tawa, ''Okwame enu yoihe ei ili mu mucima oe. Othze ko, omone, nili noe, kukwama yoihe onitumene.'' ⁸ Nehoni Jonatani ayepo amba, ''Kenge tuyabukela kwa waya akwelume, ne kenge tulimonahalisha kukwo. ⁹ Ngeci atuambele ci, 'Mutatelele apo kutwala apa tukeyela kukwenu'- nehoni kenge tukala mushivaka yetu ne katuyavukela kukwo. ¹⁰ Ambene ngeci atawe ci, 'Mukeya kuno kukwetu,' pohuma kenge tuyavuka, mukonda Shinda sha moyo onawatupa mu moko etu. Eshi sholiyo shimona kukwetu. ¹¹ Ne muwili wo awopo alimonahalisha ku shilombo sho mashwalale o Afilisita. Afilisita awopo aamba, ''Mumone, Aheveru apuna mu mateke omu naliholeka.'' ¹² Nehoni akwelume mu shilombo sho mashwalale awopo aisha Jonatani na muka kumushimbela ilwisho, ne awopo aamba, ''Mukeye kuno kukwetu, ne kenge tumimonisha shinu.'' Jonatani ayepo ambela muka kumushimbela ilwisho, ''Onishupwela mu manyima, mukonda Shinda sha moyo onawapa mu lyoko lya Isilaele.'' ¹³ Jonatani ayepo thzina ko moko no maulu enji, ne muka kumushimbela ilwisho ayepo mushupwela manyima. Afilisita awopo afa pa meho a Jonatani, ne muka kushimba ilwisho naye po paa wamweya munyima thzenji. ¹⁴ Oko kulwa ko mutatekelo oko Jonatanai no muka kumushimbela ilwisho aka lwile, kuma kwapaile akwelume makumi eli mushivaka sikuma pa ekele. ¹⁵ Kuma kwakalile kututuma mu shilombo, mu litunga, no mukaci ko anu. Shanga mashwalale o mu shilombo na aka kunyanga anu enu yo nawo kuma atutumine. Kaye akopo kalinyenga nyenga, ne akopo kukala kututuma ko kukulu nene. ¹⁶ Nehoni aka kunyunga Saule mu Gibea wa Benjamine awopo ataneka; mungi wo mashwalale o Afilisita alihanda, ne athza oku no ku. ¹⁷ Nehoni Saule ayepo ambela anu akalile nenji, ''Mutale ne mumone ci elye wahi kukwetu.'' Apa amanine kutala awopo amona ci Jonatani na muka kumushimbela ilwisho ahi. ¹⁸ Saule ayepo ambela Akija, ''Olete kuno aleka thza Nyambi,'' mukonda mu shikati esho kuma nathzikala kwa ana Isilaele. ¹⁹ Saule apa naamba kengeyo na mupulisita, muyoyo mu shilomba sha Afilista awopo ukula nene. Nehoni Saule aayepo ambela mupilisita, ''Ohushe lyoko lyoe.'' ²⁰ Saule no anu wahe awa akalile nenji awopo aliwana kuthza ku kulwa. Mufilisita no Mufilisita mwele wenji kuma naulwisha Mufilisita mungenjenji, ne kuma kwakalile muyoyo oukulu nene. ²¹ Honi Aheveru awa akalangile no Afilisita kunyima, no awa athzile no mu shilombo, nawo awopo aliwana no ana Isilaele awa akalile na Saule na Jonatani. ²² Ana Isilaele wahe awa aliholekile mu mikinya no Efraimi apa ayuvile ci Afilisita anacili, nawo awopo awacithza mu mvo. ²³ Ne Shinda sha moyo ku aamwenine Isilaele mu liyuwa elyo, Ne mvo athzopo thzitelele ku Beti aveni. ²⁴ Elyo liyuwa ana Isilaele kuma akalile mu ukalu mukonda Saule kuma awaethzelile no kuamba ci, ''Onakutiwa munu yomuhe oyu lya sho kulya kutwala lungulo ne ninakulisha akwethzimbo yange.'' Ne kwithsa lishwalale oyu walile shilya. ²⁵ Nehoni anu wahe awopo aingena mu mulundu ne kuma kwakalile oki pashi. ²⁶ Anu apa aingenine mu mulunda, oki ko uhoya, ambene kwithsa oyu wapakile lyoko ku kanwa kenji mukonda anu kumaa ayapile shikuto. ²⁷ Unone Jonatani kanayuvu ci tata wenji onaethzela anu. Ayepo shimba mulamu naukala mu lyoko lyenji kuuingenisha mu lupako omu nakukala oki. Nehoni ayepo shimba no lyoko lyenji kupaka kukanwa, ne meho enji aopo amona nawa. ²⁸ Nehoni yumweya kwa anu, ayepo tawa, ''Tata oe kuma nakanisha anu ko kuwaethzela, ko kuamba ci, ''Kukutiwe munu yomuhe oyu lya shilya pa liyuwa eli,' shanga ci anu anafu njala.'' ²⁹ Nehoni Jonatani ayepo amba, ''Tata onaleta okalu omu mu litunga. Mumone meho ange omu amonena nawa mukonda ninaliko toshoonye oku ku oki. ³⁰ Honi anu nga analilyela kwei ananyanga akwethzimbo yo anawana kali nga analiyuvu nawa nene? Mukonda