¹ Omu Petulu na Yowano bakele na kuys mu tembele hathimbu ya kulomba, thimbu yamuchitanu na biwana. ² Omu munalume uje wakele na katengu kufuma mwimo lya baina bamwambate kuchikolo cha Tembele balukile kubwaha. Bakele nakumwaka haje hatangwa hatangwa mangana athe kulomba bwana kuli baje bakele na kukobela mu Tembele. ³ Omu wamwene Petulu na Yowano kuyehi na kukobela mu Tembele, wabalombele bwana. ⁴ Petulu, watalele mesho hali ikeye, na Yowano, wendekele ngwendi, "Tukenge." ⁵ Uje munalume wakatengu wabakengele, kukulahela kutambula byuma bimo kuli bakebo. Oloni Petulu endekele ngwendi, "Siliva na Ngolonde kunjethi nabyo. ⁶ Oloni binjili nabyo, njikwana. Mulithina lya Yesu Kilisitu waku Nazaleta, enda." ⁷ Wa mukwatele naliboko lya chilyo, Petulu wamujundwile, hajebene mendi na tuthendengele twa uje munalume byakwatele bindzili. ⁸ Watumbukile helu, munalume wakatengu wemanene na kuputuka kwenda; wakobelele hamo na Petulu na Yowano mu Tembele, ali na kulwendela, kutumbuka, na kuthzumbangeya Njambi. ⁹ Banu boshe bamumwene omu endele na kuthzumbangeya Njambi. ¹⁰ Bathzikile ngwabo ikeye uje munalume wakele nakulomba bwana hachikolo cha Tembele; cho bashulile nabi komwetha na kulokomokela mwafwa wabije byalingiwile kuli ikeye. ¹¹ Oku na kwatelela kuli Petulu na Yowano, banu boshe hamo bashatukilile kuli bakebo muchimbimbi chije batumbwile, kulikomokela chakama cha Solomoni. ¹² Omu Petulu wamwene ngechi, akumbulwile banu, "Eni banaluma ba Isalela, bika mulikomokela? mwafwa bika muli nakutukengela, ngwe tuna mwendetha na bindzili byetu nambe bya Njambi? ¹³ Ou Njambi wa Abilahama, nawa Isake, nawa Yakoba, Njambi waba tateyetu, nana bumpahu kuli ngamba yendi Yesu. Ikeye umo mwanene na kumubyana kemesho a Pilatu, Omu athinganyekele kumwecha. ¹⁴ Mwabyanene umo wathzila na kulongwa, oloni mwalombela chihwangwa ba myecheleye. ¹⁵ Mwathsiyile Thina ya mwonyo, ou Njambi wathangwile ku bathsi—cho tunapu bakaleho webi. ¹⁶ Hamaputukilo a kukulahela mulithzina, lyendi linatungu ou munalume ou munamono nakuthzibuka, kupwa wakutama. Lukulahelo kwitila muli Yesu lunamwana kulikangula halutwe lweni boshe. ¹⁷ Cho, bandolome, njathzibuka mwalingile chakujeneka kuthzibuka, mubalingele ba ntwama beni. ¹⁸ Oloni byuma Najmbi walibangele kwendeka na natunwa twaboshe tupolofita, ngwabo Kilithitu wendi napande kuyanda, oloni netetha kushongo. ¹⁹ Tundeni kububi, cho, na kutenguluka, mangana bubi bweni babu papanganye, ²⁰ mangana kukeje thimbu ya kuhwima kutunda halutwe ya Shukulu; mangana akatume Kilisitu ibana mishakwila, Yesu. ²¹ Ikeye umo mwilu napande kutambula noho thimbu yakwingithaho byuma byoshe, ebi Njambi endekele kufuma thimbu yakuthañulu mukanwa ka tupolofita bakujela. ²² Mosesa bene ngwendi, 'Shukulu Njambi washakwile Kapolofita wakufwa yange hakati kabandolome beni. Ukathzibilile byoshe akendeka kuli yobe. ²³ Chikasholoka ngwe munu woshe ou akajeneka kutolilila kuli uje Kapolofita baka mumanuthula njwa njwa kufuma hakati ka banu.' ²⁴ Eyo, na boshe tupolofita kutunda kuli Samwele na baje bethzile munima yendi, bendekele na kwambulula awa matangwa. ²⁵ Mu bana ba tupolofita na litabathano Njambi walingile kuli bakuku yeni, omo wendekele kuli Abilahama, 'Mu mbuto yobe miyati yoshe ya hathi ya kithswiwa.' ²⁶ Hanima Njambi washakwile ngamba yendi, abangele kumutuma kuli yeni, mangana ami kithule ha kumitengulula yeni boshe kubekenya bweni."