¹ Munyima thzoi enu, Jesu ayepo thza musambwa limweya thzo liwate lyo Galilea, eli liishiw kalo ci liwate lyoTiberiasi. ² Mbunga thzoshokulu kuma thza mushupwelile mukonda kuma amonine imonisha ei akwamine kwakakukola. ³ Jesu ayepo kanduka pa mukinya ayepo kakongomana na afundushiwi enji. ⁴ (Honi Paseka, mukiti o Majuda, kuma wahenyenine.) ⁵ Jes ou atanekelile ayepo mona mbunga thzoshokulu ko thzikeya kukwenji, ayepo ambela Filipi ci ''Kupi tukaula eshima ci awa alye?'' ⁶ (Unone Jesu kuma ambile ei kueleka Filipi, mukonda aye walimukile ei nga akwama.) ⁷ Filipi ayepo mutawa, ''Ishima yo mali okukuma ita ili yo madinare kaikwana ci wahe aikute.'' ⁸ Yumweya kwa afundishiwi, Andreasi, mina Simoni Pitolosi, ayepo ambela Jesu ci, ⁹ ''Kwali mwanuke o mukwelume kuno oyu li no mikasha mutanu thzo ishima no ethsi thzili, unone inene ei mukaci ka anu oangi kengeya.?'' ¹⁰ Jsu ayepo amba ci, ''Mukongomanishe anu pashi.'' kuma kwakalile muhonyi oungi apo pa shivaka. Honi awo anu awopo akongomana pashi, anu okukuma pa ita makumi mutanu. Nehoni ¹¹ Jesu ayepo shimba ethzo mikasha mutanu ou amanine kukandelela, ayepo thziela kwao nakongomana. Ayepo kwama kengeyo noku ethsi, wahe po akwana omu nafotela. ¹² Anu wahe ou aikitile, ayepo ambela afundishiwi enji, ''Mutolatole omwamwa ou unashiyala, ci lelo kwashiyala shimweya.'' ¹³ Awopo autolatola kuyala tutanda likumi no twili to umwamwa washiyalile ku ishima yao alile. ¹⁴ Nehoni, anu ou amonine eshi shimonisha eshi akwamine, awopo amba, ''Yoshemwa oyu yoliyo mopolofita oyu ngakeya muno mu kaye.'' ¹⁵ Jesu ou amonine ci anu afota kumukwata ci amukwame fumu, ayepo lithzila pa mukinya yofoci. ¹⁶ Lungulo ou lwakumine , afundishiwi enji awopo aulumuka ku liwate. ¹⁷ Awopo aingine mu shisepe, kuma afotile ci ayabuke liwate athze ku Kapenauma. Kama kwailaulile pa shikati eshi, ne Jesu kushime kukeya kukwo. ¹⁸ Mupepo oukulu kuma wapepile, ne pa liwate kuma kwakalile man'isingi. ¹⁹ Ou avuile imaili yokukuma pa makumi eli no mutanu nji makumi ahatu awopo amona Jesu kuenda pa liwate kukeya ku shisepe, ne kuma ayapile. ²⁰ Unone ayepo wambela ci ''Yame! Mwayapa.'' ²¹ Nehono awopo amuingenisha mu shisepe, ne popo mwene shisepe ashopo shikafuweka oku athzile. ²² Liyuwa lyahatile ko, mbunga awa aimanine musambwa thzo liwate omu atundile awopo amona ci kwithsa shisepe shimweya shime eshi, naingena afundishiwi a Jesu omu nakana kuingenna Jesu unone afundishiwi kuma athzile wafoci. ²³ Shanga kengeyo, kuma kwakalile isepe ei naitundu ku Tiberiasi popepi no kushivaka oku alile ishima