¹ Liywi lya Samuele alyopo likuma kwa ana Isilaele wahe. Honi ana Isilaele awopo athza kukalwisha aka Filisita. Awopo akwama shilombo ku Ebenezere, ne aka Filisita awopo akwama shilombo ku Afeki. ² Aka Filisita awopo akeya kunemana mundandwe kulwisha Isilaele. Apa alwile ethzo mvo, aka Filisita awopo atwesha Isilaele, awopo apaa akwelume okukuma pa 4000 kwawa akalile pa lilwelo. ³ Anu apa ahukile ku shilombo, akulu o Isilaele awopo aamba ci, ''Shiñe esho Shinda sha moyo eshi anatuwishelela lelo pa meho aka Filisita? Tukashimbenu aleka thzo umbusha thza Shinda sha moyo ku Shilo, ci nathzikale kuno netu, ci nathzituamwene ku moko akwaethzimbo yetu.'' ⁴ Ne anu awopo atuma akwelume ku Shilo; awopo akashimba aleka thzo umbusha thza Shindaa sha moyo o mvo, oyu nakala peulu thzo makerubimi. Ana Eli owakwelume eli, Hofini na Finehasi, kuma akalile no aleka thzo umbusha wa Nyambi. ⁵ Aleka thzo umbusha thza Shinda sha moyo apa thzakumine mu shilombo, ana Isilaele wahe awopo ahumwelela nene ko kunyanyuka, ne kaye akopo kabuma. ⁶ Aka Filisita apa ayuvile muyoyo o kuhumwelela ko kunyanyuka, awopo aamba, ''Otu tuhumu humu to kunyanyuka kokukulu kuli mu shilomba sha akwa Heveru kwa ine?'' Nehoni awopo ayuva ci aleka thza Shinda sha moyo thzinakeya mu Shilombo. ⁷ Aka Filisita awopo ayapa; awopo aamba, ''Muthzimu onakeya mu shilombo.'' Awopo amba, ''Kuvindama kwetu! Yokengeya ishime kukwamahala! ⁸ Kuvindama kwetu! Elye tuamwena ku okolo wawa athzimu owakolo? Awa woliyo athzimu awa nalwisha akwa Engepita ko tushitiko to kulishiyashiya mu mumbulwa kukutu. ⁹ Mukale no ondume, ne piluke akwelume, amwe aka Filisita, ci mwapiluka apika o Aheru, eci awo eli anapiluka apikenu. Mupiluke akwelume, ne mulwe.'' ¹⁰ Aka Filisita awopo alwa, ne Isilaele ayepo tweshiwa. Mukwelume no mukwelume ayepo cilela ku tende thzenji, ne kupaiwa neli kukulu nene; mukonda kuma nakupaiwa akwelume okukuma pa 30 000 kwa ana Isilaele. ¹¹ Aleka thza Shinda sha moyo athzopo thzishimbiwa, no ana eli a Eli, Hofini na Finehasi, awopo afa. ¹² Mukwelume yumweya o shikuta sha Benjamine ayepo ndandumuka kutunda oku alwelelile kuthza ku Shilo mu liyuwa elyo mwene, ayepo kakuma ito yenji ko inayatauka no likungu ku mutwi. ¹³ Apa akakumine, Eli kona kala mu shipula shenji kunyionga no likuñwa kona tatelela mukonda mucima wenji kuma watutumine kulishoshomwa aleka thza Nyambi. Mukwelume apa aingenine mu lyumbo no kuwatongwela iamba, lyumbo lyolihe alyopo lila. ¹⁴ Eli apa ayuvile muyoyo o kulila, ayepo amba, ''Owo muyoyo waine?'' Wangu wangu oyo mukwelume ayepo keya kunatongwela Eli. ¹⁵ Honi Eli kuli no makumi mutanu no makumi ane no myaka mutanu na thzihatu thzo kuelekiwa(98); meho enji kwanakulupala no kukana kumona shuwana. ¹⁶ Mukwelume ayepo ambela Eli, ''Yame nitunda ku mvo. Ninacili ku mvo lelo.'' Eli ayepo amba, ''Kunakaenda ngepi mwanange?'' ¹⁷ mukwelume oyu nalete iamba ayepo tawa no kuamba ci, ''Isilaele onacili kwa aka Filisita. Kalo, kunakala kupaiwa ko kukulu nene. Kalo, anoe eli, Hofini na Finehasi, anafu, no aleka thza Nyambi thzinashimbiwa.'' ¹⁸ Apa atoyile aleka tha Nyambi Eli ayepo wa futanyima mu shipula shenji kunyonga thzo shelo. Thsingo thzenji athzopo, ne ayepo fa, mukonda kuma akulupalile no kulema. Kuma atulile Isilaele pa myaka makumi ane(40) ¹⁹ Honi ngumwenyenji, munu wa Finehasi kuli no lila ne kuli popepi no kueleka. Apa ayuvile ci aleka thza Nyambi thzinashimbiwa kalo hemwenyenji no munu wenji anafu, ayepo kinyama no kueleka, unone kukola ko kueleka akopo kumukulela. ²⁰ Mu shikati afotile kufa ambuyama awa amuelekishile, awopo aamba, Lelo wacila onaeleka mwana o mukwelume.'' Unone katawile nji kutwala mucima kwei amutongelile. ²¹ Ayepo ta mwanuke lithzina lyo Ikabodi, kuamba ci ''Kutethzima kunathzi kutunda kwa Isilaele!'' Mukonda aleka thza Nyambi thzinashimbiwa, kalo mukonda o hemwenyenji no munu wenji. ²² Ayepo amba, ''Kutethzima kunathzi kutunda kwa Isilaele, mukonda aleka thza Nyambi thzinashimbiwa.''