¹ Saule apa nahuka kutunda ku kucithza Afilisita, ayepo ambeliwa ci, ''Davida oli mu mumbulwa kukutu wa Eni Gedi.'' ² Nehoni Saule ayepo shimba akwelume o kukuma pa 3000 awa nahanguliwa mu Isilaele momuhe no kuthza kukafota Davida no anu enji ku mawe o membe thzo mu mulundu. ³ Kuli mu likuñwa ayepo kuma omu nalyelanga mangu, omu muli liteke lyo likulu lyo mu mawe. Saule ayepo wingena mo kukathsika maulu enji. Honi Davida no anu enji kuma akalile kuhula o liteke. ⁴ Anu a Davida awopo aamba kukwenji, ''Eli lyoliyo liyuwa eli aambile Shinda sha moyo apa akuambeli ci, 'Kenge nakupa mukwa shithzimbo shoe mu lyoko lyoe, ci omukwame omu ohimena.''' Nehoni Davida ayepo katuka ne ayepo kokawa kunatutwala kuthza kukateta ku mungundo o shito sha Saule. ⁵ Munyima thzo kukwama kengeyo Davia ayepo yuva kukola ku mucima mukonda kuma atetile ku mungundo o shito sha Saule. ⁶ Ayepo ambela anu enji, ''Shinda sha moyo lelo anitawethza ci nikwame shinu sho kengeya kwa ñathsile wange, oyu naweshiwa wa Shinda sha moyo, ci nipake lyoko lyange kukwenji kumulwisha, konimona ci wakuweshiwa wa Shinda sha moyo.'' ⁷ Ne Davida ayepo anjipela anu enji ko aa maywi, ne kanawwatwethza kulwisha Saule. Saule ayepo katuka, kutunda mu liteke, ne ayepo lithzela mu muendo wenji. ⁸ Mnyima Davida naye po katuka, kutunda mu liteke, ne ayepo isha Saule: Fumu ñathsile wange.'' Saule apa alishetukile, Davida ayepo wisha lupala wenji pashi kumumonisha likute. ⁹ Davida ayepo amba kwa Saule, ''Iñe oteelela ku anu aamba ci, 'Omone Dvida afota kukwama omango?' ¹⁰ Lelo meho oye anamono eli Shinda sha moyo anakupa mu lyoko lyange apa natukala mu liteke. Wanweya kuma naniambela ci nikupae, ambene amepo nikushiya. Amepo niamba ci, ''Kanakupaka lyoko lyange kulwisha ñathsile wange; mukonda wakuweshiwa wa Shinda sha moyo.' ¹¹ Omone, tata wanje, omone shipathsi shimweya sho mungundo o shito shoe shili mu lyoko lyange. Amona kuma nanitete ku mungundo o shito shoe ne kananikupaa, olimuke no kumona ci kwithsa omango nji mulandu o kulwisha fumu mu lyoko lyange, ne kanikwamine shivi kukwoe, shanga ci wayomba moyo wange ci onipae. ¹² Shinda sha moyo aatule mukaci koe nange, ne Shinda sha moyo akuhushele omango onanikwama, ambene lyoko lyange kalya kukulwisha. ¹³ Eci nguli thzo kukale eli thziamba, 'Ku munu omumango kwandunda omango.' Ambene lyoko lyange kalya kukulwisha. ¹⁴ Elye anakeyela kunafota fumu o Isilaele? Elye onashupwela? Washupwela mbwa okufa! Washupwela mununu! ¹⁵ Shinda sha moyo apiluke muka kuatula ne aatule mukaci koe nange, ne aimone, kalo aniimanene mu iamba ne aniamwene mu lyoko lyoe.'' ¹⁶ Davida apa amanine kuamba aa maywi kwa Saule, Saule ayepo aamba, ''Eli liywi lyoe , mwange Davida?'' Saule ayepo amba kutanalisha liywi ne ayepo lila. ¹⁷ Ayepo amba kwa Davida, ''Owe onaluku kunipita. Mukonda owe onanikwama owa, ame po ninakukwama omango. ¹⁸ Lelo onamonisha eli onakwama owa kukwange, mukonda kononipaa Shinda sha moyo apa nanipaka mu moko oe. ¹⁹ Mukonda ngeci munu ayepo wana mukwa shithzimbo shenji, nga ayepo mushimba ci athze ko kuliyala? Shinda sha moyo akupe shipiwa sho shiwa ko eyi onanikwama lelo. ²⁰ Honi ninalimuka ci kenge wa kupiluka fumu ne kalo ofumu wo Isilaele kenge wakukolopa mu lyoko lyoe. ²¹ Oliethze kukwange ko Shinda sha moyo ci kowa kupaa ekulyange munyima thzange, ne kowa kutundisha lithzina lyange mu njiyo thza tata.'' ²² Ne Davida ayepo liethza kwa Saule. Nehoni Saule ayepo huka ku lyumbo, ambene Davida no anu enji awopo akanduka mu mulundu.