Jesu ou amanine kukandelela. ²⁴ Mbunga ou amonine ci Jesu na afundishiwi enji kali mo, awopo aingena muisepe kuthza ku Kapenauma kukafota Jesu. ²⁵ Ou akamuwanine musambwa limeya thzo liwate, awopo amuambela ci, ''Mufundishi, liyuwa lipi nokeye kuno?'' ²⁶ Jesu ayepo watawa, kuamba ci, ''Shemwa, shemwa, mwanifota kali ci mukonda kuma namumono imonisha, unone mukonda kuma namuli mikasha thzo ishi ne kuma namuikuta. ²⁷ Mwakwamena ilya ei ipwa, unone mukwamene ilya ei ikala shikati shoshile ei itwala ku moyo okuna kupwa ei akumipa Mwana Munu mukonda Nyambi onapaka liswayo lyenji papenji.'' ²⁸ Nehoni awopo amuambela ci, ''Tukwame ngepi, ci tukwame ekwama ya Nyambi?'' ²⁹ Jesu ayepo watawa no kuambela ci, ''Ei yoliyo ekwama ya Nyambi: Ci mulitawe koyu anatumu.'' ³⁰ Honi awopo amuambela ci, ''Honi shimonisha mwine wakukwama, ci tumone no kulitawa kukoye? Ine wakukwama ? ³¹ A tata wetu kuma alile mana mulihahalaupa, eci eli kuna n'oliwa, 'Kuma awapile ishma kutunda kuwilu ci alye.''' ³² Jesu po watawa, ''Shemwa, shemwa, kali Mushe oyu wamipile ishima kutunda kuwilu, unone Tata yoliyo mipa ishima yoshemwa kutunda kuwilu. ³³ Mukonda ishima ya Nyambi po ei itunda kuwilu no kupa moyo ku kaye.'' ³⁴ Honi awopo amuambela ci, ''N'athsile, otupange ei ishima kukwatelela.'' ³⁵ Jesu po wambela ci, ''Yame ishima yo moyo; yomuhe keya kukwange kakufa njala, kalo yomuhe oyu litawa kukwange kakufa linotwa. ³⁶ Unone ninamiambela ci yoshemwa munanimono, ne kamulitawa kukwange. ³⁷ Yomuhe anipa Tata kenge akeya kukwange, ne yomuhe oyu keya kukwange yoshemwa kanakumukonja. ³⁸ Mukonda ninakeye kutunda kuwilu, kali kunakwama ei nihima, unone ei ahima oyu nanitumu. ³⁹ Ei yoliyo ahima oyu nanitumu, ci kwayonga shanga yofoci kwawa ananipa, unone kenge nakuwapindula pa liyuwa lyo matunulelo. ⁴⁰ Mukonda eshi sholiyo ahima Tata, ci munu yomuhe oyu mona Mwana no kulitwa kukwenji kenge akukala no moyo okukana kupwa ne kenge nakumupindula pa liyuwa lyo matunulelo.'' ⁴¹ Nehoni Majuda awopo akumbaula kwei ambile mukonda kuma ambile ci, ''Yame ishima ei ikutunda kuwilu.'' ⁴² Awopo amba, ''Oyu kali yoliyo Jesu mwana Josefa, oyu tulimuka tata wenji na njina? Honi kwakeya ngepi ci ambe ci, 'Ninakeye kutunda kuwilu'?'' ⁴³ Jesu ayepo tawa no kuambela ci, ''Mushiye kukumbaula mukaci kenu. ⁴⁴ Kwithsa oyu twesha kukeya kukwange shime Tata oyu nanitumu ou amuleta ko, ne kenge nakumupindula pa liyuwa lyo matunulelo. ⁴⁵ Kuna n'oliwa mwa apolofita, 'Munu yomuhe kenge akufundishiwa ko Nyambi.' Yomuhe nayuvu no kulifundisha kwa Tata akeya kukwange. ⁴⁶ Kali ci kwali munu namono Tata, shime aye oyu tunda kwa Nyambi -yoliyo namono Tata. ⁴⁷ Shemwa, shemwa, oyu litawa oli no moyo okukana kupwa. ⁴⁸ Yame ishima yo moyo. ⁴⁹ A tata wenu alile mana mu lihalaupa, ne anafu. ⁵⁰ Ei yoliyo ishima ituna kuwilu, ci munu alye ko ne kafu. ⁵¹ Yame ishima iyoya ei inatundu kuwilu. Ngeci munu po lya ko oku ku ishima, kenge akuyoya kuyoyelela. Ishima ei nakupa nyama thzange ethzi nakupa ci thziyoishe kaye.'' ⁵² Majuda awopo anjipa mukaci ko ne awopo atateka kukana, kuamba ci, ''Oyu mukwelume ngepi nga atupa nyama thzenji ci tuthzilye?'' ⁵³ Nehoni Jesu ayepo wambela ci, ''Shemwa, shemwa, shime ou mulya nyama thza Mwana Munu no kunwa onyinga wenji, kamwakukala no moyo. ⁵⁴ Yomuhe lya nyama thzange no kunwa onyinga wange oli no moyo oliyele, ne kenge nakumupindula pa liyuwa lyo matunulelo. ⁵⁵ Mukonda nyama thzange elya shemwa kalo onyinga wange wanwiwa shemwa. ⁵⁶ Yomuhe lya nyama thzange no kunwa onyinga wange, oli kukwange ne name nili kukwenji. ⁵⁷ Eci eli ananitumu Tata oyu yoya, no eci eli niyoya mukonda wa Tata, homi yomuhe oyu nilya naye kenge ayoya mukonda wange. ⁵⁸ Ei yoliyo ishima ei inakeya kutunda kuwilu, kali eci eli a tata wenu alile no kufa. Yomuhe oyu lya ei ishima kenge ayoya kuyoyelela.'' ⁵⁹ Unone Jesu kuma ambile ei enu mu sinagoge kufundisha mu Kapenauma. ⁶⁰ Nehoni ungi wa afundishiwi enji awa ayuvile ei awopo amba ci, ''Ou muambelo ukalu; elye twesha kuuyuva?'' ⁶¹ Jesu, mukonda kuma alimukile aye shinda ci afundishiwi enji kuma akumbaulile peyo iamba, ayepo waambela ci, ''Ei ne yamiyuvisha omango? ⁶² Honi ngepi ci mumone Mwana Munu kukanduka kuthza oku atangile kukala? ⁶³ Mupepo oliyo uyoisha; nyama kwithsa eshi thzikwathsa. Aa maywi ninamiambela mupepo, kalo moyo. ⁶⁴ Unohoni kwali wamweya kukwenu awa akana kulitawa.'' Mukonda Jesu kuma alimukile kutateka kumatatekelo awa akukana kulitawa noyu wakumupiteka. ⁶⁵ Ayepo amba, ''Mukonda wei poliyo apa ninamiambela ci kwithsa oyu keya kukwange shime oyu napiwa kengeyo kwa Tata.'' ⁶⁶ Mukonda wei, ungi wa afundishiwi enji awopo alithzela no kushiya kuenda nenji. ⁶⁷ Nehoni Jesu ayepo ambela o likumi no eli, ''Kamuhimine kulithzela namwe, nji mwahima?'' ⁶⁸ Simoni Pitolosi ayepo mutawa, ''Fumu, tuthze kwalye? Oli no maywi o moyo o liyele, ⁶⁹ ne tunalitawa no kulimuka ci yowe omukenu wa Nyambi.'' ⁷⁰ Jesu ayepo wambela, ''Kali yame namihangulile, mwaheno likumi no eli, ne yuweya kukwenu Diavulosi?'' ⁷¹ Honi apa kuma ambile Judasi mwana Simoni Isikariote, mukonda yoliyo, kwawa o likumi no eli, oyu wakupiteka Jesu.