¹ Mwami wakamba kuti kuli Mozesi: ''Ambila bapaizi, bana ba Aloni, o kwamba kuti mbabo, ''Kutabi nanga omwi akati kenu ulisofwazya kuli abo bakafwa akati kabantu bakwe, ² ati bomukowa weniweni-banyina, baisi, mwana akwe mwalumi, mwana akwe mwanakazi, bazyalwanyina, ³ na mucizi wakwe utanakuzyala uli afwifwi anguwe, mbokunga takwe mwalumi kaambo ulakonzya kulisofwazya kaambo kakwe. ⁴ Pele tayelede kulisofwazya nguwe kuli bamwi bomukowa ape kuti atasampuki. ⁵ Bapaizi tabelede kugela mumitwe yabo na kugela mumambali ezilezu na kutenda mibili yabo. ⁶ Bayelede kuba basalali kuli Leza wabo okutanyonyona zina lya Leza wabo, kaambo bapaizi batula zilyo zyo Mwami zituzyo, cinkwa ca Leza wabo. Nkabela namu bapaizi belede kuba basalali. ⁷ Tabelede kukwata kufumbwa mwanakazi simamambe olokasofwazigwe, ape tabelede kukwata mwanakazi wakalekwa kuzwa kumulumi, kaambo balanzene kuli Leza wabo. ⁸ Ulelede kumwanzanya, kaambo ngonguwe utula cinkwa kuli Leza wako. Welede kasalala kuli yebo, kaambo mebo, Mwami usalalazya yebo, ndilasalala. ⁹ Kufumbwa mwana musimbi o mupaizi kufumbwa ulisofwazya kukucita bumambe usofwazya isi. Welede kutentwa. ¹⁰ Oyo mupaizi mupati akati kabazyalwanyina, omo mumutwe mafuta aleledekedwe mwakatilwa, oyo wakasalwa kuzwata jansi bbotu lyo mupaizi mupati, taelede kugela masusu akwe na kyaula zizwato zyakwe. ¹¹ Toelede kwinka kufumbwa kuli mutunta ubikidwe kuti utalisofwazi, naba baisi na banyina. ¹² Mupaizi mupati tayelede kuzwa kucibaka cisalala comucikombelo na kusofwazya busena busalala bwa Leza wakwe, kaambo wakananikwa musini obupaizi mupati amafuta alelekedwe o Leza wakwe. Ndime Jehova. ¹³ Mupaizi mupati welede kukwata nakalindu abe mwanakazi wakwe. ¹⁴ Tayelede kukwata wakafwidwa, wakalekwa mwanakazi, na mwanakazi sibumambe. Takwe nayokwata ali oyu musyobo banakzi. Welede buyo kukwata nakalindu kuzwa kubantu bakwe. ¹⁵ Kokuti atasofwazyi bana bakwe akati kabantu bakwe, mbondili ndime Jehova, umusalazya. ¹⁶ Mwami wakambila Mozesi, wakamba kuti, ¹⁷ ''Ambila Aloni okumwambila, 'Kufumbwa oyo kulunyungu lwako kwiindila mumazyalani ujesi kapenda, tayelede kuswena kuzotula zilyo kuli Leza wakwe. ¹⁸ Kufumbwa muntu ulakapenda tayelede kuswena ku Mwami, mbuli muntu mofu na muntu utakozyi kwenda, umwi oyo muba mbasumpemo na ulampya cizo, ¹⁹ muntu cihole ku janza na gulu, ²⁰ muntu ula musana na kandondoyo, na zilonda, bwele, na bwalumi bwakwe bwakanyongana. ²¹ Takwe muntu akati kolunyungu lwa Aloni mupaizi ula kapenda ukonzya kuswena fwifwi kuzotula zipo zyakapangwa omulilo ku Mwami. Muntu ulinamuya ula kapenda: tayelede kuswena afwifwi kuzotula cinkwa kuli Leza wakwe. ²² Welede kulya zilyo zya Leza wakwe, naba ziimwi zisalalisya na zimwi zisalala. ²³ Nekubanamu, tayelede kunji;la mukati ecisitilizyo na kuswena afwifwi ecipaililo, kaambo ulakampenda, kokuti atasofwazi cibaka cangu cisalala, mbondili ndime Mwami, uba salazya. ²⁴ Mponya Mozesi wakamba aya majwi kuli Aloni, kubana bakwe o kobantu beense boku Isilayeli.