¹ Munyima thzei enu Jesu ayepo pita mu Galilea; mukonda kafotile kuthza mu Judea mukonda Majuda kuma nafoto kumupaa. ² Honi mukiti o Majuda ou uishiwa o ilombo kuma wakalile popepi. ³ Honine aminenji awopo amuambela ci, ''Otunde kuno othze ku Judea, ci afundishiwi oye nao akamomne ekwama onakwamanga. ⁴ Kwithsa munu okukwama shinu kunthzimba ngeci aye afota kulimukiwa ku anu wahe. Ngeci wakwama ei enu, olimonahalishe ku kaye owe shemwa.'' ⁵ Mukonda shanga aminenji kanalitawa kukwenji. ⁶ Honine Jesu ayepo wambela ci, ''Shikati shange shishime kukuma, unone shikati shenu koshili shemwa. ⁷ Kaye kakatwesha kumithzimba, unone kathzimba yame mukonda napaka yako ci ekwama yako imango. ⁸ Amwe muthze ku mukiti; ame kanithziko mukonda shikati shange shishime kuliyalishelela.'' ⁹ Ou amanine kuwa ambela ei enu, ayepo kala mu Galilea. ¹⁰ Unone aminenji kwanathzi ku mukiti, honi naye po thzako kali kokulimonahalisha unone kunthzimba. ¹¹ Majuda kuma amufotile ku mukiti ne awopo amba ci, ''Kupi ali?'' ¹² Kuma kwakalile kuamba yenji mukaci ko mbunga. Wamweya kuma ambile ci, ''Munu o muwa.'' Wamweya ci, ''Kwahi, ayaulula mbunga.'' ¹³ Unone kwithsa wambile yenji kutanalisha liywi kuyapa Majuda. ¹⁴ Mukiti apa wakumine pakaci ci upwe, Jesu ayepo thza musinagoge no kukatateka kufundisha. ¹⁵ Honi Majuda kuma akomokile, kuamba ci, ''Oyu mukwelume ngepi alimuka kengeya? Ayepo kalifundisha.'' ¹⁶ Jesu ayepo watawa no kuamba ci, ''Ei nifundisha kaitundu kukwange, unone yatunda koyu nanitumu. ¹⁷ Ngeci munu ayepo fota kukwama ei ahima, kenge alimuka ei nifundisha pano, nji yatunda kwa Nyambi, nji namba ei itunda kukwange. ¹⁸ Munu yomuhe oyu amba ei itunda kukwenji afota kushangaliwa, unone munu yomuhe oyu fota kushangaliwa koyu namutu, oyo munu washemwa, ne kwithsa omango kukwenji. ¹⁹ Mushe kamipile mulao? Unone kwithsa kukwenu oyu mamela mulao. Ine ei mufotela kunipaa?'' ²⁰ Mbunga awopo atawa, ''Oli no mupepo oumango. Elye fota kukupaa?'' ²¹ Jesu po watawa no kuwa ambela ci, ''Ninakwama shikwama shofoci ne mwaheno mwakomoka. ²² Mushe kuma amipile mukanda (kali ci watunda kwa Mushe, unone watunda kwakathsan'ulu), ne lyo Sabata mwatwala munu ku mukanda. ²³ Ngeci munu atwaliwa kumukanda lyo Sabata ci mulao wa Mushe wacoliwa, amwe ine mwaanjipa mukonda kuma nanipolisha kupolishelela oya munu lyo Sabata? ²⁴ Mwaatula komu kumonahalela, unone muatule koku luka.'' ²⁵ Wamweya awa atundile ku Jelusalema awopo amba, ''Oyu kali yoliyo oyu afota kupaa? ²⁶ Mumone, aliambela popakenu, ne kwithsa ei amba kukwenji. Eine akakuendisha nawo analimuka ci yoshemwa oyu yoliyo Kilesite? ²⁷ Uno honi twalimuka oku atunda oyu. Unone Kilesite ou akeya kwithsa wakulimuka