¹ Jesu ayepo thza pa mukinya o itondo yo olive. ² Mashikushiku ayepo keya ku tempele kalo na anu wahe awopo akeya; ayepo kongomana no kuwafundisha. ³ An'oli na afalisi awopo aleta mbuyama oyu nawaniwa. kukwama ohuka. Awopo namupaka pakaci. ⁴ Nehoni awopo amuambela, ''Mufundishi, oyu mbuyama onawaninwa kukwama ohuka. ⁵ Honi mumulao, Mushe onatutuminina ci anu okengeya tuwapovaule; ine omba kukwenji?'' ⁶ Kuma ambile kengeya ci awane po kumukwatela ci awane yo kumulundela, unome Jesu ayepo petama no kun'ola pashi no munwe wenji. ⁷ Ou akwatelelile kumuipula ipula, ayepo imana no kuambela ci, ''Yomuhe kukwenu oyu napili omango, atange kumukuha liwe.'' ⁸ Ayepo petama kalo, no n'ola pashi no munwe wenji. ⁹ Ou ayuvile kengeyo, awopo athza yofoci yofoci, kutangela kwa akulu. Kuhula Jesu ayepo shiyala yofoci, noyo mbuyama wakalile mukaci. ¹⁰ Jesu ayepo katuka no kumuambela ci, ''Mbuyama, kupi ali awa anakulundela iamba? Kwithsa nakupa mulandu? ¹¹ Ayepo amba, ''Kwithsa, Fumu.'' Jesu ayepo amba, ''Name kanikupa mulandu. Othze wakakwama omango kalo.'' ¹² Kalo Jesu ayepo amba kukwo, kuamba ci, ''Yame mwethzi okaye; yomuhe nishupwela kakuenda mumilema unone kenge akukala no mwethzi o mu uyoye.'' ¹³ Afalisi awopo amuambela ci, ''Wapaka yoye owe shinda, opaki woye kali washemwa.'' ¹⁴ Jesu ayepo watawa no kuambela ci, ''Shanga ci napaka yange yame shinda, upaki wange washemwa. Nalimuka oku nanitundu noku nithza, unone amwe kamulimuka oku nanitundu noku nithza. ¹⁵ Amwe mwaatula mu nyama; ame kwithsa oyu niatula. ¹⁶ Unohoni ngeci naatula katulo thzange thzashemwa mukonda kanili nofoci, unone nekala na Tata oyu nanitumu. ¹⁷ Ee, mu mulao wenu kunan'oliwa ci upaki wa anu eli washemwa. ¹⁸ Yame nalipa nofoci, kalo Tata oyu nanitumu apakanga yange.'' ¹⁹ Awopo amumbela ci ''Kupi ali tata oye?'' Jesu ayepo tawa, ''Kamunilimuka, shanga Tata kamumulimuka; inga munanlimuka inga munalimuka no Tata. ²⁰ Kuma ambile ei kufundisha anu mu tempele omu kuli shitulekelo sho mali, kwitsa oyu wamukwatile mukonda shikati shenji ko shihsime kukuma. ²¹ Honi ayepo amba kukwo kalo, ''Nahathza; kenge mwakunifota ne kenge mwakufela mu omangonwenu. Oku nithza kamutwesha kunishupwela ko.'' ²² Majuda awopo amba, ''Eine kenge alihonda? eyone yoliyo ambela ci. 'Oku nithza kamutweshe kunishupwela ko'?'' ²³ Jesu ayepo wambela ci, ''Amwe mwatunda pashi; ame natunda kuwilu. Amwepo mwa anu opano pa kaye; amepo kali nomunu opano pa kaye. ²⁴ Honine kuma namiambelile ci kenge mwakufela mu omango wenu. Mukonda ngeci kamutawa ci YAME, kenge mwakufela mu omango wenu.'' ²⁵ Honine awopo amuambela ci, ''Yowe elye?'' Jesu ayepo wambela, ''Ei ninamiambela kumutatekelo. ²⁶ Nili nei yoingi yokuamba nei yokuatula kukwenu. Shanga kengeyo, oyu nanitumu washemwa; no enu ninayuvu kukwenji, ei enu naitongwela kaye.'' ²⁷ Kanayuvishisha ei namba kukwo ya Tata wenji. ²⁸ Jesu ayepo amba, ''Ou mupaka Mwana Munu kuwilu, nehoni kenge mwakulimuka ci YAME, ne ci nkalo kwithsa ei ninalikwamenanga nofoci. Eci eli ananifundisha Tata moliyo niambela ei enu. ²⁹ Oyu nanitumu akalanga nange, kalo kanishiile nofoci, mukonda nakwama ei aloela.'' ³⁰ Jesu ou ambile