¹ Ne Davida ayepo tundako no kucilela ku mukoti o Adulami. Akulwenji no aka njiyo thza tata wenji apa aiyuvile, awopo aulumuka kuthza kukwenji. ² Munu yomuhe oyu nakala mu ukalu, munu yomuhe oyu nakala mu shikoloti, no munu yomuhe oyu wakalile mu kuvilaela- wahe po akaliwana kukwenji. Davida ayepo piluka muka kuwaendisha. Kuma kwakalile akweluma o kukwana ita ine (400) awa akalile nenji. ³ Nehoni Davida ayepo tundako kuthza ku Mizipa mu Moabi. Ayepo amba kwa fumu wa Moabi, ''Nalomba otawethze a tata na mama kunakala noe kutwala apa nikalimukela eshi akunikwamena Nyambi.'' ⁴ Ayepo washiya na fumu wa Moabi. Tata wenji na mama wenji awopo akala nenji shikati shoshihe eshi nakakala davida oku acilelile. ⁵ Nehoni mupolofita Gadi ayepo amba kwa Davida, ''Lelo wakala omu onacilela. Otunde mo othze mu litunga lya Joda.'' Ne Davida ayepo tunda ko kuthza mu mulundu wa Hereti. ⁶ Saue ayepo yuva ci Davida onayuvahala, pofoci no akwelume awa akalile nenji. Honi Saule kuma akalile mu Gibea mushi thzo shitondo sho tamarisike pa mukinya, kunakwatelela ñothzi mu lyoko lyenji, ne apikenji wahe kuma aimanine kwanamupaka mukaci. ⁷ Saule ayepo amba kwa apikenji awa amupakile mukaci, ''Muyuve, ana Benjamine! mwaanekela ci mwana Jese mwaheno kenge amipa ilwa yo kulima no ilwa yo itondo yo veine? mwaanekela ci mwaheno kenge amikwama aka kuendisha anu owangiwangi, ⁸ mukuninga ci mwaheno munanipilukela? Kwithsa kukwenu oyu nanilimukisha mwanange apa nalianga ombusha na mwana Jese. Kwithsa kukwenu oyu naniyuvela ñeke. Kwithsa kukwenu oyu nanilimukisha ci mwanange onashemaethza mupikange Davida ci anipilukele. Lelo aliholeka no kuniundamena ci anilwishe.'' ⁹ Nehoni Doege oku Edomo, oyu waimanine ku nyonga thzo apaka a Saule, ayepo tawa, ''Kuma nanimono mwana Jese kukeya ku Nobu, kwa Ahimeleki mwana Ahitubi. ¹⁰ Kuma alombelile kwa Shinda sha moyo ci amukwathse, ne ayepo mupa ilya no mwele wa Goliati muka Filisita.'' ¹¹ Nehoni fumu ayepo tuma munu kukaisha mupulisita Ahimeleki mwana Ahitubi no aka njiyo thza tata wenji wahe, apulisita awa akalile mu nobu. Wahe po akeya kwa fumu. ¹² Saule ayepo amba, ''Oteelele mwana Ahitubi.'' ayepo tawa yame ono ñathsile.'' Saule ayepo amba kukwenji, ¹³ ''Iñe munanipilukelela, owe mwana Jese, omu nomupela likende, no mwele, ne owepo mulombelela kwa Nyambi ci amukwathse, ci anilwishe, kukaliholeka kuniundamena, eci eli anakwama lelo?'' ¹⁴ Nehoni Ahimeleki ayepo tawa, ''Elye kwa apikoe okusepahala eci Davida, hemwenya fumu kalo yoliyo muka kukunyunga, ne kalo akutekiwa mu njiyo thzoe? ¹⁵ Lelo lyoliyo lyo mutatekelo ninamulombelela kwa Nyambi ci amukwathse? Itunde kukwange eyo! Fumu lelo aanga shinu kwa mupikenji shanga kwa aka njiyo thza tata wahe. Mukonda mupikoe kwithsa eshi alimuka kwei iamba.'' ¹⁶ Fumu ayepo tawa, ''Ahimeleki, yoshemwa kenge ofa, owe no aka njiyo thza tata oe wahe.'' ¹⁷ Fumu ayepo ambela awa amupakile mukaci, ''Mupiluke ne mupae a pulisita a Shinda sha moyo mukonda lyoko lyo nalyo lili kwa David, kalo mukonda kuma nalimuka ci onacili, ambene kananilimukisha.'' Ambene apika a fumu kanapaka moko o ci ape apulisita a Shinda sha moyo. ¹⁸ Nehoni fumu ayepo ambela Doege, ''Opiluke ne opae apulisita a Shinda sha moyo.'' Ne Doege oku Edomo ayepo piluka no kulwisha apulisita; ayepo paa anu makumi mutanu no makumi ahatu no anu mutanu (85) awa avatile efoda o line elyo liyuwa. ¹⁹ Kalo no mu Nobu, mbongi tha apulisita ayepo paa, akwelume no ambuyama, anuke, no tumbu, no ngombe, indongi, no mangu, ayepo ipaa. ²⁰ Ambene yumweya wa ana a Ahimeleki mwana Ahitubi, o lithzina lyo Abiatare, ayepo panduka ne ayepo cilela kwa Davida. ²¹ Abiatare ayepo katongwela Davida ci Saule onapaa apulisita a Shinda sha moyo. ²² Davida ayepo amba kwa Abiatare, ''Kuma nalimukile liya liyuwa, Doege oku Edomo apa akalile ko, ci yoshemwa kenge atongwela Saule. Yame ninaleta mafu oahe mu mukuta wa tata oe! ²³ Okale nange ne lelo wayapa. Mukonda oyu fota kukupaa afota kunipaa name. Kukwange kwithsa okalu ou ukukeyela.''