¹ Nehoni Davida ayepo thza ku Nobu kukamona mupulisita Ahimeleki. Ahimeleki ayepo keya kunaliwan na Davida kututuma ne ayepo amba kukwenji, ''Iñe oendela ofoci ne kwithsa munu shanga yofoci oyu li noe?'' ² Davida ayepo ambela mupulisita Ahimeleki, ''Fumu yoliyo nanitumu ne onaniambela ci, 'Lelo kwakal munu oyu limuka ei ninakutumu kukwama, nei ninakumena.' Nina ambela mishumba ci tukaliwane ku shivaka shimweya. ³ Honine iñe oli nayo ku lyoko? Onipeko makende mutanu, nji yoihe oli nayo.'' ⁴ Mupulisita ayepo tawa Davida ne ayepo amba, ''Makenda kende pohuma kwithsa, ambene shime makende o kukena oliyo nili nao- ngeci mishumba analihenge kwa ambuyama.'' ⁵ Davida ayepo tawa mupulisita, ''Yoshemwa ambuyama anatundishiwa kukwetu pa mayuwa ahatu, omu kunakalelanga ngeci natunda mu lyumbo. Enu yo mishumba yakenishiwa shanga mu muendo o kengeya. Honi lelo kali kenge ikenishiwa nene!'' ⁶ Nehoni mupulisita ayepo pa likende eli nalikenishiwa. Mukonda kakwakalile likende limweya shime likende lyo kumonisha, eli linatundishiwa pa posho thza Shinda sha moyo, ci kupakiwe likende lyo kupya omu linatundu pa liyuwa nalitundishiwa mo. ⁷ Honi yumweya wa apika a Saule kuma akalileko elyo liyuwa, oyu nakwatiwa pa posho thza Shinda sha moyo. Lithzina lyenji neli Doege oku Edomo, mukulu wa alisanai a Saule. ⁸ Davida ayepo amba kwa Ahimeleki, ''Ne kwithsa ñothzi nji mwele muno? Mukonda kanishimbile mwele nji ilwisho yange, mukonda shikwama ya fumu neli ya wangu wangu.'' ⁹ Mupulisita ayepo amba, ''Mwele wa Goliati muka Filisita, oyu wapaile mu lyanda lya Ela, ou unavungeliwa mu shito kunyima thzo efoda. Ngeci wahima kuushimba, oushimnbe, mukonda kwithsa shilwisho shimweya kalo.'' Davida ayepo amba, ''Kwithsa mwele umweya okulipila nao; onipe o.'' ¹⁰ Davida ayepo katuka ne ayepo thza kucila kwa Saule ne ayepo thza kwa Akishi fumu oku Gati. ¹¹ Akapika a Akishi awopo amuambela, ''Kali Davida oyu, fumu olino litunga? Kali neli aimba yenji oyu apa nakini, 'Saule onapaa awangi, ne Davida onapaa awangi nene?'' ¹² Davida ayepo anekela aa maywi mu mucima wenji ne kuma ayapile nene Akishi, fumu oku Gati. ¹³ Ayepo piluka mukalelo wenji pa meho oo ne ayepo liangelisha kuthzaluka mu moko oo; ayepo ñola ñola pa mashelo oo no kulikwemena lwenge ku mwevu wenji. ¹⁴ Nehoni Akishi ayepo ambela apikenji, ''Mumone, oyu mukwelume shithzaluke. Iñe munamuletela kukwange? ¹⁵ Ninapili ithzaluke, ci muniletele munu okengeya ci nakwame yo uthzaluke kukwange? Munu okengeya oshemwa nga ayepo ingena mu njiyo thzange?''