¹ Apa amanine kuamba na Saule, mupepo wa Jonatani awopo ulikwata no mupepo wa Davida, ne Jonatani ayepo muhima eci omu alihimena aye shinda. ² Elyo liyuwa mwene Saule ayepo shimba Davida kukalanga nenji; kanamutaethza kuhuka ku njiyo thza tata wenji. ³ Nehoni Jonatani na Davida awopo alikwata ombusha mukonda Jonatani kuma amuhimine eci omu alihimena aye shinda. ⁴ Jonatani ayepo hulula shito eshi avatile no kushipa Davida no ilwisho yenji, no mwele wenji, mungamba wenji no mwiya. ⁵ Davida kuma nathzanga kokuhe oku namutumanga Saule, ne kuma naloishanga. Saule ayepo mupaka muka kuendisha akwelume o mvo. Anu wahe kuma aloelile no apika a Saule nawo kuma aloelile. ⁶ Apa ahukile ku lyumbo kutunda ku kulwisha Afilisita, ambuyama awopo atunda ku mambongi oahe o Isilaele, kwa imba no kukina, kunaliwana na fumu Saule, kwashika mangoma, kwananyanyuka, kalo kwanashimba inu yo kushika membo. ⁷ Ambuyama awopo aimba kwa pepa munu na mungenjenji. Awopo aimba, ''Saule onapaa enji owangi, ne Davida onapaa enji awangi nene.'' ⁸ Saule kuma aanjipile nene, ne eli limbo kaliloelile. Ayepo amba, ''Anapa Davida owangi nene, ambene ame anipa owangi pohuma. Eshi nga shifotahala kukwenji shimweya ne shinñe ngeci kali shime ofumu?'' ⁹ Kutunda elyo liyuwa Saule ayepo taneka Davida ko maayalo oamango. ¹⁰ Liyuwa lyahatileko mupepo oumango kutunda kwa Nyambi awopo ukeya kwa Saule ne ayepo yavana kuli mu njiyo thzenji. Ne Davida ayepo shika ishikisho yenji yo membo, eci omu nakwamena liyuwa no liyuwa. Saule kuma akwatile ñothzi mu lyoko lyenji. ¹¹ Saule ayepo kuha ñothzi, mukonda kuma aanekelile ci, ''Niyumbele Davida pa limota.'' Ambene Davida kuma apine lwili kwa Saule ku mwikalelo okengeyo. ¹² Saule kuma ayapile Davida, mukonda Shinda sha moyo kuma akalile kukwenji, ambene kuma atundile kwa Saule. ¹³ Ne Saule ayepo mutundisha kukwenji ne ayepo mupaka kuendisha mashwalale ita likumi. Omo moliyo athzelelile Davida ne ayepo kahuka kwa anu. ¹⁴ Yoihe nakwama Davida kuma naiende shuwana mukonda Shinda sha moyo kuma akalile nenji. ¹⁵ Saule apa amonine ci yoihe akwama yaloa, ayepo muyapa. ¹⁶ Ambene ana Isilaele wahe no ana Juda wahe kuma ahine Davida, mukonda kuma athzile ne kukahuka kukwo. ¹⁷ Nehoni Saule ayepo amba kwa Davida, ''Oyu mwanange o mbuyama o mukulu Merabi. Kenge nimukupa ci omukwame munu woe. Ne okale no ondume pohuma kukwange ne olwe mvo thza Shinda sha moyo'' Mukonda Saule kuma aayalile ci, ''Lyoko lyange lelo lyamukwata, ambene lyoko lya Afilisita limukwate.'' ¹⁸ Davida ayepo ambela Saule, ''Yame nolye, no apange ne alye, nji shikuta sha tata mu Isilaele ne ine, ci ame nipiluke hemwenya fumu?'' ¹⁹ Ambene pa shikati apo Merebi, mwana Saule, afotile kupiwa kwa Davida, sholiyo shikati apiwile kwa Adriele oku Mehola ci amukwame munu wenji. ²⁰ Ambene Mikali, mwana Saule o mbuyama, kuma ahime Davida. Awopo atongwela Saule, ne ayepo loela. ²¹ Nehoni Saule ayepo anekela, ''Kenge nimumupa, ci apiluke kashaka kukwenji, ne ci lyoko lyo Afilisita limulwishe.'' Ne Saule ayepo amba kwa Davida lomushili, ''Kenge opiluka hemwenyange.'' ²² Saule ayepo tumena apikenji, ''Mukaambe na Davida kumbali, ne mukaambe ci, 'Omone, fumu onakuloela, no apike enji wahe akuhima. Nehoni opiluke hemwenya fumu.''' ²³ Ne apika a Saue awopo akaamba ao maywi kwa Davida. Nehoni Davida ayepo amba, ''Amwe mwaanekela ci kupiluka hemwenya fumu shinu shoshoto, ame shihutu, no kukana kukutekiwa?'' ²⁴ Apika a Saule awopo akamutongwela maywi aa naamba Davida. ²⁵ Nehoni Saule ayepo amba, ''Mukaambela Davida ci, 'Fumu kafotile shionda kukwoe afota pohuma itumba shita yo Afilisita, ei itundishiwa kwa akwethzimbo ya fumu.''' Honi Saule kuma aayalile kuwisha Davida ko lyoko lya Afilisita. ²⁶ Apikenji apa atongwelile Davida aa maywi, Davida kuma aloelile kupiluka hemwenya fumu. ²⁷ Ao mayuwa kwashime kupwa, Davida ayepo thza na anu enji ne awopo akapaa Afilisita ita ili. Davida ayepo kaleta itumba yo no kuipa kwa fumu yoihe koinakwana, ci apiluke hemwenya fumu. Ne Saule ayepo mupa mwanenji Mikali ci apiluke munu wenji. ²⁸ Saule apa amonine, no kulimuka ci Shinda sha moyo oli kwa Davida, ne kalo Mikali, mwana Saule, onamuhimi, ²⁹ Saule ayepo yapa nene Davida. Saule ayepo kwatelela kukala mukwa shithzimbo sha Davida. ³⁰ Nehoni ana o mafumu o Afilisita awopo akeya ku mvo, ne eci omu nakukalelanga apa akeile kunalwa, Davida yoliyo wakwamine shuwana kupita apika a Saule wahe, ne lithzina lyenji alyopo lilemekiwa nene.