¹ Nehoni Davida ayepo cila ku Nayoti mu Rama ne ayepo huka ne ayepo ambela Jonatani, ''Iñe ninakwama? Omango wange upi? Shivi shange kwa tata oe shipi, ei afota kunipaela?'' ² Jonatani ayepo ambela Davida, ''Ithze kokule eyo; kofu. Tata kwithsa eshi akwama shoshikulu nji sho shionye eshi aka kuniambela. Tata einga aholekela ei kukwange nge ine? kali kengeyo. ³ Unohoni Davida ayepo liethza kalo no kuamba ci, ''Tata oe alimuka shuwa ci ninawana kuhemiwa kukwoe. Onaamba ci, 'Jonatani lelo alimmuka ei, apa ailimuka kenge aanjipa.' Ambene yoshem ko Shinda sha moyo oyu yoya, ne eci eli oyoya, kuli litambo lyofoci pohuma mukaci kange no lifu.'' ⁴ Nehoni Jonatani ayepo amba kwa, ''Yoihe oamba, kenge nikukwamena yo.'' ⁵ Davida ayepo ambela Jonatani, ''Peunja ngonda thzothzipe, ne naloela kukala pashi no kulya na fumu. Embene tango nithze, nikaliholeke mu shilwa kukakuma liyuwa lyo mushihatu lungulo. ⁶ Ngeci tata oe po anifota, nehoni oambe ci, 'Davida onanilombo ci andandummukela ku Betelehema ku mbongi thzenji; mukonda akwama shitavelo sho mwaka mu shikuta sho shoshihe.' ⁷ Ngeci aambe ci, 'Kunaloo,' mupikoe kenge akala mu kuliyala. Ambene ngeci kenge anjipa nene, nehoni olimuke ci, onaayala omango. ⁸ Honine okwame mupikoe ko shihemo. Mukonda onaleta mupikoe mu umbusha wa Shinda sha moyo no oe. Ambene ngeci nili no omango, onipae owe mwene; mukonda nji iñe nga oniletela kwa tata oe?'' ⁹ Jonatani ayepo amba, ''Ithze kokule noe eyo! Nga ninalimuka ci tata afota kukuletela omango, nga kanikuambelile?'' ¹⁰ Nehoni Davida ayepo amba kwa Jonatani, ''Elye nanitongwela ngeci tata oe kenge akutawa ko uanji?'' ¹¹ Jonatani ayepo amba kwa Davida, ''Okeye, tuthze mu shilwa'' Ne muwili wo awopo athza mu shilwa. ¹² Jonatani ayepo ambela Davida, ''Shinda sha moyo, Nyambi o Isilaele apiluke paki. Peunja, nji pa liyuwa lyo mushihatu apa niipula tata, tumone, ngeci oli no maayalo oawa kwa Davida, pohuma nikane kukulimukisha? ¹³ Ngeci kukwama omango kukwoe kwaloelisha tata, Shinda sha moyo akwame omango kwa Jonatani ne akwame nene ngeci kanikulimukisha no kukundisha muno kukutwala kwako, ci olithzele mu kuliyala. Shinda sha moyo akale noe, eci eli nakalanga na tata. ¹⁴ Ngeci nishiyoya, pohuma kawa kunimonisha ombusha o kuluka onalianga na Shinda sha moyo, ci lelo nafa? ¹⁵ Lelo watundisha ombusha oe o kuluka ku njiyo thzange myaka thzothzihe- shanga Shinda sha moyo katundishangile wahe akwethzimbio ya Davida pa lupala lo kaye.'' ¹⁶ Ne Jonatani ayepo lianga ombusha no aka njiyo thza Davida ne ayepo amba, ''Shinda sha moyo afote mulandu ku lyoko lyo akwathzimbo ya Davida.'' ¹⁷ Jonatani ayepo kwama Daivia kuliethza lo mushili mukonda o oshihimo eshi nakala nasho kukwenji, mukonda kuma amuhemine eci omu alihimenine aye shinda. Nehoni ¹⁸ Jonatani ayepo amba kukwenji, ''Peunja ngonda thzo thzipe. Kenge ofotahala mukonda shipua shoe kenge shikala mukungulu. ¹⁹ Apa okamana mayuwa ahatu, Oulumuke wanguwangu ne okeye ku shivaka eshi noliholeka ei iamba apa naitateka, ne okale ku nyonga thzo liwe lyo Ezeli. ²⁰ Kenge nikunupa mikili thzihatu oku linakalela, kuninga eci koshili nikunupa. ²¹ Nehoni kenge nituma mwanuke o mukwelume ne kenge nimuambela ci, ''Othze okafote mikili.' Apa niambela mwanuke o mukwelume ci, 'Omone mikli thzili oku onakalela; othzishimbe,'' Nehoni okeye; mukonda apo kuli kuliyala kukwoe ne kali omango, ko Shinda sha moyo oyu