¹ Honi Afilisita awopo awaneka pofoci mashwalale oo wahe ku Afeki, ne ana Isilaele awopo aumba shilombo kunyonga no meyu oku mbwaluka mu muve aa ali mu Jereele. ² Ana o mafumu o Afilisita awopo apita ko owangi angi nene; Davida no anu enji awopo apita munyima kwa nyunga Akishi. ³ Nehoni ana o mafumu o Afilisita awopo aamba, ''Awa Aheberu akwama iñe kuno? Akishi ayepo amba kwa ana o mafumu o Afilisita wamweya, ''Kali Davida oyu, mupika Saule, fumu o Isilaele oyu nakala nange aa mayuwa, nji ethzi myaka, ne kanimonine omango kukwenji kutunda apa nakeyela kukwange kunakuma no lelo?'' ⁴ Ambene ana o mafumu o Afilisita kuma amuanjipelile nene ne awopo aamba, ''Ohushe oyu mukwelume, ci ahuke ku shivaka eshi wamupile. Kakuthza netu ku mvo, mukonda kenge akatualukela mu shikati sho kulwa. Mukonda ngepi nga atweshela kuhuka kwa ñathsile wenji ngeci kali shime ko kutetaula mitwi thza anu etu? ⁵ Kali yoliyo Davida oyu anembi mu membo munu na mungenjenji kwa kina, kuamba ci, 'Saule onapa enji owangi, ne Davida onapaa owangi nene'?'' ⁶ Nehoni Akishi ayepo isha Davida no kumuambela ci, ''Ko Shinda sha moyo oyu yoya, onakala shuwa nange, ne kuthza koe no kwiya koe nange ku mashwalale kunaloo mu meho ange; mukonda kanimonine omango kukwoe kutunda apa nokeyela kukwange kunakuma no lelo. Shanga kengeyo ana o mafumu kakuhimine. ⁷ Nehoni ohuke ko kuliyala ci waanjipisha ana o mafumu o Afilisita.'' ⁸ Davida ayepo amba kwa Akishi, ''Ambene iñe ninakwama? Iñe onamono yoimango kwa mupikoe mu mayuwa oahe ninakala noe kunakuma lelo ci lelo nathza ku kulwa na akwethzimbo ya ñathsile wange fumu?'' ⁹ Akishi ayepo tawa no kuambela Davida, ''Nalimuka ci koli no mulandu mu meho ange eci liñeloi lya Nyambi. Shanga kengeyo, ana o mafumu o Afilisita anaamba ci, 'Lelo athza netu ku mvo.' ¹⁰ Nehoni peunja omeneke mashikushiku no apika a ñathsile woe awa anakeya noe; ne apa mupinduka mashikushiku ne kushimonahala pohuma mwethzi, pohuma muthze.'' ¹¹ Ne Davida ayepo pinduka mashikushiku, aye no anu enji, kukatuka mashikushiku, kuhuka mu litunga lya Afilisita. Ambene Afilisita awopo athza ku Jezireele.