¹ Honi kwakalile mufalisi o lithzina lyo Nekudema, muendishi o Majuda. ² Oyu mukwelume ayepo keya kwa Jesu oshiku nokunamuambela ci, ''Mufundishi, twalimuka ci o mufundishi oyu tunda kwa Nyambi, mukonda kwithsa oyunga kwama ei emonisha ei okwama hime Nyambi kuli nenji.'' ³ Jesu ayepo mutawa ci, ''Shemwa, shemwa, ngeci munu kaelekiwile ope kakumona Ofumu wa Nyambi.'' ⁴ Nekudema ayepo muambela ci, ''Ngepi munu elinga aelekiwa kalo aye kunakulu? Katwesha kuingena mulila lya njina lo mushili ci akaelekiwe kalo, nji atwesha kuingenamo? ⁵ Jesu ayepo mutawa ci, ''Shemwa, shemwa, ngeci munu kaelekiwa ko meyu no mupepo kakutwesha kuingena mu Ofumu wa Nyambi. ⁶ Eshi shinaelkiwa ko nyama po nyama neshi shinaelekiwa ko mupepo po mupepo. ⁷ Wakomoka ei ninakuambela, 'Mwaloela kuelekiwa ope.' ⁸ Mupepo wapepa kokuhe oku unahimi wayuva pohuma kupepa kwao, unone kolimuka oku utunda noku uthza. Moliyo anakalela no munu yomuhe oyu naelekiwa ko mupepo.'' ⁹ Nekudema ayepo tawa no kumuambela ci, ''Enu yokengeyo ngepi nga ikwamahala?'' ¹⁰ Jesu ayepo mutawa no kumuambe ci, ''O mufundishi o Isilaele, unone ko yuvishisha ei enu? ¹¹ Shemwa, shewa, nakuambela ci, twa amba ei tulimuka, kalo twa paka ei tunamono. Unone ko tawa opaki wetu. ¹² Ngeci namotongwela enu yopano pa kaye ne kamutawa, ngepi nga mutawa ounga nimitongwela enu yokuwilu? ¹³ Kwithsa oyu wathza kuwilu hime oyu watundile kuwilu-Mwana Munu. ¹⁴ Eci eli Mushe ayelulelile liyoka mu lihalaupa no Mwana Munu naye moliyo akuyeluleliwa, ¹⁵ ci wahe awa alitawa kukwenji akukale no moyo o liyele. ¹⁶ Mukonda Nyambi nahimi nene kaye, mane onakapa mwanenji yofoci lika ci munu yomuhe oyu litawa kukwenji mbela akufa unone akale no moyo o liyele. ¹⁷ Mukonda Nyambi kanatumu Mwane muno mukaye ci naatule kano kaye, unone ci nayoishe kaye. ¹⁸ Oyu litawa kukwenji kakuatuliwa, unone oyu kana kulitawa kukwenji onaatuliwa kale mukonda onakana kulitawa mu lithzina lya Mwana Nyambi yofoci lika. ¹⁹ Eshi shileta katulo eshi: Mwethzi unakeya mu kaye, ambene anu anahimi milema kupita mwethzi mukonda ekwama yo imango. ²⁰ Mukonda munu yomuhe okukwama omango onathzimbi mwethzi, kalo kakeye mu mwethzi, ci ekwama yenji yamonahala. ²¹ Unohoni, okukwama yoshemwa akeya mu mwethzi ci imonahale popakenu ci ekwama yenji onaikwamena kwa Nyambi.'' ²² Ou atundile apo, Jesu na afundishiwi enji awopo athza mulitunga lya Judea. Omu akakalile no shikati no kuwakolovethza. ²³ Honi Joani kuma nakolovethza mu Aenoni popepi no Salimu mukonda kuma kwakalile meyu oangi. Anu kuma nakeya kukwenji kunakolovethziwa, ²⁴ mukonda Joani kushime kupakiwa mukamenga. ²⁵ Okwakatukile likan'i mukaci ka afundishiwi a Joani no Mujuda pa shithzo sho shokulihupa. ²⁶ Awopo athza kwa Joani nokukamuambela ci, ''Mufundishi, oyu munu nokala nenji musambwa liya lyo lwale lwa Jodani, oyu wambile, omone, akolovethza, kalo anu wahe athza kukwenji.'' ²⁷ Joani watawile, ''Kwithsa munu okutambula shinu shipi nji shipi shime eshi anapiwa kutunda kuwilu. ²⁸ Amwe shemwa mwatwesha kupaka ci kuma naambile ci, 'Kali yame Kelesite,' unone, 'Ninatumiwa kumuenda paposho.' ²⁹ Mukwakuyekiwa po wa mukakuyeka. Honi mbusha mukwakuyeka, oyu li kunyonga ou amuyuva, anyanyuka nene pa kuyuva liywi lya mukakuyeka. Ei, nehoni, shinyanyu shange shinakwanenena. ³⁰ Aye aloela kuthza posho unone ame naloela kuhuka munyima. ³¹ Okutunda kuwilu po mukulu kwa anu wahe. Okutunda muno mukaye po wakaye no kuamba amba yo kaye. Okutunda kuwilu po mukulu muinu yoihe. ³² Apaka ei anamono nei anayuvu, unone kwithsa okutawa opaki wenji. ³³ Oyu natawa opaki wenji onatawa ci Nyambi washemwa. ³⁴ Mukonda oyu anatumu Nyambi amba maywi a Nyambi. Mukonda aye kapangile mupepo koku anekela. ³⁵ Tata ahima Mwana ne onamupa enu yoihe mu lyoko lyenji. ³⁶ Yomuhe o kutawa kwa Mwana oli no moyo okuna kupwa, unone okukana kulemeka Mwana kakumona moyo, unone uanji wa Nyambi wakala nenji.''