¹ Jesu wakamba kuti basikwiya bakwe, "Yakukonziki kuti zilebyo kazitawo, pele mawe kuli oyo muntu uzyeta! ² Chalikubota nguwe kuti angwe bbwe munsingo yakwe okumu fusila mu lwizi kwinda kuti etelezye umwi wabanini kulebwa. ³ Amulilange nobamukamwini.Na uzyalwanyoko wabisya, mupatokile, ape na kuti wempwa, mujatile. ⁴ Kuti na wakubisizya zindi, zili musanu otobile mubuzuba bomwi, ape okuza zindi zili musanu otobile kuli yebo, okuzo amba kuti, 'ndaempwa,'welede kumujatila!" ⁵ Ba apostolo bakambila mwami kuti, "Yungizizya lushomo lwesu". ⁶ Mwami wakamba kuti, "Kambe mwajesi lushomo mbuli nseke yamasitadi, ninga mwamba kuli oyu musamu womubula kuti, 'Nyukuka awa, mponya ukabyalwe mulwii, 'uyo mumvwida. ⁷ Pele ngwani alinwebo, ujesi mubelesi ulima na wembela mbelele, ambe kuti kulinguwe akotoka kuzwa kumunda, 'Koza inawa uzokale ansi ulye'? ⁸ Takoamba kuti kulinguwe,'Ndibambile cokulya ndilye, ulibambe omukanda kuzibya undipambwide ndi sangune kulya okunwa. Nkokuya yebo notakalye okunwa'? ⁹ Tamulumbi mubelesi kambo wakachita zintu nzyakalaililwa, ulalumba na? ¹⁰ Nikuba namu anwibo ape, mwachita zyonse nzimwalaililwa, mwambe kuti, 'Tuli babelesi buyo. Twachita buyo nchitwaelede kuchita."' ¹¹ Kwakaba namu mulwendo lwakwe lokwinka ku Jelusalema, wakainda akati ka Samaliya o Ngalilaya. ¹² Nakanjila mumunzi umwi, okuya wakaswanana abalumi bali kumi basichinsenda. Bakaima kule anguwe ¹³ bakaongolola ahulu majwi abo, bakati, "Jesu, Mwami, tufwide luse." ¹⁴ Nakababona, wakamba kuti kulimbabo, "Kamuya mukalitondezye kubapaizi." Nibal kuyo bwenda bakasalazigwa. ¹⁵ Pele umwi wabo nakabona kuti wapona, wakapiluka, ejwi mpati kali kulumbaizya leza. ¹⁶ Wakavundama kumaulu a Jesu, kali kumulumba. Ino wali mu Samaliya. ¹⁷ Mponya Jesu wakamba kuti, "Tabakasalede bali kumi? Mbalikuli busanwa abone? ¹⁸ Takwe bamwi bakapiluka kuzolumbaizya Leza, kunze oyu muzwa kule?" ¹⁹ Wakamba kuti kulinguwe, "Nyamuka, winke. Lushomo lwako lwakufutula." ²⁰ Mukubuzigwa ama Falisi kuti bwami bwa Leza busika lili Jesu wakabataba okwamba kuti, "Kusika kwa Bwami bwa Leza takubonwi. ²¹ Ape tabayoambi kuti , amubone, mbobu!'na, 'Mbombuya!'Amubone, Bwami bwa Leza buli mukati kenu." ²² Wakamba kuti kuli basikwiya, "Mazuba ayobuza nimuyoyanda kuzobona buzuba bumwi bwamazuba o Mwana o muntu, kono tamuzobuboni. ²³ Mponya bazoamba kuti kulinwebo, 'Amubune, kuya! Amubone, awa!'Pele mutakaila na mutakabachilizi, ²⁴ Mbonya mbuli kulabi mbukabala kubbazu lwowi, Mbonya obo mbwayoba mwana o muntu mubuzuba bwakwe. ²⁵ Pele chokusanguna welede kupenga zinjizinji okukakwa kulibesunu. ²⁶ Mbonya mbukwabwede mumazuba a nowa, nikuba namu kuyoba mbao nyina mumazuba o mwana o muntu. ²⁷ Bali kulya, bali kunwa, bali kukwaata, ape balikupegwa muma kwatwa kusikila buzuba obo Nowa mbwakanjila mubwato emiyoba yakasika okubajaya bonse. ²⁸ Munzila iswana, nikwaka chitika namu mumazuba a Loti balikulya okunwa, balikula okuzya, balikulima okunwa, ²⁹ Pele mubuzuba obo Loti nakazwa mu Sodoma, kwakaloka muliolo omusalufu kuzwa kuzwa kujulu okuba tenta bonse. ³⁰ Kuyoba mbonyina namu mubuzuba mbwata zolibonye mwana o muntu. ³¹ Mubuzuba obo oyo uli aciluli atazo seluki kutola lubuno lwakwe luli munganda, ape munzila iswana anguwe uli kumunda atakapiluki. ³² Amuyeye muka Loti. ³³ Kufumbwa uyanda kufutula bumi bwakwe, uyobuswekelwa, Pele kufumbwa wa swekelwa bumi bwakwe uyobujana. ³⁴ Ndamyambila kufi, mumasiku ayo kunoli bantu bobile abulo bomwi. Umwi uzotolwa, umwi uzosyala. ³⁵ Kunoli banakazi bobile bano twida antomwi. Umwi ozotolwa, umwi uzosyala. ³⁶ Kunoli balumi bobile, umwi uzotolwa umwi uzosyala. ³⁷ Bakamubuzya, "Okuli, Mwami?"Wakamba kuti kulimbabo, "Oko kuli mutunta, nkubayo bungana basikube.