¹ Honi Jesu ou alimukile ci afalisi anayuvu ci onapilula no kukolovethza anu owangi kupita Joani ² (shanga ci Jesu aye kana kolovethzanga, unone afundishiwi woliyo nakolovethzanga), ³ Ayepo tunda mu Judea no kuhuka kalo ku Galilea. ⁴ Unone kuma aloelile kupita thzo Samaria. ⁵ Ayepo keya mumbongi thza Samaria ethzi thziishiwa Sikare, popepi no litunga lya Jakobo eli apile mwanenji Josefa. ⁶ Molyakalile lishima lya Jakobo. Jesu kuma aile mumuendo wenji ayepo kala kumbambwela thzo lishima. Shikati kushinga 12:00 mutanya. ⁷ Mbuyama o Musamaria ayepo keya kunaveta meyu, ne Jesu ayepo muambela ci, ''Onipeko meyu okunwa.'' ⁸ Mukonda afundishiwi enji kuma athzile mumbongi kukaula yokulya. ⁹ Honi oyo mbuyama o Musamaria wamutawile ci,''Owe Mujuda, kepi onilomba meyu o kunwa, ame mbuyama o Musamaria?'' Mukonda Majuda kaliwanangile no Masamaria. ¹⁰ Jesu ayepo mutawa no kumuambela ci, ''Inga walimuka shipiwa sha Nyambi, kalo inga walimuka ci elye oyu kuambela ci, 'Onipeko meyu o kunwa,' nga yowe namulombo, nga onakupa meyu o moyo.'' ¹¹ Mbuyama ayepo muambela ci, ''N'athsile, kamuli no shivetisho kalo eli lishma lithzungi. Kupi okunga muwana meyu o moyo?'' ¹² Kali omukulu, nji omukulu, kupita tata wetu Jakobo, oyu watupile eli lishima omu anwangile aye shemwa, na anenji nemunanu yenji? ¹³ Jesu ayepo mutawa no kumuambela ci, ''Munu yomuhe o kunwa meyu omu mulishima kenge akufa linotwa kalo, ¹⁴ unone yomuhe o kunwa meyu aa nimupa kakufa linotwa kalo. Unone meyu nimupa kenge akala munga kukwenji, aa atwala kumoyo okukana kupwa.'' ¹⁵ Mbuyama po muambela ci, ''N'athsile, munipe ao meyu ci katele nifange linotwa kalo katele nikeyange kuno kunaveta meyu kalo.'' ¹⁶ Jesu ayepo muambela ci, ''Othze, okaishe munu woye, ne okahuke kuno.'' ¹⁷ Mbuyama ayepo mutawa no kumuambela ci, ''Kanili no mukwelume.'' Jesu ayepo tawa, ''Onamba yoshemwa ci, 'Kanili no mukwelume,' ¹⁸ mukonda kuma noyekiwa kwa akwelume mutanu, oyu oli nenji pano po kali munu woye. Ei onaamba yashemwa.'' ¹⁹ Mbuyama ayepo muambela ci, ''N'athsile, namona ci o mupolofita. ²⁰ Atata wetu panalombelelangile pano pa mukinya, unone waniambela ci Jelusalema po sholiyo shibaka sho kulombelela.'' ²¹ Jesu ayepo muambela ci, ''Otawe ino niamba, mbuyama, shikati shakeya eshi mwakukana kulombela Tata pano pa mukinya nji mu Jelusalema. ²² Mwalombela ei mukana kulimuka. Atwe twalombela ei tulimuka, mukonda kuyoishiwa kwatunda kwa Majuda. ²³ Shanga kengeyo, shikati shakeya mane shinakumu, apo akwakulombela koshemwa henge akulombela Tata mumupepo no shemwa, mukonda Tata afota anun okengeyo ci akale ku anu enji okulombela. ²⁴ Nyambi po mupepo, na anu awa amulombela aloela kumulombela mupepo no shemwa.'' ²⁵ Mbuynma ayepo muambela ci, ''Nalimuka ci Mesia akeya (oyu ishiwa Kelesite). Ou akukeya kenge akututongwela enu yoihe.'' ²⁶ Jesu ayepo muanbela ci, ''Yame, oyu ambaula noye.'' ²⁷ Mushikati esho