¹ Honi Afilisita awopo alwa na aka Isilaele. Akwelume o aka Isilaele awopo cila kutunda kwa Afilisita ne awopo awela pashi kwafa pa mukinya o Giliboa. ² Afiiisita awopo acithza Saule na anenji nene. Afilisita awopo apaa Jonatani, Abinadabi, Maliki-Shua, anenji. ³ Mvo athzopo thzikolopela nene Saule, ne akwelume o mingamba awopo amukunupa mikili. Kuma ayuvile nene kukola mukonda o mikili ethzi amukunupile. ⁴ Nehoni Saule ayepo ambela mukwa kumushimbela ilwisho yenji, ''Ohomone mwele oe mu ndalo ne onipae. Apa okana kukwama kengeyo, awa anu okukana kuthza ku mukanda kenge nanipaa no kunipopa.'' Ambene oyo muka kumushimbela ilwisho kakwamine kengeyo, mukonda kuma ayapile nene. Ne Saule ayepo shimba mwele no kulihuwela ko aye shinda. ⁵ Muka kushimba ilwisho apa amonine ci Saule onafu, naye po lihuwela pa mwele wenji ne ayepo fa nenji. ⁶ Ne Saule ayepo fa, anenji owakwelume ahatu, no muka kushimba ilwisho yenji- awa akwelume wahe kuma afelelile pofoci elyo liyuwa. ⁷ Akwelume o aka Isilaele awa atungile ku sambwa limweya lyo lyanda, nawa akalile musambwa lyo Jodani, apa amonine ci akwelume o aka Isilaele anacili, ne ci kalo Saule no anenji anafu, awopo ashiya mambongi o no kucila, ne Afilisita awopo akeya no kunatunga mo. ⁸ Liyuwa lyahatileko, Afilisita apa akeile kunatundisha ito awa afile, awopo nawana ci Saule no anenji ahatu anawela pa mukinya o Giliboa. ⁹ Awopo ateta mutwi wenji no kumutundisha ikoveyo yenji yo mvo, ne awopo atuma tunganda mu litunga lyo Afilisita lyolihe kutwala iamba ku matempele o athzimu oo no ku anu wahe. ¹⁰ Awopo apaka ilwisho yenji mu tempele thzo ashitoreti, ne awopo apaka shivimbi shenji pa shipaka sho mbongi thzo Beti shani. ¹¹ Anu awa natungu mu Jebeshi Gileadi apa ayuvile ei akwamine Afilisita kwa Saule, ¹² wahe akwelume o mvo awopo akatuka ne awopo athza kuenda ushiku ouhe ne awopo akashimba shivimbi sha Saule no ivimbi ya anenji ahatu kuitundisha pa shipaka sho mbongi thzo Beti shani. Awopo athza ku Jebeshi awopo akaitumekela ko. ¹³ Nehoni awopo ashimba ishoko yo no kukaivumbeka mushi thzo shitondo sho tamarisike ku Jeveshi, ne awopo aliyumena yo kulya mu mayuwa mutanu na eli (7).