yoya. ²² ''Ambene ngeci niambela mwanuke o mukwelume ci, 'Omone, mikili thzili ku sambwa thzoe,' pohuma othze, mukonda Shinda sha moyo yoliyo nakuambela ci othze. ²³ Eci kuliyuva tunaamba owe name, omone, Shinda sha moyo oli mukaci koe nange myaka thzothzihe.''' ²⁴ Ne Davida ayepo liholeka mu shilwa. Ngonda thzohzipe apa nathzitelama, Fumu ayepo kala pashi kulya ilya. ²⁵ Fumu ayepo kala mu wikalo wenji, eci omu anakwamenanga, ku shipula sho kulimota. Jonatani ayepo katuka, ne Abina ayepo kala kunyonga tha Saule. Ambene shipula sha Davida kuma shakalile mukungulu. ²⁶ Unohoni Saule kwithsa eshi aambile elyo liyuwa, mukondaa kuma aanekelile ci, ''Koshili eshi shinakwamahala kukwenji. Kakenine, yoshemwa kakenine.'' ²⁷ Ambene pa liyuwa lyomushili, liyuwa kutunda pa liyuwa nathzitelama ngonda, shipula sha Davida kuma nashikala mukungulu. Saule ayepo amba kwa mwanenji Jonatani, ''Mwana Jese iñe anakanena kukeya ku ilya yana no lelo?'' ²⁸ Jonatani ayepo tawa Saule, ''Davida kuma nalombo shivaka kukwange sho kuthza ku Betelehema. ²⁹ Kuma naamba ci, 'Nalomba onitawethze nithze. Mukonda mukuta wetu ali no shitavelo mu mbongi, ne mukulwange onanitumena ci nikakaleko. Honi, ngeci wanihima, nalomba onitawethze nithze nikamone akulwange.' Sholiyo shinaleta ci akane kukeya ku methsa thza fumu.'' ³⁰ Uanji wa Saule owopo uyuumena Jonatani, ne ayepo amba kukwenji, ''Owe mwana mbuyama o namukuka, o mukanayuva! Ci kanilimuka ci onahangula mwana Jese ci yoliyo nakueleka, ne ci kalo yoliyo nayeka mama oe? ³¹ Mukonda ngeci mwana Jese ayoye pano pa kaye, owe no ofumu woe kamwakukalako. Nehoni, otume anu akamulete kukwange, mukonda oli no kupaiwa shemwa.'' ³² Jonatani ayepo tawa Saule tata wenji, ''Iñe apaliwa? Iñe anakwama?'' ³³ Nehoni Saule ayepo mukuha ñothzi thzenji ci amupae. Ne Jonatani ayepo limuka ci tata webnji afota kupaa Davida. ³⁴ Jonatani ayepo katuka kutunda ku methsa kunangwenye ne kalile shilya pa liyuwa lyomushili lyo ngonda, mukonda kuma avilaelile ya Davida, mukonda tata wenji kamukutekile. ³⁵ Mashikushiku, Jonatani ayepo thza mu shilwa oku alilaile na Davida, ne kuma akalile no mwanuke o mukwelume. ³⁶ Ayepo amba kwa mwanuke o mukwelume akalile nenji, ''Odandumuke okafote mikili ethzi nikunupa.'' Mwanuke o mukwelume apa nandandumuka kengeyo, ayepo kunupa mukili kumuleisha. ³⁷ Mwanuke o mukwelume apa akumine apa wawelelile mukili ou akunupile Jonatani, Jonatani ayepo isha mwanuke o mukwelume, ne ayepo muambela ci, ''Mukili kali kusambwa thzoe uli?'' ³⁸ Nehoni Jonatani ayepo isha mwanuke o mukwelume, ''Oyakame, wanguwangu, lelo wakala!'' Ne oyo mwanuke o mukwelume ayepo waneka mikli no kukeya kwa ñathsile wenji. ³⁹ Ambene oyo mwanuke o mukwelume kwithsa eshi alimukile. Shime Jonatani na Davida woliyo alimukile ei yakwamahalile. ⁴⁰ Jonatani ayepo pa ilwisho yenji kwa mwanuke o mukwelume no kumuambela ci, ''Othze, oitwale ku mbongi.'' ⁴¹ Mwanuke o mukwelume oshithza pohuma, Davida ayepo katuka kunyima thzo lilambo lyo mawe, ayepo wishela lupala lwenji pashi, ayepo kinyanama ku manwi luhatu. Awopo alicuveta, ne wahe po alila, Davida yoliyo walile nene. ⁴² Jonatani ayepo ambela Davida, ''Othze mu kuliyala mukonda muwili wetu tunaliethze ko lithzina lya Shinda sha moyo ci, 'Shinda sha moyo akale mukaci koe nange, no mukaci ko anange no anoe, ko kukana kupwa.''' Nehoni Davida ayepo katuka kuthza, ne Jonatani ayepo huka ku mbongi.