¹ Samuele ayepo amba kwa Saule, ''Shinda sha moyo kuma anitumine ci nikuweshe opiluke fumu wa anu enji Isilaele. Honi oteelele maywi a Shinda sha moyo. ² Eshi sholiyo aamba Shinda sha moyo omokolo ku enu yoihe, 'Ninabuluka ei akwamine Ameleki kwa ana Isilaele ko kuwakanisha kupita kwali mu likuñwa, apa atundile mu Engepita. ³ Nehoni, othze okalwishe Ameleki ne okaipishe yoihe ei ali nayo. Lelo wawayuvela ñeke, okapae waheno akwelume no ambuyama, anuke no tumbu, ngombe no mangu, tukambe no indongi.''' ⁴ Saule ayepo isha anu ne ayepo watala ku mbongi thza Telaimi- Akwelume 200,000 awa aenda no maulu, no 10,000 akwelume a Juda. ⁵ Nehoni Saule ayepo keya ku mbongi thzo Ameleki ne ayepo watatelela mu lyanda. ⁶ Nehoni Saule ayepo ambela Akeni, ''Muthze, mukatuke, mutunde mukaci ko Ameleki, ci lelo namipaela pofoci no. Mukonda amwe kuma mwamonishile shihemo kwa ana Isilaele apa atundile ku Engepita.'' Ne Akeni awopo atunda kwa Amelaki. ⁷ Nehoni Saule ayepo lwisha Ameleki, kutatekela ku Havila kukakuma ku Shuri, ethzi thzili ku muvo yuwa wa Engepita. ⁸ Nehoni ayepo shimba Agagi fumu wa Ameleki kuyoya; ayepo paelela Anu wahe ko mwele. ⁹ Ambene Saule no anu enji awopo ashiya Agagi, no mangu oawa no ngombe thzo thziwa tunamani tokununa no manguana. Enu yoiwa yoihe kanaipaa. Ambene yoimango nei yokupila okwathsi awopo aipaelela kumana. ¹⁰ Nehoni liywi lya Shinda sha moyo alyopo likeya kwa Samuele, kuamba ci, ¹¹ ''Naliyuva omango ci ninapaka Saule pa ufumu ci avuthse, mukonda onanipa muongo kalo kakwamine ituminino yange.'' Samuele kuma aanjipile; ayepo lililelela kwa Shinda sha moyo oshiku ouhe. ¹² Samuele ayepo pinduka mashikushiku kukaliwana na Saule. Samuele ayepo tongweliwa ci, ''Saule onakumu ku Karimeli ne onalipakelako liwe lyo kuvulukelanga, ne ayepo piluka no kupilela kuulumuka ku Giligali.'' ¹³ Nehoni Samuele ayepo kuma kwa Saule, ne Saule ayepo amba kukwenji, ''Fiyauthzi po thzoe ko Shinda sha moyo! Ninakwama ei nanitumena Shinda sha moyo.'' ¹⁴ Samuele ayepo amba, ''Nehoni ei niyuva mu matwi ange eci mangu aamba ne ine, no kukumbaula ko ngombe niyuva kwa ine? ¹⁵ Saule ayepo tawa, ''Kuma anakaishimba kwa Ameleki. Mungonda anu kuma nashii mangu oawa no ngombe thzo thziwa, ci nakwamene Shinda sha moyo Nyambi oe shitavelo. Imweya yoihe tunamana kupaa.'' ¹⁶ Nehoni Samuele ayepo amba kwa Saule, ''Otelele, nikutongwele ei ananiambela Shinda sha moyo oshiku.'' Saule ayepo amba kukwenji, ''Oambe!'' ¹⁷ Samuele ayepo amba, ''Shanga walimona ci omuonye mu meho oe, kali kuma nokwamiwa muka kuendisha ikuta ya Isilaele? Nehoni Shinda sha moyo onakuweshe ci yowe fumu wa Isilaele, ¹⁸ ne Shinda sha moyo onakutumu no kuamba