¹ Davida ayepo aamba mu mucima wenji, ''Liyuwa limweya kenge nakupaiwa ko lyoko lya Saule; kwithsa sho shiwa kukwange kupita kucilela mu litunga lya Afilisita; Saule kenge akushia kunifota ku maenja o litunga lyo Isilaele lyolihe, omu muliyo nakupandukela kutunda mu lyoko lyenji. ² Davida ayepo katuka no kuthza, aye no anu enji o kukuma pa ita mutanu na shofoci (600) awa akalile nenji, kwa Akishi mwana Maoki, fumu oku Gati. ³ Davida ayepo kala na Akishi ku Gati, aye no anu enji, munu no munu naka njiyo thzenji ne Davida na anu enji eli, Akinoami mbuyama oku Jezireele, no Abigaili mbuyama oku Karimeli, munu wa Nabali. ⁴ Saule kuma natongweliwa ci Davida onacilela ku Gati, ne ayepo shiya kumufota. ⁵ Davida ayepo ambela Akishi, ''Ngeci ninawana kukwamiwa shuwa kukoe, onipeko shivaka ku mambongi o mulitunga, ci nikakaleko. Iñe mupikoe ei nga akalela mu shikuña noe?'' ⁶ Ne elyo liyuwa Akishi ayepo mupa Zikilagi; Sholiyo shinaleta ci no lelo lino Zikilagi mbongi thzo mafumu o Juda. ⁷ Mayuwa nakala Davida mu litunga lya Afilista neli mwaka o mutunu no makonda ane. ⁸ Davida no anu enji awopo alwisha ivaka yoingi, kulwisha aka Geshuri, aka Girizi, no aka Meleke; mukonda awo anu awo waliyo ashinda sha litunga, kutatekela ku Shuri, kukakuma ku litunga lya Engepita. Moliyo nakalanga kutunda oko ku kale. ⁹ Davida ayepo lwisha litunga kupila no kusiya mo shanga mukwelume nji mbuyama o kuyoya. Ayepo shimba mangu no ngombe, indongi, tukambe, no ivata. Nehoni ayepo huka kwa Akishi. ¹⁰ Kishi kuma naambanga, ''Alye awa munakalwisha lelo?'' Davida pohuma atawa, ''Kuma tunakalwisha awa ali ku mboela wa Juda,'' nji ''Kuma tunakalwisha awa ali ku mboela wa Jerashimeele,'' nji ''Kuma tunakalwisha awa ali ku mboela wa Kanana.'' ¹¹ Davida kanashiyanga shanga mukwelume nji mbuyama kuyoya kumuleta ku Gati, kuamba ci, ''Ne ci lelo atwesha kuamba yetu ci, 'Davida natukwama eshi no eshi.''' Eshi sholiyo nakwama kuli mu litunga lya Afilista. ¹² Akishi ayepo kulupela Davida, kuamba ci, ''Onakwama anu enji ana Isilaele kumuthzimba; honine kenge akala mupikange shikati shoshihe.''