¹ Honi aka Filisita awopo ashimba aleka thza Nyambi, no kuthzindundisha ku Ebenezere kuthzitwala ku Ashidodi. ² Aka Filisita awopo ashimba aleka thza Nyambi, kuthzileta mu njiyo thza Dagoni, no kuthzipaka ku nyonga thza Dagoni. ³ Liyuwa lyahatile ko anu omu Ashindodi apa apindukile mashikushiku, mumone, Dagoni onawishela lupala lwenji pashi pa posho thzo aleka thza Shinda sha moyo. Ne awopo ashimba Dagoni no kumuhushela mu Shivaka shenji kalo. ⁴ Unone apa apindundikile mashikushiku o liyuwa lya hatile ko, mumone, Dagoni onawishela lupala lwenji pashi pa posho thzo aleka thza Shinda sha moyo. Mutwi wa Dagoni no moko enji eli oku anatundu kwanalihanda mu shelo. Kushiyala pohuma muili. ⁵ Sholiyo shileta ci, shanga lelo, mapulisita a Dagoni no munu yomuhe oyu ingena mu njiyo thza Dagoni kalyata pa shelo thza Dagoni mu Ashidodi. ⁶ Lyoko lya Shinda sha moyo kuma nalilemena anu omu Ashidodi. Ayepo wepisha no kuwakolisha mihonyamba, wowahe kutatekela mu Ashidodi kutwala noku ivaaka ili ku maenja o Ashidodi. ⁷ Akwelume omu Ashidodi apa amonine ei naikwamahala, awopo amba, ''Aleka thza Nyambi wo Isilaela kathzitawa kukala netu, mukonda lyoko lyenji likalu kukwetu noku kwa Dagoni muthzimu wetu.'' ⁸ Ne awopo atuma anu kukaisha no kuwaneka pofoci aka kuendisha O aka Filisita; awopo awaambela ci, ''Kenge tukwama ngepi aleka thza Nyambi wo Isilaele?'' Awopo atawa, ''Aleka thza Nyambi wo Isilaele thzitwaliwe ku Gati.'' Ne awopo ashimba aleka thza Nyambi wo Isilaele kuthzitwala ko. ⁹ Unone munyima o kuthzitwala ko, lyoko lya Shinda sha moyo alyopo lileta okalu omo mu mbongi, kuwaletela muyoyo oukulu. Ayepo fula akwelume omu mbongi, owaonye nowa owakulu; ne wopo akola mihinyamba. ¹⁰ Ne awopo atwala aleka thza Nyambi ku Ekroni. Unone aleka thza Nyambi apa thzakumine mu Ekroni, aka Ekroni awopo akuwelela, kuamba ci, ''Analeta aleka thza Nyambi wo Isilaele kukwetu kunatupaa atwe na atu etu.'' ¹¹ Ne awopo atuma anu kukaisha no kuwaneka pofoci aka kuendisha o aka Filisita; awopo amba kukwo, ''Mutwale aleka thza Nyambi o Isilaele, ne muthzihushe mu shivaka shathzo, ne ci thzatupaa atwe na anu atu.'' Mukonda kuma kwakalile kufa mu mbongi thzothzihe; lyoko lya Nyambi kuma lyawalemenine nene. ¹² Akwelume awa akanine kufa awopo akola mihonyamba, ne kulila ko mbongi okopo kukakuma kuwilu.