¹ Saule ayepo ambela mwanenji Jonatani no apikenji wahe ci apae Davida. Ambene Jonatani, mwana Saule, kuma ahimine Davida nene. ² Ne Jonatani ayepo tongwela Davida, ''Saule tata wange afota kukupaa. Honine omamele mashikushiku ne okaliholeke oku okana kumoniwa. ³ Kenge nithza kukemana kunyonga thza tata mu shilwa omu okaliholekane kenge nikaamba na tata yoye. Ngeci ninangule shimweya, kenge nikutongwela.'' ⁴ Jonatani ayepo amba yoiwa ya Davida kwa tata wenji ne ayepo muambela ci, ''Fumu lelo akwama shivi kwa mupikenji Davida. Mukonda aye kakwamine shivi kukwoe, ne ekwama yenji inaleta owa kukwoe. ⁵ Mukonda kuma alihupwelile moyo wenji ne ayepo paa muka Filisita. Shinda sha moyo kuma aletile kuyoyiwa ko kukulu nene mu Isilaele momuhe. Kuma waimonine ne owepo nyanyuka. Iñe einga okwamena shivi ku manyinga okupila mulandu ko paa Davida ko kupila livaka?'' ⁶ Saule ayepo yuva maywi a Jonatani. Saule ayepo liethza, ''Ko Shinda sha moyo oyu yoya, kakupaiwa.'' ⁷ Nehoni Jonatani ayepo isha Davida ayepo mutongwela yoihe ei enu. Jonatani ayepo leta Davida kwa Saule, ne ayepo kala kukwenji eci omu nakukalelanga kumatatekelo. ⁸ Kuma kwakalile mvo kalo, ne Davida ayepo thza no kukalwa no Afilisita ne ayepo watwesha ko kuwapaa nene. Awopo acila kukwenji. ⁹ Mupepo oumango kutunda kwa Shinda sha moyo awopo ukeya kwa Saule kunakala mu njiyo thzenji kunakwatelela ñothzi thzenji mu lyoko, ne Davida ayepo shika ishikisho yenji yo membo. ¹⁰ Saule ayepo eleka kuyumbela Davida pa limota no ñothzi, ambene Davida ayepo pima, ne Saule ayepo yumba mu limota. Davida ayepo cila no kupanduka owo ushiku. ¹¹ Saule ayepo tuma anu ku njiyo thza Davida kukamuundamena ci amupae mashikushiku. Mikali, munu wa Davida, ayepo mutongwela, ''Ngeci ko cili onu ushiku, peunja wapaiwa.'' ¹² Ne Mikali ayepo punishela Davida mu lihaulo. Ayepo thza kucila ne ayepo panduka. ¹³ Mikali ayepo shimba shiningi sho kuyuwa kushilalisha pa olili. Nehoni ayepo paka musamo wo ohunga wo membe ku mutwi washo, ne ayepo shithsika ito. ¹⁴ Saule apa atumine anu kukashimba Davida, Mikali ayepo waambela ci, ''Akola.'' ¹⁵ Nehoni Davida ayepo tuma anu kukamona Davida; ayepo amba, ''Muka mulete kukwange kuli pa olili, ci nanimupae.'' ¹⁶ Anu apa aingenine, mumone, shiningi sho kuyuwa kuma sha lalile po lili no musamo wo ohunga o membe ku mutwai washo. ¹⁷ Saule ayepo amba kwa Mikali, ''Iñe onaniangelela no kushiyelela mukwa shithzimbo shange ci athze, ne ci apanduke?'' Mikali ayepo tawa Saule, ''Kuma ananiambela ci, 'Onishiye nithze. Nikupaele iñe?''' ¹⁸ Honi Davida ayepo cila no kupanduka, ne ayepo thza kwa Samuele ku Rama no kukamutonwela yoihe ei anakwama Saule kukwenji. Nehoni aye na Samuele awopo athza kukala mu Nayoti. ¹⁹ Saule kuma natongweliwa ci, ''Omone, Davida oli ku Nayoti mu Rama.'' ²⁰ Nehoni Saule ayepo tuma anu kukakwata Davida. Apa amonine apolofita owangi kwa polofita ne Samuele kunemana ci yoiliyo mukulu wo, mupepo wa Nyambi aopo ukeya kwa anu a Saule, ne nawo awopo apolofita. ²¹ Saule apa atongweliwile ei, ayepo tuma anu wamweya, ne nawo po apolofita. Ne Saule ayepo tuma anu kalo lomushihatu, ne nawo kalo po apolofita. ²² Nehoni naye po thza ku Rama ne ayepo kuma ku lishima lyo lithzungi eli lili ku Seku. Ayepo ipula, ''Samuele na Davida kupi ali?'' Munu yumweya ayepo amba, ''Omone, ali ku Nayoti mu Rama.'' ²³ Saule ayepo thza ku Nayoti mu Rama. Nehoni mupepo wa Nyambi aopo ukeya kukwenji, ne naye po polofita kukakuma apa nakakumena ku Nayoti ku Rama. ²⁴ Ayepo hulula ito yenji ne ayepo polofita pa meho a Samuele. Ayepo kala shiñekañeka mutanya wouhe no ushiku wouhe. Eshi po shiletela anu ku ipula ci, ''Saule ne naye yumweya wa apolofita nji?''