¹ Awopo aambela Davida, ''Omone, Afilisita alwisha Keila ne atuta ilya ei ili pa ilambo.'' ² Ne Davida ayepo lombela kwa Shinda sha moyo ci amukwathse ne ayepo muipula, ''Nithze nikalwishe awa Afilista nji ngepi?'' Shida sha moyo ayepo aamba kwa Davida, ''Othze okalwishe Afilista ne okaamwene Keila.'' ³ Akwelume awa akalile kwa Davida awopo aamba kukweji, ''Omone, twayapa muno mu Juda. Honi apa tuthza ku Keila kukalwisha mashwalale o Afilisita ne?'' ⁴ Nehoni Davida ayepo lombela kwa Shinda sha moyo kalo. Shinda sha moyo ayepo mutawa, ''Okatuke, othze ku Keila. Mukonda kenge nikupa kutwesha Afilisita.'' ⁵ Davida no akwelume awa akalile kukwenji awopo athza ku Keila kukalwisha Afilisita. Ayepo shimba ngombe thzo no kuwapaa mu ungi. Ne Davida ayepo amwena awa atungile ku Keila. ⁶ Abiatare mwana Ahimeleki apa acilelile kwa Davida ku Keila, kuma akeile no efoda mu lyoko lyenji. ⁷ Saule ayepo tongweliwa ci Davida onathzi ku Keila. Saule ayepo amba, ''Nyambi onamunipa mu lyoko. Mukonda onakayanjeleliwa mo mukonda onakengena mu mbongi thzili no ikwalo no ipakisho.'' ⁸ Saule ayepo isha mashwalale enji wahe kuliloishela mvo, kuthza ku Keila, ci akayanjelele Davida no akwelume awa akalile kukwenji. ⁹ Davida kuma alimukile ci Saule afota kumukwama omango. Ayepo ambela Abiatare mupulisita ci, ''Olete kuno efoda.'' ¹⁰ Nehoni Davida ayepo amba, ''Shinda sha moyo, Nyambo o Isilaele, mupikoe yoshemwa onayuvu ci Saule afota kukeya ku Keila, kunaipisha mbongi mukonda okufota yame. ¹¹ Eine anu omu Keila kenge anipa mu lyoko lyenji? Ei ne Saule kenge akeya, mupikoe kunayuvu? Shinda sha moyo, Nyambi o Isilaele, nakulomba, otongwele mupikoe.'' Shinda sha moyo ayepo amba, ''Kenge akeya.'' ¹² Nehoni Davida ayepo amba, ''Eine anu omu Keila kenge atupa name no akwelume nili no mu lyoko lya Saule nji ngepi?'' Shinda sha moyo ayepo amba, ''Kenge amipa mu lyoko lyenji.'' ¹³ Nehoni Davida no akwelume akalile no, awa akumine pa ita mutnu na shofoci (600) awopo akatuka kutunda mu Keila, ne awopo aenda kutunda mu shivaka shimweya kuthza mu shivaka shimweya. Saule ayepo tongweliwa ci Davida onacili mu Keila, ne ayepo shiya kuthza ko. ¹⁴ Davida ayepo kaliholeka mu mumbulwa kukutu, mu litunga lyo mikinya mu mumbulwa kukutu wa Zifi. Saule ayepo thza no kufota liyuwa no liyuwa, ambene Nyambi kanamumupa mu lyoko lyenji. ¹⁵ Davida ayepo mona ci Saule afota kumupaa; honi Davida kuma akalile mu mumbulwa kukutu wa Zifi ku Horeshi. ¹⁶ Nehoni Jonatani, mwana Saule, ayepo katuka kuthza kwa Davida ku Horeshi, ne ayepo katanalisha lyoko lyenji kwa Nyambi. ¹⁷ Ayepo amba kukwenji, ''Lelo wayapa. Mukonda lyoko lya tata Saule kalya kukuwana. Kenge wakupiluka fumu o Isilaele, ne yame nakupiluka omushili kukoe. Tata Saule naye alimuka kengeyo. ¹⁸ Awopo alikwata ombusha pa meho a Shinda sha moyo. Davida ayepo shiyala ku Horeshi, ne Jonatani ayepo huka ku lyumbo. ¹⁹ Nehoni anu oku Zifi awopo akeya kwa Saule ku Gibea ne awopo aamba, ''Davida kali onaliholeka mukaci ketu mu mulundu ku Horeshi, pa mukinya wa Hakila, ou uli ku mboela o Jeshimoni? ²⁰ Honi oulumuke kuno, fumu! Kuthza komu ofotela mucima woe, ulumuke kuno! Shikwama shetu atwe kenge shipiluka sho kumupa mu lyoko lya fmu.'' ²¹ Saule ayepo aamba, ''Shinda sha moyo amifiyaule. Mukonda munaniyuvela ñeke. ²² Muthze, mukalimukele shuwana. Mukafotishishe oku analiholekanga noyu namumono ko ci elye. Ninaambeliwa ci wakunyanyam nene. ²³ Ne mukataneke, ne mukalimuke kokuhe ku ivaka analiholekanga. Mukahuke kukwange no iamba yo kukwana, nehoni kenge nihuka nenu. Ngeci mwali mu litunga, kenge nikamufota mukaci ko Ajuda wahe owangi.'' ²⁴ Nehoni awopo akatuka kuthza ku Zifi Saule kushime kuthza ko. Honi Davida na anu enji kwali mu mumbulwa kukutu wa Maoni, mu Araba ku mboela o Jeshimoni. ²⁵ Saule no anu enji awopo athza kukamufota. Ambene Davida kuma natongweliwa, ne ayepo thza ku mukinya o mawe ne ayepo kakalako mu mumbulwa kukutu wa Maoni. Saule apa ayuvile kengeyo, ayepo cithza Davida mu mumbulwa kukutu wa Maoni. ²⁶ Saule ayepo thza ku sambwa limweya lyo mukinya, ne Davida no anu enji kwathza ku sambwa limweya lyo mukinya. Davida ayepo yakama kutunda kwa Saule. Saule no anu enji apa aningile ci apake Davida no anu enji mukaci ci awakwate, ²⁷ akopo kukeya kanganda kwa Saule no kunamuambela ci, ''Oyakame okeye, mukonda Afilisita anengena kulwisha litunga.'' ²⁸ Ne Saule ayepo huka kutunda kukushupwela Davida ne ayepo thza kukalwisha Afilisita. Ne esho shivaka ashopo shipakiwa lithzina lyo liwe lyo kuyoyela. ²⁹ Davida ayepo tunda ko ne ayepo kakala mu mulundu o Eni Gedi.