pano kakukalile kufa ko kukulu nene mukaci ko Afilisita.'' ³¹ Elyo liyuwa awopo alwisha Afilisita kutatekela ku Mikimashi kuthza ku Ajaloni. Anu kuma aile nene. ³² Anu awopo andandumukela kunyanga enu ne awopo ashimba mangu, ngombe, no tunamani ne awopo aipaela pashi. Anu awopo ailya no onyinga. ³³ Nehoni awopo ambela Saule, ''Omone, anu akwama shivi kwa Shinda sha moyo ko kulya no onyanga.'' Saule ayepo amba, ''Munakwama omango. Honi, mualumunene liwe lyoshokulu kuno kukwange.'' ³⁴ Saule ayepo amba, ''Muthze kwa anu, ne mukawaambele ci, 'Munu no munu alete ngombe no mangu enji kuno, ne naipae no kuilya. Lelo mwakwama shivi kwa Shinda sha moyo ko kulya nyama oyu li no onyinga.''' Ne munu no munu owo ushiku ayepo keya no pulu wenji no kunamupaa. ³⁵ Saule ayepo umbela Shinda sha moyo aletare, athzo aletare thzo mutatekelo kuumbela Shind sha moyo. ³⁶ Nehoni Saule ayepo amba, ''Tushupwelenu Afilisita ushiku ne tuwanyange enu yo kutwala mashikushiku apa liva; lelo twashiya shanga yofoci okuyoya kukwo.'' Awopo atawa, ''Okwame yoihe omona ci inaloo kukwoe.'' Ambene mupulisita ayepo amba, ''Tango tuipule Nyambi kuno.'' ³⁷ Saule ayepo ipula Nyambi, ''Nishupwele Afilisita nji? Kenge owapa mu litunga lya Isilaele nji?'' Unone Nyambi katawile elyo liyuwa. ³⁸ Nehoni Saule ayepo amba, ''Mukeye kuno, mwaheno akakuendisha anu; namufotishishe no kumona ci shivi mwine shinakwamiwa kunu lelo. ³⁹ Mukonda, ko Shinda sha moyo oyu yoya, oyu naamwenanga Isilaele, shanga ci kwa mwanange Jonatani, yoshemwa oli no kufa.'' Ambene kwithsa oyu namutawa kwa anu. ⁴⁰ Nehoni ayepo ambela ana Isilaele wahe ci, ''Muimane ku lineku lyofoci, ne ame na mwanange Jonatani kenge tuimana ku lineku limweya.'' Anu awopo aamba kwa Saule, ''Okwame ei omona ci inaloo kukwoe.'' ⁴¹ Saule ayepo amba, ''Shinda sha moyo, Nyambi wa Isilaele! Ngeci eshi shivi yame nji mwanange Jonatani nashikwama, nehoni, Shinda sha moyo, Nyambi wa Isilaele, onitawe. Ambene ngeci shinakwamiwa ko anu oe ana Isilaele omonishe kengeyo.'' Ne Jonatani na Saule awopo akwatiwa, ambene mashwalale awopo ashiiwa. ⁴² Nehoni Saule ayepo amba, ''Mukaci kange na Jonatani mwanange omonishe ci elye oyu li no mjlandu.'' Nehoni Jonatani ayepo kwatiwa. ⁴³ Nehoni Saule ayepo amba kwa Jonatani, ''Onitongwele ine onakwama.'' Jonatani ayepo mutongwela, ''Kuma nalile tu oki toshoonye no mulamu ou wakalile mu lyoko lyange. Yame ono; Nife.'' ⁴⁴ Saule ayepo amba, ''Nyambi anikwame kengeyo nene, ngeci kofu, Jonatani.'' ⁴⁵ Nehoni anu awopo aamba kwa Saule, ''Jonatani afe, oyu naleta kuyoyishiwa ko kukulu kengeya mu Isilaele? Lelo yakwamahala eyo! Ko Shinda sha moyo oyu yoya, kwithsa lihuki shanga lyofoci lihuki lyenji eli liwela pashi, mukonda onakwama na Nyambi lelo.'' Ne anu awopo ayoyisha Jonatani ne kafile. ⁴⁶ Ne Saule ayepo shiya kushupwela Afilisita, ne Afilisita awopo athza ku litunga lyo. ⁴⁷ Saule apa ashimbile ofumu wo Isilaele, kuma alwile na akwathzimbo yenji wahe ku maneku oahe. Kuma alwile na Amoabi, Amoni, na Edomo, fumu wa Zoba, no Afilisita. Kokuhe oku napilukela kuma nawatweshanga. ⁴⁸ Kuma alwile no ondume oukulu ne ayepo twesha Ameleke. Kuma aamwenine Isilaele ku moko awa awanyangile enu yo. ⁴⁹ Ana a Saule owakwelume neli Jonatani, Ishivi, no Maliki-Shuwa. Mathzina o anenji owambuyama eli neli Merabi, aye mweli, no Milikali. ⁵⁰ Lithzina lya munu wa Saule neli Akinoami; neli mwana Akimaazi. Lithzina lya kukwa kuendisha mashwalale enji neli Abinere mwana Nere, tata wa Saule omuonye. ⁵¹ Kishi neli yoliyo tata wa Saule; ne Nere, tata wa Abinere, neli mwana Abiele. ⁵² Kuma kwakalile mvo thzothzikalu thzo kulwa no Afilisita mu mayuwa a Saule oahe. Saule apa namonanga mukwelume yomuhe o mukolo, nji o mundume, pohuma amushimba.