¹ Akwelume oku Kiriyati Jearimi awopo akeya, kunashimba aleka thza Shinda sha moyo, no kuthzileta mu njiyi thza Abinadabi pa mukinya. Awopo ahangula mwanenji o mukwelume o lithzina lyo Eliazare ci anyunge aleka thza Shinda sha moyo. ² Kutunda liyuwa thzkashiyalile aleka mu Kiriyati Jearimi, kwapitile shikati shoshile, myaka makumi eli(20). Aka njiyo thza Isilaele wahe awopo alililela kwa Shinda sha moyo ci ahuke kukwenji. ³ Samuele ayepo ambela aka njiyo thza Isilaele wahe, ''Ngeci mwafota kuhuka kwa Shinda sha moyo no micima thzenu thzothzihe, mutundishe athzimu oku matunga ao no Ashitaroti mukaci kenu, muhushe micima thzenu kwa Shinda sha moyo, ne mulombele aye pohuma, nehoni kenge amiamwena ku moko aka Filisita.'' ⁴ Nehoni ana Isilaele awopo atundisha Baale no Ashitaroti, ne awopo alombela Shinda sha moyo pohuma. ⁵ Nehoni Samuele ayepo amba, ''Muwaneka ana Isilaele wahe ku Mizipa, ne kenge nimilombelela kwa Shinda sha moyo.'' ⁶ Awopo aliwana ku Mizipa, awopo aveta meyu no kuamwaela pa posho thza Shinda sha moyo. Elyo liyuwa awopo aliyumena yo kulya no kuamba ci, ''Tunakwama shivi kwa Shinda sha moyo.'' Oko koliyo oko Saamuele aka atulelile ana Isilaele no kuendisha anu. ⁷ Honi aka Filisita apa ayuvile ci ana Isilaele analiwana ku Mizipa, Aka kuendisha aka Filisita awopo alwisha Isilaele. Ana Isilaele apa ayuvile kengeyo, awopo ayapa aka Filisita. ⁸ Nehoni ana Isilaele awopo aamba kwa Samuele, ''Lelo washiya kutulombelela kwa Shinda sha moyo Nyambi wetu, ne kenge atuamwena ku moko aka Filisita.'' ⁹ Samuele ayepo shimba linguana liyamwa ayepo likwama shitavelo sho kutumeka shoshihe kukwamena Shinda sha moyo. Nehoni Samuele ayepo lombela kwa Shinda sha moyo kulombelela Isilaele, ne Shinda sha moyo ayepo mutawa. ¹⁰ Samuele apa nakwama shitavelo sho kutumeka kengeyo, aka Filita awopo ahenyena kunalwisha Isilaele. Unone Shinda sha moyo ayepo vuma no liywi lyoshokulu kulwisha aka Filisita no kuwaletela kulyangana, ne awopo acila pa posho thza Isilaele. ¹¹ Akwelume o Isilaele awopo atunda ku Mizipa, ne awopo ashupwela aka Filisita no kukawapaela mushi thzo Beti kara. ¹² Nehoni Samuele ayepo shimba liwe no kulipaka mukaci ko Mizipa no Sheni. Ayepo lita lithzina lyo Ebenezere, ko kuamba ci, ''Omu moliyo anatukwathsale Shinda sha moyo.'' ¹³ Ne aka Filisita awopo atweshiwa ne kanahukela kuingena maenje a Isilaele. Lyoko lya Shinda sha moyo kuma nalilwisha aka Filisita mayuwa a Samuele oahe. ¹⁴ Mambongi ashimbile aka Filisita kwa ana Isilaele aopo ahusheliwa kwa Isilaele, kutunda ku Ekroni kuthza ku Gati; ana Isilaele awopo ahusha litunga lyo kutunda kwa aka Filisita. Nehoni kwalile kuliyala mukaci ka Isilaele no Amori. ¹⁵ Samuele ayepo atula Isilaele mu mayuwa enji o kuyoya oahe. ¹⁶ Mwaka no mwaka kuma napitulukanga ku Betele, ku Giligali, no ku Mizipa. Kuma naatulanga ana Isilaele awa nakalanga momuhe omo mu ivaka. ¹⁷ Nehoni pohuma ahuka ku Rama, mukonda koliyo nakukala njiyo thzenji; nako kalo kuma naatulanga ana Isilaele awa nakalanga ko. Kalo ayepo umbela Shinda sha moyo aletare.