¹ Honi Samuele ayepo fa. Ana Isilaele wahe po aliwana pofoci kumulila, ne awopo amuvumbeka mu njiyo thzenji ku Rama. Nehoni Davida ayepo katuka kuulumuka ku mumbulwa kukutu wa Parani. ² Kwakalile mukwelume mu Maoni, oyo lufumo lwenji lwakalile ku Karimeli. Oyo mukwelume kuma akalile no lufumo lo lukulu nene. Kuma akalile no mangu 3000 no membe 1000. Nateulela mangu enji mu Karimeli. ³ Lithzina lyoyo mukwelume po Nabali, ne lithzina lya munu wenji neli Abigaili. Oyo mbuyama nakala no onyanyami o kuyuvishihsa enu wangu kalo neli muwa ku shihanga. Ambene mukwelume aye neli mukalu no mukalelo oumango mu mumukwameno wenji. Neli atunda ku shikuta sha Caleb. ⁴ Davida ayepo yuva kuli mu mumbulwa kukutu ci Nbali onateulu mangu enji. ⁵ Ne Davida ayepo tuma mishumba likumi. Davida ayepo ambela mishuma ci, ''Muthze ku Karimeli, muthze kwa Nabali, ne mukamuvumenene mu lithzina lyange. ⁶ Mukamuambele ci, 'Oyoye mu mushihuno. Kuliyala kukale kukoe kalo kuliyala kukale ku njiyo thzoe, no kuliyala kukale ku inu yoihe oli nayo. ⁷ Nina yuvu ci oli naka kuteula. Alisani oe natukala no, kalo kanatuwakwama sho shimango, ne kwithsa eshi nashiyongo shikati shoshihe eshi nakala mu Karimeli. ⁸ Oipule mishumba thzoe ne kenge akutongwela. Honi otawethze mishumba thzange awane okwathsi kukwoe, mukonda tuneya pa liyuwa lyo mukiti. Nalomba ope shoshihe oli nasho ku lyoko kwa apikoe noku kwa mwanoe Davida.''' ⁹ Mishumba thza Davida apa thzakumine, awopo aamba yoihe ei kwa Nabali mu lithzina lya Davida ne awopo atatelela. ¹⁰ Nabali ayepo tawa apika a Davida, ''Davida ne elye, kalo mwana Jese ne elye? Angi apika ano mayuwa awa anomboloka kwa añathsile oo. ¹¹ Ame nishimbe ishima yange no meyu ange no nyama thzange ethzi ninapaela aka kuteula ange ci niipe kwa anu awa nikana kulimuka oku atunda nji kupi?'' ¹² Ne mishumba thza Davida awopo apiluka no kuhuka, ne awopo akamutongwela yoihe ei nai ambiwa. ¹³ Davida ayepo amba kwa akwelume enji, ''Munu no munu ashimbe mwele wenji.'' Ne munu no munu ayepo shimba mwele wenji. Davida naye po shimba mwele wenji. Akwelume okukuma pa ita ine (400) awopo ashupwela Davida, ne okukuma pa ita ili (200) awopo ashila pa itenga. ¹⁴ Ambene yumweya ku mishumba thza Nabali ayepo ambela Abigaili, munu wa Nabali; ayepo amba, ''Davida kuma natumu tunganda kutunda mu mumbulwa kukutu kukavumenena ñathsile wetu, ne ayepo waanjipela. ¹⁵ Ambene awa akwelume kuma natukwama shuwana. Kanatukwamiwa omango kalo kwithsa eshi nashiyongo apa natuthzanga no mu mulundu. ¹⁶ Napiluka eci shipaka kukwetu mutanya no oshiku, mu shikati shoshihe esho natukala no kutulisha mangu. ¹⁷ Honine olimuke eshi ne oayale eshi wakukwama, mukonda omango unaayaleliwa ñathsile wetu, no aka njiyo thzenji wahe. Aye po munu omuanji kwithsa munu okutweha kuamba nenji.'' ¹⁸ Ne Abigaili ayepo yokolola no kukashimba ita ili (200) yo ihele yo ishima, mavotela eli o waine, no mangu mutanu aa anatelekiwa, no ikala mutanu yo oheke o kupona, shita shofoci (100) sho makende o shisansa, no ita ili (200) yo makende o feiga, no kuipaka pa indongi. ¹⁹ Ayepo ambela mishumba thzenji, ''Muthze mulitangethze, ne kenge nikeya munyima thzenu.'' Ambene kanaambela munu wenji. ²⁰ Apa athzinine pa shindongi shenji ne ayepo ulumuka ku mukinya ko likuñwa lyo litungi, Davida no anu enji awopo aulumuka kutamba oku akalile, ne ayepo liwana no. ²¹ Honi Davida kuma aambile ci, ''Yoshemwa kuma nanilinyandisha kenge kunyunga yoihe ei ali nayo oyu mukwelume mu mumbulwa kukutu, ne kwithsa eshi nashiyongo ku inu yenji yoihe, ne onanihushela omango ku inu yoiwa nanimukwamena. ²² Nyambi akwame kengeyo kwa akwethzimbo ya Davida, ne akwame nene, ngeci ku mashikushiku nakushiye shanga yofoci ku akwalume enji. ²³ Abigaili apa amonine Davida, ayepo yokolola kushuluka pa shindongi shenji ne ayepo