¹ Shinda sha moyo ayepo amba kwa Samuele, ''Saule kenge omulila shikati shokukuma kupi, ame ninamukana ci akale fumu wa Isilaele? Oyalishe linyia lyoe no oli ne othze. Nakutuma kwa Jese oku Betelehema, mukonda ninalihanguela fumu kwa anenji.'' ² Samuele ayepo amba, ''Kenge nithza ngepi? Saule apa aiyuva, kenge anipaa.'' Shinda sha moyo ayepo amba, ''Oshimbe lilole othze ne oambe ci, 'Ninakeya kunakwamena Shinda sha moyo shitavelo.' ³ Oishe Jese kus shitavelo, ne kenge nikumonisha ei okwama. Oniweshele oyu nikumonisha.'' ⁴ Samuele ayepo kwama omu ambelile Shinda sha moyo ne ayepo thza ku Betelehema. Akulu omu mbongi kuma atutumine apa akeile kunaliwana nenji ne awopo aamba, ''Ci yoto onakeyela?'' ⁵ Ayepo amba, ''Yoto; ninakeyela kunakwamena Shinda sha moyo shitavelo. Mulikenishe ne mukeye ku shitavelo.'' Nehoni ayepo kenisha Jese no anenji ne ayepo waishela ku shitavelo. ⁶ Apa akumine, ayepo tanekela Eliabi ne ayepo liambela yofoci ci yoshemwa muweshiwi wa Shinda sha moyo yoiliyo oyu naimana pa posho thzenji. ⁷ Ambene Shinda sha moyo ayepo amba kwa Samuele, ''Lelo wataneka owa wenji nji ole wenji; mukonda ninamukana. Mukonda mumoneno wa Shinda sha moyo kali woliyo mumoneno wo munu; Munu ataneka owa o mumonahalelo ambene Shinda sha moyo aye ataneka owa o mucima.'' ⁸ Nehoni Jese ayepo isha Abinadabi ne ayepo mupitisha pa posho thza Samuele. Nehoni Samuele ayepo amba, ''Oyu naye Shinda sha moyo kamuhangulile.'' ⁹ Nehoni Jese ayepo pitisha Shama, ambene Samuele ayepo amba, ''Naye oyu kamuhangulile Shinda sha moyo.'' ¹⁰ Jese ayepo pitisha anenji mutanu na eli (7) pa posho thza Samuele. Nehoni Samuele ayepo ambela Jese, ''Kwawa kwithsa oyu anahangula Shinda sha moyo.'' ¹¹ Nehoni Samuele ayepo amba kwa Jese, ''Woliyo anoe owakwelume pohuma awa?'' Ayepo tawa, ''Kwali nashiyala ko yofoci omwanuke kukwo wahe, ambene onathzi ku kulisha mangu.'' Samuele ayepo amba kwa Jese, ''Otume anu akamushimbe; mukonda lelo katukala pashi shime apa akeya kuno.'' ¹² Jese ayepo tuma anu awopo akamuleta. Honi oyo mwana neli mukihu o meho oawa kalo neli muwa. Shinda sha moyo ayepo amba, ''Okatuke, omuweshe; mukonda yoliyo oyu.'' ¹³ Nehoni Samuele ayepo shimba linyia lyo oli ne ayepo muwesha mukaci ko akulwenji. Mupepo wa Shinda sha moyo owopo ukeya kwa Davida kutunda elyo liyuwa. Nehoni Samuele ayepo katuka kuhuka ku Rama. ¹⁴ Honi mupepo wa Shinda sha moyo awopo utunda kwa Saule, ne mupepo oumango kutunda kwa Shinda sha moyo awopo uanjipisha Saule. ¹⁵ Apika a Saule awopo aamba kukwenji, ''Omone honi, mupepo oumango kutunda kwa Shinda sha moyo wakuanjipisha. ¹⁶ Ne ñathsile wetu otumene apikoe awa ali pa posho thzoe ci akafote munu oyu limuka kushika harepa. Nehoni mupepo oumango kutunda kwa Shinda sha moyo apa ukukeyela, pohuma athzishika ne kenge oliyuva shuwana.'' ¹⁷ Saule ayepo ambela apikenji, ''Munifotele munu oyu limuka shuwana kushika ne mumulete kukwange.'' ¹⁸ Nehoni yumweya ku mishumba ayepo tawa, no kuamba ci, ''Ninamono mwana Jese oku Betelehema, oyu limuka kushika, o mukolo, mukwelume o ondume, mukwelume o mvo, oyu limuka kuamba, mukwelume omuwa; kalo Shinda sha moyo oli nenji.'' ¹⁹ Ne Saule ayepo tuma tunganda kwa Jese, no kuamba ci, ''Onitumene mwanoe Davida, oyu li ku mangu.'' ²⁰ Jese ayepo shimba shindongi no kushipaka makende, shitofota sho waine, no kamembeana, ne ayepo ipa mwanenji Davida ci athze nayo kwa Saule. ²¹ Nehoni Davida ayepo kuma kwa Saule ne ayepo kaingena pa posho thzenji. Saule ayepo muhima nene, ne ayepo mupaka muka kushimba ilwisho yenji. ²² Saule ayepo tuma anu kwa Jese, kuamba ci, ''Nalomba ci otawethze Davida aimanange pa posho thzange, mukonda onawana kuhemiwa mu meho ange.'' ²³ Popahe apa mupepo omumango kutunda kwa Shinda sha moyo naukeyela kwa Saule, Davida pohuma ashimba harepa no kuthzishika. Ne Saule pohuma aayuluka no kuliyuva shuwana, ne mupepo oumango pohuma watunda kukwenji.