¹ Omu Petulu na Yowano bakele nakwendeka ku banu, tupilisitu na kapitau wamu tembele na ba Sanduke bethzile kuli bakebo. ² Bakele manene mubukalu hakulinga Petulu na Yowano bakele na kulongetha banu na kwambulula muli Yesu kuthanguka kutunda ku bathsi. ³ Cho bakambekele maboko hali bakebo na kubaka munjele kweta nakulyamukwabo mutondo, akulinga yakele oni bungwethzi. ⁴ Nambe ngocho bwingi bwa baje banu baba thzibililile uje muthzimbu bakulahelele; na bwingi bwa banu ba bakulahelele bakele ba kutonda kweta ku makulukathzi a tanu. ⁵ Cho chasholokele ha likaki ngwe baje baka kuyula, bakulunu, na baka kuthoneka bali wanene hamo mu Yelusalema. ⁶ Cho Ananiyasi Kapilisitu wakama kwa kele, na Kuyafase, na Yowano, na Alekizanda na boshe baje bakele ba bushoko ba uje Kapilisitu wamukulunu. ⁷ Hanima ya kwimika Petulu naYowano mu kati kabo, cho ba behwile ngwabo, "Nabindzili muka, indi muli thzina lyeya, mulinakulinga ebi?" ⁸ Cho haje bene, Petulu, mukushulamo na Muthzithzime wa kujela, wendekele kuli bakebo ngwendi, "Yeni bakakuyula banu, na bakulunu, ⁹ umona ngwe muli na kututhompetha lelo ha mulonga wa bilinga bya bibwa bituna lingile kumunalume nakele na kubinja, cho lalo na ngila oyo ou munalume ba na mubukilamo, ¹⁰ cho thzibukeni ngweni ou munalume nemana kumesho eni wakulikangula mu lithzina lya Yesu Kilisitu wa ku Nazaleta, owo mwa shukikile, olojo Njambi wa muthangwile kutunda ku bathsi. ¹¹ Yesu Kilisitu ikeye uje limanya yeni baka kutunga mwa yeluwithile olojo ni bana lipwitha kupwa linanya lya mumango. ¹² Kukwethi lalo kulyobola chi chili mu munu weka, mwafwa ku kwethi lithzina lyeka mwithi ya lilu olyo ba nana hakati ka banu olyo linatha kutwobola." ¹³ Chojo omwo muba mwene bundume bwa Petulu na Yowano na kuthzibuka ngwe bapwile lika banu ba ngocho bakwilika na kulilongetha, ba likomokelele manene, cho lalo ba putukile kuthzibuka oni ngwabo Petulu na Yowano bakeleko na Yesu ha thimbu imo. ¹⁴ Mwafwa mu bamwene uje munalume iba kangwithile nemana nabo baje banu kubakele lalo na bimo bya kwendeka hali echi. ¹⁵ Nambe ngocho hanima ya kuleka baje bapositola ngwabo batuhukemo muje mu chiwano cha mbunga, ba putukile kuli yongola mukati kabo. ¹⁶ Chojo bendekele ngwabo, "Tulinga bikajo kuli aba banalume aba? Mwafwa buthunga bwa kulinga ngwabo chimwetho chakukomowetha ba na chilingi kwitila muli owo woshe ya yoya mu Yelusalema, echi kutwatha ku chibyana nambe kamandondo. ¹⁷ Olojo ha kulinga ngwetu echi kethi chiya manene puho ku banu boshe, tuna pande kuba thiñika mangana kethi lalo bendeke ku munu uli woshe mu lithzina eli." ¹⁸ Chojo baba thanenene lalo muje mukati na kuba shika ngwabo kethi bendeke lalo nambe kulongetha lalo ha lthzina lya Yesu. ¹⁹ Olojo ba Petutlu na Yowanoba kumbulwile nakwendeka kuli kabebo ngwabo, "Lyangwileni yeni babenya ngwe chika cha chibwa kumesho a Njambi chituna pande