¹ Honi Jesu ou apitile, ayepo mona munu okakuana kumona shimbi amuelekelile. ² Afundishiwi enji awopo amuipula, ''Mufundishi, elye wakwamine shivi , oyu mukwelume nji ashemi enji, eshi shaletile ci alekiwe kuli kapupiutwa?'' ³ Jesu ayepo tawa, ''Kali ci oyu mukwelume kuma akwamine shivi nji ashemi enji kukwama shivi, unone ci ekwama ya Nyambi imonahale kukwenji. ⁴ Twaloela kukwama ekwama yoyu nanitumu uno mutanya. Ushiku wakeya apo kwakupila munu oyu wakutwesha kukwama. ⁵ Ou nishili muno mu kaye yame, yame mwethzi o kaye.'' ⁶ Jesu ou amanine kuamba ei enu, ayepo thsipela pashi, ayepo yulisha muve ko mate, ne ayepo muwesha muve okuyula pa meho enji. ⁷ Ayepo muambela, ''Othze okalihupe mu kaviya ko Siloamu'' (kokutongola ci ''Oyu natumiwa'') ⁸ Awa anatungu noyo mukwelume nawa amumonangile kulomba awopo amba, ''Oyu kali yoliyo mukwelume walombangile?'' ⁹ Wamweya awopo amba, ''Yoliyo.'' Wamweya awopo amba, ''Kwahi, unone alipitula nenji.'' Unone ayepo amba ci, ''Yame.'' ¹⁰ Awopo amuambela, ''Honi meho oye ngepi anathsikuka?'' ¹¹ Ayepo tawa, ''Mukwelume oyu ishiwa Jesu yoliyo wayulishile muve no kuuwesha pa meho ange no kuniambela ci, 'Othze ku Siloamu okalihupe.' Honi ame po nithza kukalihupa, ne po nimona.'' ¹² Awopo amuambela ci, ''Kupi ali?'' Ayepo tawa, ''Kanilimuka.'' ¹³ Awopo aleta oyo mukwelume wakanangile kumona kwa afalisi. ¹⁴ Honi neli lyo Sabata Jesu ou ayulishile muve no kuthsikula meho enji. ¹⁵ Honi kalo afalisi awopo amuipula eli nakukeya ci atweshe kumona. Ayepo wambela, ''Kuma apakile muve o kuyula pa meho ange, ame po nikalihupa, ne honi namona.'' ¹⁶ Afalisi wamweya awopo amba ci, ''Oyu munu katundu kwa nyambi mukonda katuleka liyuwa lyo Sabata.'' Wamweya awopo amba, ''Munu o shivi ngepi nga akwama enu shokengeya?'' ¹⁷ Honi akopo kukala kulihanda mukaci ko. Honi awopo aipula oyo wakanangila kumona kalo, ''Owe ne wamba ine kukwenji, ayepo onathsikula meho oye?'' Oyo wakanangile kumona ayepo amba, ''Mupolofita.'' ¹⁸ Honi Majuda kanatawa ci oyo nakananga kumona kanamonanga ne ci onapolo shime ou aishile ashemi enji. ¹⁹ Awopo aipula ashemi enji, ''Mwanenu oyu muamba ci kuma aelekiwa kuli kapuputwa? Honi amona ngepi?'' ²⁰ Honi ashemi enji awopo awa tawa ci, ''Atwe twalimuka ci mwanetu ne kalo kuma twamuelekile kuli kapuputwa. ²¹ Eli kunakeya ci amone, katulimuka, kalo noyu nathsila meho enji katumulimuka. Mumuipule, mukulu. atwesha kuliambela.'' ²² Ashemi enji kuma ambile ei enu, mukonda kuma ayapile Majuda. Mukonda Majuda kuma aliyuvile ci yomuhe oyu amba ci yoliyo Kilesite, kenge amutundishi mu sinagoge. ²³ Mukonda wei, ashemi enji nga apa ambile ci, ''Mukulu, mumuipule.'' ²⁴ Lomushili kalo awopo aisha oyo mukwelume oyo wafile no kumuambela ci, ''Oshangale Nyambi. Twalimuka ci oyu mukwelume mukakukwama shivi.'' ²⁵ Nehoni oyo mukwelume ayepo tawa, ''Kanilimuka ci mukakukwama shivi nji ngepi. Shinu shofoci nilimuka: Kuma nanifu meho, ne honi namona.'' ²⁶ Awopo amuambela, ''Ine akwamine kukoye? Ngepi athsikulile meho oye? ²⁷ Ayepo tawa, ''Ninamitongwela kale ne neli kamutelelile! Ine mufotela kuiyuva kalo? Amwe kamufotile kukala afundishiwi enji namwe, nji mwafota?'' ²⁸ Awopo amutuka no kumuambela ci, ''Yowe mufundishiwi wenji, unone atwe po twa afundishiwi a Mushe. ²⁹ Twalimuka ci Nyambi kuma ambile kwa Mushe, unone katulimuka oyu munu oku atunda.'' ³⁰ Oyo mukwelume ayepo watawa no kuambela ci, ''Yoliyo ikomokisha eyo, ci kamulimuka oku atunda, unone onathsikula meho ange. ³¹ Twalimuka ci Nyambi kayuvangile akakukwama shivi, unone ngeci munu alombelanga kwa Nyambi no kukwama ei ahima, amuyuva kukwenji. ³² Shimbi katanga kano kaye kushime kuyuvala munu oyu nathsikula meho o munu oyu waelakiwa kunafu meho. ³³ Oyu munu nga katundu kwa Nyambi, nga katweshile.'' ³⁴ Awopo amutawa no kumuambela ci, ''Owe kuma akuelekelile mu shivi, ne watufundisha?'' Nehoni awopo amucithzela pola. ³⁵ Jesu ayepo yuva ci anamucithzi mu sinagoge. Ayepo muwana ne po muambela ci, ''Walitawa kwa Mwana Munu?'' ³⁶ Ayepo tawa no kuamba, ''Yoliyo yupi, Fumu, ci nilitawe kuwenji?'' ³⁷ Jesu ayepo muambela ci, ''Onamumono, kalo yoliyo oyu amba noye.'' ³⁸ Oyo mukwelume ayepo amba, ''Fumu, nalitawa,'' ne ayepo mulombela. ³⁹ Jesu ayepo amba, ''Mukonda ei nanikeyela muno mukaye ci awa anafumeho amone nawa awa amona lelo amona.'' ⁴⁰ Afalisi wamweya awa akalile nenji ou ayuvile ei enu awopo amuipula, ''Natwe katumono?'' ⁴¹ Jesu ayepo wambela ci, ''Nga munafu meho, nga kamuli no shivi,unone honi mwaamba ci, Twamona,' honi shivi shenu kashipu.