¹ Honi aleka thza Shinda sha moyo kuma thzakalile mu litunga lya Afilisita maonda mutanu na eli. ² Nehoni aka Filisita awopo aisha apulisita na aka kuuka; awopo aamba kokwo, ''Kenge tukwama ngepi aleka thza Shinda sha moyo? mututongwelel omu tuthzihushela ku litunga lyathzo.'' ³ Apulisita na aka kuuka awopo aamba, ''Ngeci mwahusha aleka thza Nyambi o Isilaele, lelo mwathzihusha ko kupila shipiwa; mukwame omu mutweshela mumutumene shitavelo sho kukula mulandu. Nehoni kenge mupolishiwa, ne kenge mulimuka ci shiñe lyoko lyenji linakanena kumishiya kukuma no pano.'' ⁴ Nehoni awopo aamba, ''Shitaveli mwaiñe sho kukula mulandu tumuhushela? Awopo atawa, ''Mihonyamba thzo gauda mutanu no muku thzo gauda mutanu, mutanu kuthza ko apa akuma aka kuendisha aka Filisita. Mukonda kukola kuli kukwenu kofoci no kukola kuli kwa aka kumiendisha. ⁵ Ne mukwame ikupulo yo mihonyamba thzenu, no ikupulo yo muku ethzi thziipisha litunga, ne mushangale Nyambi o Isilaele. Nahimigwa kenge atundisha lyoko lyenji kukwenu, kulitundisha kwa athzimu enu noku litunga lyenu. ⁶ Shiñe mukolopishela micima thzenu, eci akwa Engepita na Faro omu akolopishelile micima thzo? Apo poliyo Nyambi o Isilaele apa akwameneni enu yo kukomokisha nene kukwo; akwa Engepita kanatawethza anu ci athze, ne awopo athza?'' ⁷ Nehoni, muloishe shikocikala sho shipe no itole ili ei iyamwisha ei ishime kupaniwa. Mupane eyo itole ku shikocikala, unone mutwale tunamani twayo ku lyumbo, kututundisha kukwayo. ⁸ Mushimbe aleka thza Shinda sha moyo muthzipake mu shikocikala, ne mupake ikupulo yo gauda, ei mumuhushela ci shitavelo sho mulandu, mu pongisi ku nyonga nathzo. Muthzitume ne muthzishihiye thzithze thzofoci, unone muthzitanekele. Ngeci kenge thzikanduka likuñwa lithza ku litunga lyathzo kupitela ku Beti Shemeshi, nehoni kenge tulimuka ci Shinda sha moyo yoliyo natuletela ou ukalu oukulu nene. ⁹ Unone ngeci kathzikwama kengeyo, kenge tulimuka ci kali lyoko lyenji eli linatuletela okalu; kuma nailikwamahalela pohuma.'' ¹⁰ Nehoni akwelume awopo akwama eci eli natongweliwa; awopo ashimba itole ili ei iyamwisha, kuipana kushikocikala, ne awopo ahusha tunamani twayo ku liyumbo. ¹¹ Awopo apaka aleka thza Shinda sha moyo mu shikocikala, pofoci no pongisi omu kuli muku thzo gauda no ikupulo yo mihonyamba. ¹² Itole ayopo ilithzela mu likuñwa eli lipitela ku Beti Shemeshi. Ayopo ithza mu likuñwa lyo shokulu, yaenda ko ikumbaula, ne kanaitundu mu likuñwa kuthza kwako kuthza kushilyo nji kuthza ku shimoho. Aka kuendisha aka Filisita wopo a aishupwela kukakuma ku maenji a Beti Shemeshi. ¹³ Honi anu oku Beti Shemeshi kwayanga uloto mu lyanda. Apa ayelulile meho o ne awopo amona akeka, awopo aloela. ¹⁴ Shikocikala ashopo shikeya mu shilwa sha Joshuwa kutunda mu mbongi thza Beti Shemeshi no kunemana mo. Kuma kwakalile liwe lyoshokulu, ne awopo ayataula itondo yo shikocikala, ne itole ayopo aikwamena Shinda sha moyo shitavelo sho kutumeka. ¹⁵ Alivi awopo atundisha aleka thza Shinda sha moyo no pongisi ethzi thzakalile nathzo, omu kwakalile ikupulo yo gauda, ne awopo aipaka pa liwe lyoshokulu. Akwelume oku Beti Shemeshi awopo akwamena Shinda sha moyo itavelo yo kutumeka no nupu omo mu liyua elyo. ¹⁶ Aka kuendisha aka Filisita o mutanu apa amonine eyo, elyo liyuwa mwene awopo ahuka ku Ekroni. ¹⁷ Ei yoliyo ikupulo yo mihonyamba thzo gauda ethzo aka Filisita ahushile ci ipiluke itavelo yo mulandu kwa Shinda sha moyo- shofoci ku Ashidodi, shofoci ku Gaza, shofoci ku Ashikeloni, shofoci ku Gati, ne shofoci ku Ekroni. ¹⁸ Muku thzo gauda kuma nathziendelela no mambongi aka Filisita aa aendishiwa kowa aendishi mutanu, kuvandakana mambongi anaumbeliwa ipatango no maumbo pohuma. Liwe lyoshokulu, oku apakile aleka thza Shinda sha moyo lyoliyo upaki kunakuma no lelo mu shilwa sha Joshuwa oku Beti Shemeshi. ¹⁹ Shinda sha moyo ayepo fula akwelume amwaye oku Beti Shemeshi mukonda kuma atanekile mu aleka thza Shinda sha moyo. Ayepo paa akwelume okukuma pa 70. Anu awopo alila, mukonda Shinda sha moyo onapaa anu owangi. ²⁰ Akwelume oku Beti Shemeshi awopo amba, ''Elye twesha kuimana pa meho a Shinda shamoyo, oyu Nyambi okukena? Aleka kenge thzipiluka thzalye apa thzitunda kukwetu?'' ²¹ Awopo atuma tunganda kwawa anatungu mu Kiriyati Jearimi, kuamba ci, ''Aka Filisita anahusha aleka thza Shinda sha moyo; mukeye na muthzilishimbele.''