¹ Samuele apa akulupalile , anenji owakwelume ayepo wapaka aka kuatula ana Isilaele. ² Lithzina lya mwanenji o mweli neli Joele, omushili lithzina lyenji neli, Abija. Neli woliyo aka kuatula o mu Beeresheba. ³ Anenji kanaende mu mulo wenji, unone kuma natwala micima ku lufumo lo kukana kuluka. Kuma natambulanga ipiwa yo kwetu no kuatula iamba omu ikana kuloela. ⁴ Nehoni akulu o Isilaele wahe awopo aliwana pofoci ne awopo akeya kwa Samuele ku Rama. ⁵ Awopo aamba kukwenji, ''Omone, onakulupala, ne anoe kaende mu mulo woe. Otuhangwele fumu oyu tuatula eci matunga amweya.'' ⁶ Unone Samuele kuma naipela anu apa naamba ci, ''Otupe fumu o kutuatula.'' Ne Samuele ayepo lombela kwa Shinda sha moyo. ⁷ Shinda sha moyo ayepo amba kwa Samuele, ''Otawe liywi lya anu mu enu yoihe akutongwela; mukonda kakukanine, unone yame anakana ci nikale fumu wo. ⁸ Enu ei anakwamanga kutunda liyuwa nawatundishile mu Engepita- kunishiya no kukwamena athzimu ao- pano honi aikwama no kukwoe. ⁹ Honi oteelele ei aamba; unone owape mamela thzo thzikulu ne owatongwele omu akuwaendishela oyo fumu. ¹⁰ Ne Samuele ayepo tongwela anu awa alombile fumu maywi a Shinda sha moyo oahe. ¹¹ Ayepo amba, ''Ou woliyo muendishelo wa fumu oyu wakumiendisha. Kenge akushimba anenu kuwapaka kukwama ku makoloi enji no kuwapaka aka kuthzina tukambe twenji, no kundaumuka pa posho thzo makoloi enji. ¹² Kenge alihangwela aka kuendisha anu okukuma ita makumi na makumi na aka kuendisha anu okukuma pa makumi mutanu na mutanu. Wamweya kenge awapaka kukekela ilwa yenji, wamweya kuyanga ei analimi, ne wamweya kenge awapaka kukwama ilwisho yo mu mvo no ikwamisho yoku koloi thzenji. ¹³ Kenge akushimba anenu owambuyama kuwakwama aka kukwama maathzi okunuka otowi, kukwakwama aka kumupondela, no kumuluvela makende. ¹⁴ Kenge ashimba ilwa yenu yoiwa, yo veine, nei yo itondo yo olive, no kuipa apikenji. ¹⁵ Kenge ashimba shofoci ku enu likumi kwei munayanga mu ilwa yenu nei yo mu ilwa yenu yo veine no kuipa aka kumukwamena na apikenji. ¹⁶ Kenge akushimba apikenu owakwelume nawa owambuyama no ngombe thzenu thzothziwa no indongi yenu yoiwa; kenge akuipaka ci imukwamenange. ¹⁷ Kenge akushimba shofoci kwei yolikumi ku imunanu yenu, ne amwe kenge mwa kupiluka apikenji. ¹⁸ Nehoni apo liyuwa elyo kenge mwakulila mukonda o fumu oyu munalihangulela amwe mwahsinda; unone Shinda sha moyo ka kumitawa apo liyuwa elyo.'' ¹⁹ Unone anu awopo akana kuteelela kwa Samuele awopo aamba, ''Kwahi! kukale fumu oyu tuendisha ²⁰ ci natwe tulipitule eci matunga amweya, ne kalo fumu wetu atuatule no kutuenda ku posho kulwa mvo thzetu.'' ²¹ Samuele apa ayuvile oahe maywi a anu ayepo hukela kuwatongwela mu matwi a Shinda sha moyo. ²² Shinda sha moyo ayepo amba kwa Samuele, ''Oyuve maywi o ne owape fumu awaendishe.'' Ne Samuele ayepo amba kwa ana Isilaele ci, ''Munu no munu athze ku mbongi thzenji.''