ei enu owangi awopo alitawa kukwenji. ³¹ Jesu ayepo ambela awo Majuda alitawile kukwenji, ''Ngeci kenge mukalelela mu liywi lyange, co mwaafundishiwi ange shemwa; ³² kalo kenge mwakulimuka yoshemwa, ne yoshemwa kenge imipa kuliyala.'' ³³ Awopo amutawa, ''Twakashikuta sha Abrahama kalo tushime kukala apika o munu yupi nji yupi; ngepi oamba ci, 'Kenge mwakupiwa kuliyala'?'' ³⁴ Jesu ayepo watawa, ''Yoshemwa, shemwa, namitongwela ci, munu yomuhe oyu kwama omango mupika oumango. ³⁵ Mupika kakalelelangile munjiyo; mwana aye akalelelanga. ³⁶ Honine ngeci Mwana amipa kuliyala, kenge mwakukala okuliyala yamwe. ³⁷ Nalimuka ci mwakashikuta sha Abrahama; mwafota kunipaa mukonda maywi ange kawanine wikalo kukwenu. ³⁸ Naamba ei ninamono kwa Tata, namwe kalo mwakwama ei munayuva kwa Tata wenu.'' ³⁹ awopo atawa no kumuambela ci, ''Tata wetu po Abrahama.'' Jesu ayepo wambela ci, '' inga mwa ana a Abraham, inga mwakwama ekwama ya Abrahama. ⁴⁰ Uno honi mwafota kunipaa, munu namitongwela yoshemwan ei ninayuvu kwa Nyambi. Abrahama kaikwamine ei. ⁴¹ Mwakwama ekwama ya tata wenu.'' Awopo amuambela ci, ''Kanatuelekiwa mu ohuka; tuli no Tata wetu yofoci: Nyambi. ⁴² Jesu ayepo wamela, ''Nyambi inga Tata wenu, inga mwnihama, mukonda natunda kwa Nyambi ne yame ono pano; mukonda kanalikeyelile, unone yolyo wanitumine. ⁴³ Ine mukana kuyuvishishela maywi ange? Koliyo kuninga ci kamuyuvu maywi ange. ⁴⁴ Mwaka tata wenu diavulosi, kalo mwahima kukwama ei ahima tata wenu. Shikevenga kutunda kumatatekelo kalo kaimanenangile yoshemwa mukonda kwithsa yoshemwa kukwenji. Ou anambanga yo n'anda, ambanga omu anakalela mukonda wa n'anda kalo yoliyo tata o n'anda. ⁴⁵ Uno honi, mukonda namba yoshemwa, kamunitawa. ⁴⁶ Elye kukwenu oyu nimonisha ci nili no omango? ⁴⁷ Yomuhe munu wa Nyambi ayuva maywi a Nyambi; kamuayuvu mukonda kali mwaanu a Nyambi.'' ⁴⁸ Majuda awopo amutawa no kumuambela ci, ''Katuambile yoshemwa ci o Musamaria ci oli no mupepo oumango?'' ⁴⁹ Jesu ayepo tawa, ''Kanili no mupepo oumango, unone nalemeka Tata, ne amwe kamunilemeka. ⁵⁰ Kanifotile kulemekiwa; kwali fota no kuatula. ⁵¹ Shemwa, shemwa, namiambela, ngeci munu ayepo tuleka liywi lyange kakumona kufa.'' ⁵² Majuda awopo amuambela ci, ''Honi twalimuka ci oli no mupepo oumango. Abrahama no apolofita anafu; unone owe wamba ci, 'Ngeci munu po tuleka liywi, lyange kakuyuva kufa.' ⁵³ Kali omukulu kwa tata wetu Abrahama oyu nafu, nji omukulu? Apolofita nawo anafu. Owe walipaka ci yowe elye?'' ⁵⁴ Jesu po tawa, ''Ngeci nalilemeka no shinda, lilema lyange lya kenge; Tata yoliyo nanilemekanga- oyo munaambanga ci yoliyo Nyambi wenu. ⁵⁵ Kamumulimuka, unone amepo namulika. Ngeci niambe ci, 'Kanimulimuka,' Kenge nilipitula nenu, mukwa n'anda. Unohoni, namulimuka kalo natuleka liywi lyenji. ⁵⁶ Tata wenu Abrahama kuma anyanyukile ku mona lyuwa lyange; kuma alimonine kalo kuma aloeli.'' ⁵⁷ Majuda awopo amuambela ci, ''Oshime kukuma pa myaka makumi mutanu ku ukulu, ne onamono Abrahama? ⁵⁸ Jesu ayepo wambela ci, ''Shemwa, shemwa, namitongwela ci, Abrahama kushime kukulako, KUNILIKO.'' ⁵⁹ Nehoni awopo atola mawe ci amukuhe, Jesu ayepo liholeka no kutunda mutempele.