¹ Akopo kukwamahala ci, Davida no anu enji apa akumine mu Zikilagi pa liyuwa lyomushihatu, Ameleke awopo akundawela kulwisha Negevi no Zikilagi. Awopo alwisha mbongi thzo Zikilagi, no kuthzitumeka, ² ne awopo akwata ambuyama no anu wahe awa akalile mo, owaonye nawa owakulu wahe. Kwithsa oyu apaile, ambene kuma awashimbile kuthza no apa ahukile. ³ Davida no anu enji apa akumine mu mbongi, anathziwana ci thzinapi, ne anu wo, ano owakwelume, no ano owambuyama anashimbiwa kukamuniwa. ⁴ Nehoni Davida no anu akalile nenji awopo mbolomoka kulila kupitela apa okolo o kulila nauwapwela. ⁵ Anu a Davida eli kuma nashimbiwa kukamuniwa, Akinoami mbuyama oku Jezireele, no Abigaili munu wa Nabali oku Karimeli. ⁶ Davida ayepo lishoshomwa nene, mukonda anu kuma afungulukile ci apovaule no mawe, mukonda anu wahe kuma anjipile nene mu mupepo, munu no munu kulila anenji owakwelume no anenji owambuyama; ambne Davida ayepo litanalisha ko Shinda sha moyo, Nyambi wenji. ⁷ Davida ayepo amba kwa Abiatare mwana Akimeleki, mupulisita, ''Nakulomba, olete efoda kuno kukwange .'' Abiatare ayepo leta efoda kwa Davida. ⁸ Davida ayepo lombela kwa Shinda sha moyo ci amumonishe yokukwama, kuambaci, ''Apa nishupwela awa mashwalele kenge niwawana nji?'' Shinda sha moyo ayepo mutawa, ''Owashupwele, mukonda shemwa kenge owawana, ne kenge shemwa ohusha enu yoihe.'' ⁹ Ne Davida ayepo thza, aye no akwelume ita makumi mutanu na shofoci (600) awa akalile nenji; awopo akuma ku kawaana ko Besora, oku akalile awa ashiyalile munyima. ¹⁰ Ambene Davida ayepo thza posho kushupwela, aye no akwelume okukuma pa ita ine (400); mukonda okukuma pa ita ili (200) awo kuma akalile kunyima, awa akalile no uva ne katweshile kuyavuka kawaana ko Besora. ¹¹ Awopo awana mukwa Engepita mu muhonyi ne awopo amuleta kwa Davida; awopo amupa ishima, ne ayepo lya; awopo amupa meyu o kunwa, ¹² kalo awopo amupa mbalawila thzo likende lyo feiga no mitwi thzili thzo feiga. Apa amanine kulya, ayepo wana okolo, mukonda kanali eshima nji kunwa meyu mu mayuwa ahatu no mashiku ahatu. ¹³ Davida ayepo amba kukwenji, ''Omunu walye? Watundu kupi?'' Ayepo aamba, ''No mushumba oku Engepita, mupika wa Mumeleki; ñathsile wange nanishii mukonda kuma nanikolo mu mayuwa ahatu anapiti. ¹⁴ Kuma natukalwisha Negevi oku litunga lya Akereti no ku Juda, no Negevi wa Kalebu, kalo natutumeka Zikilagi. ¹⁵ Davida ayepo amba kukwenji, ''Kenge otwesha kunitwala oku kuli mashwalale?'' Mukwa Engepita ayepo aamba, ''Oliethze kukwange ko Nyambi ci kowakunipaa nji kunipiteka mu mooko a ñathsile wange, ne kenge nikutwala oku kuli mashwalale.'' ¹⁶ Mukwa Engepita apa aletile Davida, mashwalale wahe kwanalihanda mu litunga lyolihe, kwalya no kunwa no kukina mukonda o lufumo olu nashimbi mu litunga lya Afilisita no mu litunga lya Juda. ¹⁷ Davida ayepo walwisha kutateka luula kutwala lungulo lo liyuwa lyahatileko. Kwithsa munu oyu wapandukile shime mishumba ita ine (400), awa athzinine pa tukambe no kucila. ¹⁸ Davida ayepo husha lufumo loluhe olu ashimbile Ameleki; ne Davida ayepo amwena anu enji eli. ¹⁹ Kwithsa eshi nashitundupo, shianga sho shionye nji sho shikulu, shianga ana owakwelume nji owambuyama, shianga lufumo nji shinu shoshihe eshi ashimbile aka kulwisha. ²⁰ Davida ayepo husha inu yoihe. Davida ayepo shimba mangu no ngombe, eyo anu apitelishile posho o emunanu imweya. Awopo aamba, ''Olu lufumo po lwa Davida.'' ²¹ Davida ayepo kuma kwa akwelume ita ili (200) awa avapile kumushupwela, awa atongwelile angenjo ci ashiyale ku kawaana ko Besora. Awa anu awopo ashanbawela Davida no anu awa akalile nenji. Davida apa akumine kwawa anu, ayepo wavumenenena. ²² Nehoni wahe akwelume owamango no kupila okwathsi awa athzile na Davida awopo aamba, ''Mukonda awa anu kanathzi netu, katuwapu kwei tunakashimba. Shime pohuma, munu no munu kenge ashimba munu wenji no anenji ne athze noo. ²³ Nehoni Davida ayepo amba, ''Lelo mwakwama kengeyo, apange, ko eshi anatupa Shinda sha moyo. Onatunyungu ne onatupa mu moko etu waya mashwalale tulwisha. ²⁴ Elye miteelela omu mu shiamba eshi? mukonda omu awanena oyu nathzi kumvo, moliyo awanena naye oyu nanyungu itenga; kenge awana ne kenge awana kukumisha pofoci.'' ²⁵ Akopo kukala kengeyo kutunda elyo liyuwa kuleta no lelo pano, mukonda Davida kuma aukwamine mualo no mwikalelo mu Isilaele. ²⁶ Davida apa akumine ku Zikilagi, ayepo tumena lufumo lumweya kwa akulu oku Juda, kwa ambushenji, kuamba ci, ''Mumone, shipiwa shenu eshi kutunda ku lufumo lunakashimbiwa kwa ekwathzimbo ya Shinda sha moyo.'' ²⁷ Kalo ayepo tumena lufumo lumweya kwa akulu awa akalile mu Betele, noku kwawa akalile mu Ramoti oku mboela, noku kwawa akalile mu Jatire, ²⁸ noku kwawa akalile mu Aroera noku kwawa akalile mu Sifimoti, noku kwawa akalile mu Eshitamoa. ²⁹ Kalo ayepo tumena lufummo lumweya kwa akulu akalile mu Rakali, noku kwawa akalile mu mambongi o Ajerashimeele, noku kwawa akalile mu mambongi o aka Kanana, ³⁰ noku kwawa akalile mu Horima, noku kwawa akalile mu Bora Ashani, noku kwawa akalile mu Ataki, noku kwawa akalile mu Heburoni, ³¹ no ku ivaka yoihe oku akalile Davida no anu enji.