¹ Mnyima thzoi kuma kwakalile mukiti wa Majuda, ne Jesu ayepo thza ku Jelusalema. ² Honi mu Jelusalema kumbali no shelo sho mangu kwakalile lilomba , eli aishangile mushi Aramaiki ci Betesaida, kalo kwakalile makeke o mutanu. ³ Anu owangi akwakukola, akwa kufa meho, elema, nakakukutela elama koliyo alalangile kutatelela meyu ou ashelauka. ⁴ Mukonda apo kuna n'oliwa lingeloi lya Fumu poliyo naliulukelanga mu lilomba nokuna vundulula meyu honi munu omutatekelo kukengena omo mu meyu kwashivundululiwa kuma napolanga ku ikola yoihe akola. ⁵ Kwakalile mukwelume yumweya oyu wakolile myaka thzo makumi ahatu. ⁶ Jesu ou amumonine kunalala, nou alimukile ci kuma akalile oko shikat shoshile, ayepo muambela, ''Wafota kukala shuwana?'' ⁷ Oyo mukwelume okukola ayepo tawa, ''N'athsile, kanili no munu okunipaka mulilomba meyu ou avunduluka. Ou nifota kukahelelamo, yumweya alitangethza kukahelelamo ame konishime.'' ⁸ Jesu ayepo muambela, ''Okatuke, oshimbe olili woe, oende.'' ⁹ Popo mwene mukwelume ayepo pola, ayepo shimba olili wenji ne ayepo enda. ¹⁰ Honi Majuda awopo ambela oyo mukwelume wapolishiwile, ''Lelo lya Sabata ne kotawethziwa kushimba kanaha koe.'' ¹¹ Ayepo tawa, ''Oyu nanipolisha yoliyo naniambela ci, 'Oshimbe kanaha koe ne oende.''' ¹² Awopo amuipula, ''Elye oyo mukwelume oyo nakuambela ci, 'Okayelule ne oende'?'' ¹³ Ambene, oyo apolishile kalimukile ci oyu wamupolishile ne elye mukonda Jesu kuma aombolokile, mukonda kuma kwakalile anu oangi omo mushivaka. ¹⁴ Munyima thzeyo, Jesu ayepo kamuwana mutempele ne ayepo muambela ci, ''Omone, onapolo! mbela wakwama shivi kalo , ci enu yoimango nene katele yakukwamahale kukoye.'' ¹⁵ Oyo mukwelume ayepo thza nokukatongwela Majuda ci Jesu yoliyo wamupolishile. ¹⁶ Honi mukonda wei Majuda anyandishile Jesu, mukonda kuma akwamine ei enu lyo Sabata. ¹⁷ Jesu ayepo watawa, ''Tata oshikwama nahingeno, name, kalo, nakwama.'' ¹⁸ Mukonda wei, Majuda afotile ci amupae mukonda kaleile lika mulao o Sabata, unone kalo aisha Nyambi ci Tata wenji shemwa, kulianeka aye na Nyambi. ¹⁹ Jesu ayepo watawa, ''Shemwa, shemwa, Mwana kwithsa eshi atwesha kulikwamena yofoci, shime eshi anamono kwa Tata wenji kushikwama, mukonda shoshihe akwama Tata, no Mwana moliyo ashikwamena. ²⁰ Mukonda Tata ahima Mwana ne amumonisha ei anakwamanga aye, kalo kenge akumumonisha ekwama yoikulu kupita ei ei mwakukomoka. ²¹ Mukonda eci eli Tata anapindulanga awa anafu no kuwapa moyo, no Mwana naye apa moyo ku munu yomuhe oyu ahima. ²² Mukonda Tata kaatula munu, unone onapa mwanenji kuatula enu yoihe. ²³ Ci anu wahe elemeke Mwana eci eli alemeka Tata. Oyu kana kulemeka Mwana kalemeka Tata oyu namutumu. ²⁴ Shemwa, shemwa, yomuhe oyu yuva maywi ange no kulitawa kukwenji oyu nanitumu oli no moyo oliyele kalo kakuatuliwa unone onayishiwa ku lifu. ²⁵ Shemwa, shemwa, namitongwela shikati shakeya, mane shinakumu awa anafu apa akuyuva liywi lya Mwana Nyambi, kalo awa aliyuva kenge akuyoya. ²⁶ Mukonda eci eli Tata oli no moyo kukwenji yofoci, honi onapu Mwana aye ci akale no moyo kukwenji yofoci, ²⁷ kalo Tata onapu Mwanenji okolo okuatula mukonda yoliyo Mwana Munu. ²⁸ Mwakomoka ei, mukonda shikati shakeya esho wahe awa ali mu mambumbo ou akuyuva liywi lyenji ²⁹ no kupuna mo: Awa anakwama uwa kupindukela kuyoya, ne awa anakwama omango kupindukela kuatuliwa. ³⁰ Kwithsa ei nitwesha kulikwamena nofoci. Eci ei niyuva, Naatula, kalo kuatula kwange kunanaloo mukonda kanifoto ei nihima unone ei ahima oyu nanitumu. ³¹ Ngeci nalipaka yame noshinda upaki wange kali washemwa. ³² Kwali yumweya oyu paka yange, kalo nalimuka ci upaki ou apaka yange washemwa. ³³ Namutumu kwa Joani, ne apaka yoshemwa. ³⁴ Unone upaki nitambula kautundu kwa munu. Naamba ei enu ci muyoishiwe. ³⁵ Joani po neli lampi ethzi nathziyuuma no kuethsa, ne namuhimi kunyanyuka mu mwethzi wenji pa shikati shoshionye. ³⁶ Uno honi upaki nili nao ukulu kupta wa Joani, mukonda ekwama ei ananipa Tata ci niimanenene, ei ekwama nili nokukwama, yapaka yange ci Tata onanitumu. ³⁷ Tata oyu nanitumu aye shemwa onapaka yange. Kwithsa apa mwamuyuvile nji kumumona. ³⁸ Kamuli no maywi enji anashiyala kukwenu, mukonda kamulitawa koyu anatumu. ³⁹ Mwafota mu man'olo mukonda mwaayala ci moliyo muwana moyo oliyele, kalo ao man'olo apaka yange, ⁴⁰ ne kamuhimine kukeya kukwange ci mukale no moyo. ⁴¹ Kushangaliwa kwange kakutundu kwa anu, ⁴² unone nalimuka ci shihemo sha Nyambi kashili kukwenu. ⁴³ Ninakeya mu lithzina lya Tata, unone kamunitambula. Ngeci umweya ayepo keya mulithzsina lyenji kenge mumutambula. ⁴⁴ Ngepi elinga mulitawa, amwe mutawa kushangaliwa okukutunda kwa ngenjenu unone kamufoto kushangaliwa okuktunda kwa Nyambi yofoci lika? ⁴⁵ Mwaanekela ci yame shemwa kenge nakumilundela pa meho a Tata. Oyu namilundela po Mushe, oyu munakulupela. ⁴⁶ Nga kuma mwalitawile kwa Mushe Nga munalitawa kukwange, mukonda kuma an'olile yange. ⁴⁷ Ngeci kamutawa ei anan'olo, ngepinga mutawa maywi ange?''