kulinga yetu, kwononokela yeni kutubakana ikeye. ²⁰ Oloni yetu kutwatha kwechela kwendeka ha byuma obyo bi tunalimwena na kuli thzibila yetu babenya." ²¹ laho ha thimbu ije, mwafwa banu boshe bakele na kuthzumbangeya Njambi hali bije byoshe bibya lingikile mukati kabo. ²² Uje munalume ba kangwithile mu chifwa chije cha ku komowetha wakele na myaka yakutubakana makumi a wana a kuthemuka. ²³ Hanima ya ku bechelako, Petulu na Yowano bethzile kuli banu babo cho bambulwile bije byoshe ba tupilisitu ba bakulunu na bakulunu bendekele kuli bakebo. ²⁴ Chojo omu bathzibile bije, boshe bajundwile majwi abo mu bumo kuli Njambi na kwendeka ngwabo, "Shukulu, yeni mwa tangele melu na libu na mashali, na bije byoshe bije byoshe byakalamo. ²⁵ Kwitila mu Muthzithzime wa kujela mwendekele na kanwa ka ngamba yeni, tate yetu Ndabiti, 'Bikajo aba baka mafuti ba lubalelele, cho na ba bakele naku yongola byuma bya ngochongocho?' ²⁶ Cho mwendekele ngweni, 'Bimyene ba hathi ba liwanene chiwano, na baka kuyula bali kungulwile hamo na kulwa naShukulu, na kulwa na wakubwabetha wendi.' ²⁷ Mwa buthunga bene, ba Helonde na Pontiasi Pilato, kwakelako na boshe baka mafuti na bana ba Isalela, boshe ba liwanene chiwano muno mu nganda na kulwitha ngamba yobe wa kujela Yesu, owo uwa bwabethele. ²⁸ Boshe bali kungulwile hamo na kulinga bije byoshe liboko lyobe na biyongola byobe bya tumbile laja ngwabo bikebyo bibika lingika ku lutwe. ²⁹ Namu chifwa echi, Shukulu, talethetheni bwino ha bukenya bwabo na kwana kuthimpa kuli bangamba bobe mangana bambulule muthzimbu wobe ha kujeneka lyoba nambe kamandondo. ³⁰ Ololeni liboko lyeni mangana muka ngwithe na kwana bimwetho nebi bya kukomowetha kwitila mu lithzina lya ngamba yeni wa kuthzila Yesu." ³¹ Chojo hanima yakulombela, uje mwela mu ba kungulukilile wa liningangele, cho boshe ba shulilemo na munthzithzime wa kujela cho bambulwile lijwi lya Njambi na bundume. ³² Bwingi bwa baje ba kulahelele bakele na mbunge imo lika na mwonyo umo lika. Ku kwakele nambe lalo umo wa mwene ngwendi choshocho cha kele nacho chakele chendi likalyendi embwe, olojo byoshe bakele nabyo bya kele byabo boshe. ³³ Chojo bapositola bakele na kwambulula muthzimbu wabo waku thanguka kwa Mwene Yesu na binthzili byaku komowetha, cho na ngothzi yakama ya kele hali banu boshe. ³⁴ Kukwakele munu nambe umo mukati kabo wa jenekele echi nambe chije, mwafwa boshe baje ba fukile libu nambe binjubo ba bilandethele cho banenele bije bimbongo byoshe biba wanene ha ku landetha byuma byabo ³⁵ na kubi kungwilila ku mendi a bapositola, cho ba bi pangelele kuli umo na umo kwetheketha na ku kalekeya kwabo. ³⁶ Yosefa, owo ba Positola ba thanene ngwabo Mbanambasi (Kulumbununa Mwana Muka ku Thzembeleka), owo ka Lebi, munalume wa kusaipulasi, ³⁷ wa landethele lihya lyendi na kunena bimbongo bije na kwija na kubitula ku mendi a bapositola'.