¹ Ino bonse basimutolo abamwi basizibi bakuza kuli Jesu kuzo muswilizya. ² Ma Falisi aba lembi ba katongoka kuli umwi oumwi, kabati, " Oyu muntu utambula basizibi, ape ulya ambabo. ³ Jesu wakamba mumukozyano kuli mbabo, wakati, ⁴ "Gwani wenu, kuti ujesi mbelele zili mwanda omwi mponya yomwi yasweka, takozi siya ezi zili makumi alifuka efuka musaka, okuchilila yomwi ati mane aijane ? ⁵ Mponya awo aijana ulaisempula amakuko akwe oku nonenwa. ⁶ Asika kunganda, witabe zinyina aba bambwanyina kati kuli mbabo, amusekelele amibo kambo ndaijana mbelele yangu yaswekide.' ⁷ Ndamba kuli ndenwe kuti nikuba namu, kuyoba sekelela kujulu kambo kasizibi omwi oyo wasanduka, kwinda bantu baluleme bali makumi ali efuka batayandikani kusanduka. ⁸ Na ndaimbe mwanakazi ujesi siliva zilikumi, nakuti waswekelwa kakobili komwi, takoyasya lambi, kutanyela munganda, okulangola kabotu kabotu, ati mane aijane? ⁹ Aijana, ulabaita atomwi bezinyina ababambwa nyina,kambo, 'Amusekelele amibo, kambo ndaijana kobili njida swesizye. ¹⁰ Nikuba namu andimwambile kuti, kuli kusekelela kupati ku ba ngelo ba Leza akambo kasizibi womwi wasanduka." ¹¹ Mponya Jesu wakati, "Kwali mwalumi wajesi bana bobile, ¹² mponya munini wabo wakati kuli baisi, 'Tata, ndipe chibela cholubono chidi ngeme.' Mponya wakabanya lubono lwakwe kubana bakwe bobile. ¹³ Kakutakwe mazuba manji akaida mwana munini wakazibika atomwi zyense zyajesi okwinka kuchisi chali kule, mponya wakakusinya lubono lwakwe lonse mubupono bobu fubafuba. ¹⁴ Ino mponya nakamanisya zyose, inzala pati yakayamba muchisi echo, mponya wakatalika kupenga. ¹⁵ Wakainka okuyo lijizya musebeze kumuntu umwi womuchisi echo, oyo wakamutuma kumyunda yakwe kuti kape zokulya ngulube. ¹⁶ Walikulya busenga mbuzya likulya ngulube kambo takwe naba omwi walikumupa kufubwa chitu. ¹⁷ Kono mwani nakalileya wakati banji babelesi ba batata bajesi zikwa zinji kwinda, mponya ndili ano ndiliku mana kambo nkezala! ¹⁸ Ndila nyamuka okuzwa kuno kuseno ndike kuli batata, mponya ndiwomba kuti kuli nguwe, "Tata, ndakabisya kujulu okuli yebo. ¹⁹ tandi chelede kwitwa kuti ndili mwana ko; Ndibike buyo mbuli umwi waba belesi bako." ²⁰ Mponya munini wakanyamuka okwika kuli baisi. Awo nachilikule, baisi bakabona oku mufwia luzyalo mponya wakamu chijanina, okumubukatila, ape okumumyota. ²¹ Mwana wakati kuli nguwe, 'Tata, ndakabisizya julu aibo syelende kwitwa kuti dili mwanako.' ²² " Isi wakati kubabelesi bakwe,' Amwete kufamba chokuzwata chibotu, mumuzwatike, ape mumubike enwenwe ajaza yakwe, ape ezyeta kumaulu akwe. ²³ Mponya mwete ngombe inenede mwi jaye. Atu sekelele tulye! ²⁴ Kambo mwanangu wafwide, ino wabuka. Wali swekide ino wajanika.' Mponya ino bakasekelela. ²⁵ "Mponya mwana kwe mupati wali mu munda. Na kasika afwi fwi engada, wakavwa baimba okuzyana. ²⁶ Wakaita mubelesi womwi okubuzya ino echi chambazi. ²⁷ Mubelesi wakti kuli nguwe, 'Muzyalwa nyoko wapiluka anganda ponya bauso bajaya ngombe ya neneide kambo wapilubuka kali kabotu.' ²⁹ Mwana mupati wakanyema apeta kwena kanjila mukati, mponya baisi bakazwida anze okuzo mukombelezya. ²⁸ Kono mwana mupati wakataba kwamba kuti kuli baisi,' Amulange eyi myaka minji jindamubelekela anga muzike, ape takwe ninda katyola mulawo wako, kono takwe niwakadipa nikuba kapongo kanini kuti ndisekelele abezuma, ³⁰ kono oyu mwanako nasika, oyo waka nyonyona mbono zyako ama hule, wamujaila ngombe ineneide.' ³¹ Baisi bakati kuli nguwe, 'Mwanangu, uli amibo chidi chese, ape zyesi ezyo zyenjesi zizyako. ³² Kono chibotu kuti tulye okunonenwa, kambo muzya lwa nyoko oyu walifwide, ino wabuka; waliswekide ponya ino wa janika."