¹ Anu oku Zifi awopo akeya kwa Saule ku Gibea ne awopo aamba, ''Kali Davida po onaholama ku mukinya wa Hakila, ou uli posho thza Jeshimoni? ² Nehoni Saule ayepo katuka kuulumuka ku mumbulwa kukutu wa Zifi, na akwelume awa nahanguliwa mu Isilaele awa akuma pa 3000, kukafota Davida mu mumbulwa kukutu wa Zifi. ³ Saule ayepo umba shilombo pa mukinya wa Hakila, ou uli pa posho thza Jeshimoni, kunyonga no likuñwa. Ambene Davida kuma nakalanga mu mumbulwa kukutu, ne kuma amonine ci Saule akeya kunamufota mu mumbulwa kukutu. ⁴ Ne Davida ayepo tuma tunganda ne ayepo yuva ci yoshemwa Saule oneya. ⁵ Davida ayepo katuka kuthza kushivaka oku akwamine Saule shilombo; ayepo mona apa analala Saule no Abinere mwana Nere, muendishi wo mashwalale enji; Saule kuma nalala mu shilombo, ne anu kuma aumbile matende kumupaka mukaci wahe kwanalala. ⁶ Ne Davida ayepo amba kwa Akimeleki oku Hiti, no Abishai mwana Zeruya, mina Joabi, ''Elye thza nange kwa Saule mu shilombo?'' Abishai ayepo aamba, ''Yame! Kenge nithza noe.'' ⁷ Ne Davida na Abishai awopo athza ku mashwalale oshiku. Saule kwakalile kunalala mukaci ko shilombo no ñothzi thzenji kunathzishishi mu muve ku mutwi wenji. Abinere no mashwalale enji kwanalala kumupaka mukaci. ⁸ Nehoni Abishai ayepo amba kwa Davida, ''Lelo Shinda sha moyo onapaka mukwa shithzimbo shoe mu lyoko lyoe. Honi nalomba onitawethze nimuyumbe kushinekethza pashi ko ñothzi thzofoci. Kana kumuyumba lomushili.'' ⁹ Davida ayepo aamba kwa Abishai, ''Lelo wamupaa; mukonda elye okupa lyoko lyenji kulwisha muka kuweshiwa wa Shinda sha moyo ne akane akuwana mulandu?'' ¹⁰ Davida ayepo aamba, ''Ko Shinda sha moyo oyu yoya, Shinda sha moyo kenge amupaa, nji liyuwa lyenji lyo kufa kenge likeya, nji kenge akuthza ku mvo no kukafela ko. ¹¹ Shinda sha lelo anitawethza ci niolole lyoko lyange kulwisha muka kuweshiwa wenji; Ambene honi, nakulomba, oshimbe ñothzi ethzi thzili ku mutwi wenji no kafuma ko meyu, ne tuthze.'' ¹² Ne Davida ayepo shimba ñothzi no kafuma ko meyu ku mutwi wa Saule, ne awopo alithela. Kwithsa oyu nawamono nji kulimuka, kwithsa shanga oyu wapindukile, mukonda wahe kuma alalile, mukonda tulo totukulu kutunda kwa Shinda sha moyo kuma natuwawela. ¹³ Nehoni Davida ayepo thza kusambwa limweya ne ayepo kemana peulu thzo mukinya ko kule; kuma kwakalile muendo oule mukaci ko. ¹⁴ Davida ayepo kuwelela kwa anu noku kwa Abinere mwana Nere; ayepo aamba, ''Kotawa, Abinere?'' Nehoni Abinere ayepo tawa no kuamba, ''Yowe elye owe kuwelela kwa fumu?'' ¹⁵ Davida ayepo aamba kwa Abinere, ''Kali yowe mukwelume omundume? Elye okulipitula noe mu Isilaele? Honi iñe onakanena kunyunga ñathsile oe aye fumu? Mukonda kunakeya munu kunapaa fumu aye ñathsile oe. ¹⁶ Eshi shinu onakwama kali shiwa. Ko Shinda sha moyo oyu yoaya, waloela kufa mukonda onakwanga kunyunga ñathsile oe, aye muka kuweshiwa wa Shinda sha moyo. Omone honi kupi thzili ñothzi thza fumu no kafuma ko meyu ei inakalile kunyonga no mutwi wenji!'' ¹⁷ Saule ayepo limuka liywi lya Davida ne ayepo aamba, ''Elyo liywi lyoe, mwanange Davida?'' Davida ayepo aamba, ''Liywi lyange, ñathsile wange, fumu.'' ¹⁸ Ayepo aamba, ''Iñe ñathsile wange ei anashupwelela mupikenji? Iñe ninakwama? Omango mwine ou uli mu lyoko lyange? ¹⁹ Honine, nakulomba, ñathsile wange fumu ateelele ku maywi a mupikenji. Ngeci Shinda sha moyo yoliyo nakukumuna ci onilwishe, atambule shitavelo; ambene ngeci anu woliyo ana kukumuna, akutiwe kwa Shinda sha moyo, mukonda lelo ananicithzela kwako, ci nakala ku ushwana wa Shinda sha moyo; anaamba kukwange ci, 'Othze okalombele athzimu.' ²⁰ Honine, lelo watwethza onyinga wange kumwaalela pashi kokulela na Shinda sha moyo; mukonda fumu o Isilaela onakeya kunafota mununu ofoci eci munu yomba makwakwa mu mikinya.'' ²¹ Nehoni Saule ayepo aamba, ''Ninakwama shivi. Ohuke, Davida, mwanange; mukonda kana kukukwama omango kalo, mukonda moyo wange unakala ouwa nene mu meho oe lelo. Omone, ninakwama wanga ne ninepisha nene.'' ²² Davida ayepo tawa no kuamba, ''Omone, ñothzi thzoe thzino kuno, fumu! Yumweya ku mishumba thzoe akeye kuno nathzishimbe ne athzilete kukwoe. ²³ Shinda sha moyo akule munu no munu ko kuluka kwenji no kusepahala kwenji; mukonda Shinda sha moyo kuma anakupa mu lyoko lyange lelo, ambene ninakana kulwisha muka kuweshiwa wenji. ²⁴ Omone, echi eli unakala moyo woe owa mu meho ange lelo, no moyo wange nawo ukale oukulu mu meho a Shinda sha moyo, ne aniamwene mu ukalu ouhe.'' ²⁵ Nehoni Saule ayepo aamba kwa Davida, ''Ofiyauliwe, mwanange Davida! yoshemwa kenge wakukwama enu yoikulu ne yoihe wakukwama kenge yakuloa.'' Ne Davida ayepo lithzela, no Saule ayepo huka ku shivaka shenji.