wishela lupala pashi pa posho thza Davida ne ayepo kinyama ku manwi. ²⁴ Ayepo wela ku maulu enji ne ayep amba, ''Kukwange nofoci, ñathsile wange, kukale mulandu. Nalomba otawethze mupikoe aambe kukoe, ne oteelele ku maywi a mupikoe. ²⁵ ñathsile wange lelo atwala maano ku munu o tumbako, aye Nabali, mukonda eci eli lili lithzina lyenji, naye moliyo anakalela. Nabali lyoliyo lithzina lyenji, ne kuvangoka oli nako. Ambene ame mipikoe kananimono mishumba thza ñathsile ethzi notumu. ²⁶ Honine, ñathsile wange, ko Shinda sha moyo oyu yoya, ne eci eli oyoya, mbeci po Shinda sha moyo onakukanisha kumwaa onyinga, no kuhushela omango ko lyoko lyoe, ne oshiye akwethzimbo yoye, nawa afoto kukwama omango kwa ñathsile wange, aninge eci Nabali. ²⁷ Ne otawethze eshi shipiwa eshi analeta mupikoe kwa ñathsile wange shipiwe ku mishumba awa aenda na ñathsile wange. ²⁸ Nakulomba otetele ku mulandu wa mupikoe, mukonda yoshemwa Shinda sha moyo kenge akwamena ñathsile wange njiyo thzo shemwa, mukonda ñathsile wange alwa mvo thza Shindasha moyo; ne omango kawa kuwaniwa kukoe mu moyo oe o kuyoya. ²⁹ Shanga ci anu akatuka kukushupwela ci akupae, ambene moyo wa ñathsile wange kenge unyungiwa mu shitulekelo sho kuyoya ko Shinda sha moyo Nyambi oe; ne kenge akunupela kokule moyo wa akwethzimbo yoye, eci liwe linakunupiwa mu legeni. ³⁰ Shinda sha moyo kenge akukwamena ñathsile wange enu yoihe akukulupelishile, ne onakuhangula kukala muendishi o Isilaela. ³¹ Eshi kosha kuyuvisha omango no kukana kukalisha shuwana mucima kwa ñathsile wange- ci onamwaa onyinga o kupila mulandu, nji mukonda ñathsile wange kuma aelekile kuliamwena aye shinda. Mukonda Shinda sha moyo apa akukwamena ñathsile wange owa, ovuluke mupikoe.'' ³² Davida ayepo aamba kwa Abigaili, ''Shinda sha moyo, Nyambi o Isilaele, afiyauliwe, oyu nakutumu kunaliwana nange lelo. ³³ Onyanyami oe unafiyauliwa nowe onafiyauliwa, mukonda lelo onanitundisha ku kumwaa onyinga no kukuhushela omango ko lyoko lyange! ³⁴ Mukonda shemwa, ko Shinda sha moyo, Nyambi o Isilaele, oyu yoya, oyu nanikanisha kukuipishela, napoci oyakame kunaliwana nange, apa nga likava nga kwithsa shanga kambu ko mukwelume aka kakashiyala kwa Nabali.'' ³⁵ Ne Davida ayepo tambula ku lyoko lyenji ei namuletela; ayepo muambela, ''Othze ku njiyo thzoe mu kuliyala; omone, ninayuvu liywi lyoe ne ninakutambula nawa.'' ³⁶ Abigaili ayepo huka kwa Nabali; mumone, kuma akalile no mukiti ku njiyo thzenji eci mukiti wa fumu; ne mucima wa Nabali kuma naunyanyuka nene, mukonda kuma apendile nene. Ne kwithsa ei amutongwelile shime apa lyavile liyuwa. ³⁷ Mashikushiku, Navali apa apendulukile waine, munu wenji ayepo mutongwela ei enu; mucima wenji awopo oula mu muili, ne ayepo piluka eci liwe. ³⁸ Apa kwapitele mayuwa likumi (10) Shinda sha moyo ayepo fula Nabali ne ayepo fa. ³⁹ Davida apa ayuvile ci Nabali onafu, ayepo amba, ''Shinda sha moyo afiyauliwe, oyu nahushela omango ko kashwau nanitambula ku lyoko lya Nabali ne onatundisha mupikenji ku kukwama omango. Onahushela ekwama yo imango ya Nabali pa mutwi wenji.'' Ne Davida ayepo tuma anu ci akambe na Abigaili, ci amuyeke. ⁴⁰ Apika a Davida apa akumine kwa Abigaili, ku Karimeli, awopo amba kukwenji ne awopo aamba ci, ''Davida onatutumu kukoe ci natukushimbe okakale munu wenji.'' ⁴¹ Ayepo katuka, ayepo kotamena pashi ko lupala lwenji, ne ayepo amba, ''Omone, mupikoe o mbuyama po mupika o kuhupa maulu a apika a ñathsile wange.'' ⁴² Abigaili wanguwangu ayepo katuka, ne ayepo thzina pa shindongi no apikenji mutanu o ambanda awa amushupwelile; ne ayepo shupwela tunganda twa Davida ne ayepo piluka munu wenji. ⁴³ Honi Davida kalo ayepo yeka Akinoami oku Jezireele; muwili wo awopo apiluka anu wenji. ⁴⁴ Kalo, Saue kuma apile Mikali mwanenji, aye munu wa Davida, kwa Palati mwana Laishi oku Gaimi.