afundishiwi enji awopo ahuka. Honi kuma akomokile ci ine ambaulile noyo mbuyama, unone kwithsa oyu wambile ci, ''Ine ofota?'' nji ''Ine oambaulela nenji?'' ²⁸ Honi mbuyama ayepo shiya shiveto, kuhuka mumbongi, nokukatongwela anu ci, ²⁹ ''Mukeye, namumone mukwelume naitongwela enu yoihe nanikwama. Eci kalli yoliyo Kelesite, ci yoliyo? ³⁰ Awopo atunda mumbongi kuthza kukwenji. ³¹ Mwesho shikati, afundishiwi kuma amuambelile ci, ''Mufundishi, olye.'' ³² Unone ayepo wambela ci, ''Nili nei yokulya ei mukana kulimuka.'' ³³ Honi afundishiwi awopo ambaula mukaci ko ci, ''Kwithsa awa anamuletela yokulya, nji anamuletela?'' ³⁴ Jesu ayepo wambela ci, ''Elya yange po kukwama ei ahima oyu nanitumu no kumanenena ekwama yenji. ³⁵ Kamuambangile ci, ''Kunashiyala maonda ane ci tuyange? Namitongwela mukenge mumone elwa, mokonda inapi yaloela kuyangiwa! ³⁶ Mukwakuyanga aloela kuhola no kuyanga oshuka o moyo liyele, ci mukwakukuna no mukwakuyanga anyanyukela pofoci. ³⁷ Mukonda ou muambelo, ''Yumweya akuna, yumweya ayanga,' washemwa. ³⁸ Namituma kukayanga ei munakana kukwama. Wamweya anakwama, ne amwe munengena muikwama yo.'' ³⁹ Masamaria owangi omo mumbongi awopo alitawa kukwenji komu awatingwelile oyo mbuyama wawapile upaki ci, ''Onanitongwela enu yoihe ninakwama.'' ⁴⁰ Honi Masamaria ou akeile kukwenji awopo amulomba ci aikale no, ne ayepo kala no mayuwa eli. ⁴¹ Anu owangi alitawile mukaci ko maywi enji. ⁴² Awopo ambela oyo mbuyama, ''Katulitawile honi mukaci koyi onatutongwela, mukonda atwe twashinda tunaliyuvela, kalo tunalimuka ci oyupo yoshemwa muyoishi o kaye.'' ⁴³ Munyima thzao mayuwa eli, watundile mo kuthza ku Galilea. ⁴⁴ Mukonda Jesu waliambelile aye shinda ci mupolofita kapiwa lilema mulitunga lyenji. ⁴⁵ Ou akumine mu Galilea, anu omu Galilea amutambulile. Amonine enu yoihe akwamine mu Jelusalema pa mukiti, mukonda nawo kuma athzile ku mukiti. ⁴⁶ Honi ayepo keya kalo mu Kana omu Galilea, oku apilulile meyu waine. Kwakalile nduna yumweya oyu wakalile no mwane okukola ku Kapenauma. ⁴⁷ Ou ayuvile ci Jesu onatundu ku Judea kukeya ku Galilea, ayepo thza kwa Jesu no kuka mulomba ci athze nenji akapolishe mwanenji oyu wafotile kufa. ⁴⁸ Jesu wamuambelile ci, ''Shime ou omona imonisha no ikomokisha kotawa.'' ⁴⁹ OYo nduna ayepo muambela ci, ''N'athsile, okeye pano mwanange kushime kufa.'' ⁵⁰ Jesu ayepo muambela ci, ''Othze, mwanoye ayoya.'' Mukwelume kuma atawile maywi amuambelile Jesu, ayepo thza. ⁵¹ Apo kuthza, angamba enji awopo amuhangana, awopo amuambela ci mwanenji ayoya. ⁵² Honi ayepo waipula shikati natateka kumonahala shuwana. Awopo amutawa, ''Yana shikati koshininga 13:00 mutanya lihokma alyopo limushiya.'' ⁵³ Honi tata wenji ayepo limuka ci sholiyo shikati namuambela Jesu ci, ''Mwanoye ayoya.'' Honi aye shemwa nakanjiyo thzenji awopo alitawa. ⁵⁴ Eshi sholiyo shimonisha sho mushili eshi akwamine Jesu ou atundile ku Judea kuthza ku Galilea.