ci, 'Othze ne okapaelele aka shivi wahe, awo Ameleki, ne okalwe no kutwala apo akapaeliwa wahe.' ¹⁹ Ine onakanena kuyuva liywi lya Shinda sha moyo? Ine no ndandumukela kukanyanga enu no kukwama enu yoimango mu meho a Shinda sha moyo?'' ²⁰ Nehoni Saule ayepo amba kwa Samuele, ''Yoshemwa ninayuvu liywi lya Shinda shamoyo, ne ninathzi oku nanitumu Shinda sha moyo. Ninakashimba Agagi, fumu wa Ameleki, ne ninakapaelela Ameleki wahe. ²¹ Ambene anu woliyo anakashimba imweya ei anakanyanga- mangu no ngombe, yoiwa kwei naipaiwa, ci nakwamena Shinda sha moyo Nyambi oe shitavelo mu Giligali.'' ²² Samuele ayepo tawa, ''Shinda sha moyo ne nga po loela ipiwa no itavelo yo kutumeka eci omu aloele munu yuva maywi a Shinda sha moyo? kuyuva kuwa kupita ipiwa ne kuteelela kuwa kupita maathzi mangu oshokwelume. ²³ Mukonda kukana kuyuva kwalipitula no shivi sho ulothzi, ne kuliyuvishisha kwalipitula no omango no kulombela tumponya. Mukonda onakana liywi lya Shinda sha moyo naye onakukana mu ufumu.'' ²⁴ Nehoni Saule ayepo amba kwa Samuele, ''Ninakwama shivi; mukonda ninacolo shituminino sha Shinda sha moyo no maywi oe, mukonda kuma naniyapa anu ne amepo niyuva liywi lyo. ²⁵ Honi, nalomba otetele ku shivi shange, ne ohuke nange ci nikalombele Shinda sha moyo .'' ²⁶ Samuele ayepo amba kwa Saule, ''Kanihuka noe; mukonda onakana liywi lya Shinda sha moyo, ne Shinda sha moyo onakukana pa ufumu o Isilaele.'' ²⁷ Samuele apa napiluka ci athze, Saule ayepo kwata ku mungundo wo shito shenji, ne ashopo shiyatuka. ²⁸ Samuele ayepo amba kukwenji, ''Shinda sha moyo onayatula ufumu wo Isilaele kukwoe lelo ne onaupa kwa munu onalihata nenji, oyu kupita. ²⁹ Kalo, aye okolo wa Isilaele kaamba ñanda nji kupilula maayalo enji; mukonda kali munu, ci apilule maayalo enji.'' ³⁰ Nehoni Saule ayepo amba, ''Ninakwama shivi. Ambene nalomba onikuteke pa meho o akulu o anu no pa meho o ana Isilaele. Ohuke nange kalo ci nikalombele Shinda sha moyo Nyambi oe.'' ³¹ Ne Samuele ayepo huka kalo na Saule ne Saule ayepo kalombela Shinda sha moyo. ³² Ne Samuele ayepo amba, ''Mulete kuno Agagi fumu wa Ameleki.'' Agagi ayepo keya kukwenji kunangiwa no mawenge ne ayepo amba, ''Yoshemwa lifu lilulu.'' ³³ Samuele ayepo tawa, ''Eci mwele oe omu unakwamena ambuyama kupila ana, ne njinoe naye kenge apila mwana mukaci ka ambuyama.'' Ne Samuele ayepo tetaula Agagi ipintzi pinthzi pa meho a Shinda sha moyo ku Giligali. ³⁴ Samuele ayepo thza ku Rama, ne Saule ayepo thza ku njiyo thzenji ku Gibea wa Saule. ³⁵ Samuele kahukile kunamona Saule kalo shime pa liyuwa lyo kufa kwenji, mukonda kuma alilile Saule. Shinda shamoyo kuma aliyuvile omango ci onapaka Saule pa ufumu o Isilaele.