oku atunda.'' ²⁸ Nehoni Jesu ayepo kuwelela mu tempele, kufundisha no kuambaci, ''Mwanilimuka nokunitunda mwalimukako. Kanilikeyelile nofoci, unone oyu nanitumu washemwa, ne kamumulimuka. ²⁹ Ame namulimuka mukonda natunda kukwenji kalo yoliyo onanitumu.'' ³⁰ Kuma aelekile kumuanga, unone kwithsa wamupakile lyoko mukonda shikati shenji koshishime kukuma. ³¹ Unone owangi mukaci ko mbunga kuma alitawile kukwenji, ne awopo aamba, ''Kilesite ou akeya, eine kenge nakwaqma imonisha yoingi kupita ei anakwamaoyu nji?'' ³² Afalisi awopo ayuva mbunga kwa hopa hopa ya Jesu, ne Apulisita no Afalisi awopo atuma tupaso ci amwange. ³³ Nehoni Jesu ayepo amba, ''Nishili nenu pa shikati shoshoonye lika, ne kenge nithza koyu nanitumu. ³⁴ Kenge mwakunifota unone kamwakuniwana; okunithza, kamutwesha kukeyako.'' ³⁵ Honine Majuda awopo amba mukaci ko ci, ''Oyu mukwelume oku athza kupi oku twakukwanga kumuwana? Eine kenge athza ku Magelike awa analihanda ci akafundishe Magelike nawo? ³⁶ Aa maywi anamba atongola ine ci, 'Kenge mwakunifota unone kamwakuniwana; okunithza kamutwesha kukeya ko'?'' ³⁷ Honi pa liyuwa lyo matunulelo, alyo liyuwa lyolikulu lyo mukiti, Jesu ayepo imana no kukuwelela, kuambaci, ³⁸ ''Ngeci munu onafu linotwa, akeye kukwange nanwe. Yomuhe litawa kukwange, eci eli aamba man'olo, malwale o meyu o moyo kenge avuva kutunda mulila lyenji.'' ³⁹ Unone kuma ambile ei kutoya mupepo, owonga atambula awa analitawa kukwenji; mupepo koushime kupiwa mukonda Jesu kushime kushangaliwa. ⁴⁰ Mbunga thzimweya, ou thzayuvile ao maywi, awopo amba, ''Yoshemwa oyu munu mupolofita.'' ⁴¹ Wamweya awopo amba, ''Oyu yoliyo Kileste.'' Unone wamweya awopo amba ci, ''Eine Kilesite atunda ku Galilea? ⁴² Man'olo kali amba ci Kilesite kenge akutunda kushikuta sha Davida kalo kenge atunda ku Betelehema, mulyumbo akalangile Davida? ⁴³ Honi mbunga awopo alitepa mukonda mukonda wennji. ⁴⁴ Wamweya kuma afotile kumanga, unone kwithsa wamupakile moko. ⁴⁵ Honi tupaso ato po tuhuka kwa apulisita owakulu no afalisi, awa awambelile ci, ''Ine munakanena kumuleta?'' ⁴⁶ Tupaso awopo atawa, ''Shimbi kwatanga kwithsa munu namba eli anaamba.'' ⁴⁷ Honi afalisi awopo awatawa, ''Namwe munaka angeliwa? ⁴⁸ Kwali kwakakuendisha oyu nalitawa kukwenji, nji kwa afalisi? ⁴⁹ Unone ethzi mbunga thzikana kulimuka mulao, anakutiwa.';' ⁵⁰ Nekudema (yumweya wa afalisi, oyu watangile kukeya kukwenji) ayepo wambela, ⁵¹ ''Eine mulao wetu watawethza kuatula munu komushime kuyuva kukwenji no kulimuka ei akwama?'' ⁵² Awopo amutawa no kumuambela ci, ''Nowe watunda ku Galilea? Ofotishishe ne kenge omona ci kwithsa mupolofita oyu tunda ku Galilea.'' ⁵³ [Honi munu no munu po thza kunjiyo thzenji.