¹ ''Shemwa, shemwa, namiambela, yo muhe oyu kana kwingenena mu shelo shina yanjuluka sho mangu, unone athzinena kwako oyo munu mwithzi kalo shikashama. ² Oyo wingenena ku shelo yoliyo mukwa kunyunga mangu. ³ Mukwa kunyunga ku shelo amu yanjululela. Mangu ayuva liywi lyenji, ne aisha mangu enji pa mathzina no ku atwala pola. ⁴ Apa amana kupunisha enji, athza kuposho thzao, ne mangu amu shupwela, mukonda alimuka liywi lyenji. ⁵ Kaku shupwela munu wao unone kenge amushiya mukonda kalimuka liywi lya anu ao.'' ⁶ Jesu kuma ambile ethzi nguli kukwoo, unone kayuvishishile ci ei enu ne ine ei ambile kukwo. ⁷ Ne Jesu wa wambelile kalo, ''Shemwa, shemwa, namiambela yame no shelo thzo mangu. ⁸ Wahe awa nakeya kunishime ethzi kalo ikashama, unone mangu kana wateelela. ⁹ Yame no shelo. Ngeci munu po ingena mukaci ko ame, kenge akuyoyishiwa; kenge akuingena mukaci no kupuna pola kalo kenge akuwana ko kulishela. ¹⁰ Mwithzi kakeyangile pohuma hime kuna ithza no kupaa no kuipisha. Nineya eci akuwane moyo kalo eci auwane mu ungi. ¹¹ Yame no muka kulisha o muwa. Muka kulisha o muwa apa moyo wenji ku mangu. ¹² Oyu naishiwa kuna kwama pohuma kali muka kulisha kalo kali no mangu. Ou amona limbungu ko likeya ashiya mangu no kuliholeka, ne limbungu lyakwata no kushandaula mangu. ¹³ Acila mukonda wakuishiwa pohuma ci nakwame ne kavilaela yo mangu. ¹⁴ Yame no muka kulisha o muwa, nalimuka mangu ange, ne mangu ange anilimuka. ¹⁵ Tata anilimuka, kalo nalimuka Tata, ne napa moyo wange ku mangu. ¹⁶ Nili no mangu amweya ao kali amuno mu mulaka. Naloela ku aleta nao, ne kenge akuyuva liywi lyange ci kwakukale mutapi ofoci no muka kulisha yofoci. ¹⁷ Eshi sholiyo anihimena Tata: Napa moyo wange eci naku ushimbe kalo. ¹⁸ Kwithsa oyu ushimba kukwange, unone naupa ame no shinda. Nili no nokolo oku upa, kalo nili no okolo okushimba kalo. Ninatambula eshi shituminino kutunda kwa Tata.'' ¹⁹ Kulihanda kalo akopo kukala mukaci ko Majuda koa maywi. ²⁰ Ongi woo awopo amba ci, ''Oli no mupepo oumango kalo athzaluka. Yine ei mu muteelela?'' ²¹ Wamweya awopo amba, ''Aa kali oliyo maywi o munu oyu li no mupepo oumango. Mupepo oumango watwesha kuthsikula meho o munu o kufa meho?'' ²² Nehoni kwakalile mukiti o kuloisha tempele mu Jelusalema. Mushika sho kufu, ²³ ne Jesu kuma aendile mu tempele mu makeke a Solomoni. ²⁴ Ne Majuda awopo amuthzinguluka no kumuambela ci, ''Kenge otu anekelisha yoye mushikati shikuma kupi?'' Ngeci yowe Kilesite, otuambele popa kenu.'' ²⁵ Jesu ayepo watawa, ''Nanimiambela, unone kali mwaka kutawa. Ekwama nikwama mu lithzina lya Tata ei yoliyo ini paka. ²⁶ Unohoni kamutawa mukonda kali mwa mangu ange. ²⁷ Mangu ange ayuva liywi lyange; Nawalimuka, ne anishupwela. ²⁸ Nawapa moyo okukana kupwa; kakufa, kalo kwithsa wa kuwatundisha mu lyoko lyange. ²⁹ Tata, oyu nawanipa, mukulu kupita wahe wamweya, kalo kwithsa munu twesha kuwatundisha mu lyoko lya Tata. ³⁰ Ame na Tata tuli mofoci.'' ³¹ Ne Majuda awopo atola mawe kalo ci amukuhe. ³² Jesu ayepo watawa, ''Ninami nehethza ekwama yoiwa yoingi kutunda kwa Tata. Apa ipi koi ekwama ei munikuhela mawe?'' ³³ Majuda awopo amutawa, ''Katukukuhelile shikwama shoshiwa unone ko kuyemngwa, mukonda owe, o munu walipaka o shinda ci o Nyambi.'' ³⁴ Jesu wa watawile ''Kain'oliwile mu mulao wenu, na ambile, ''Mwa athzimu'''? ³⁵ Ngeci kuma awaishile ci athzimu,lyambo lyo Nyambi kwalye nalikeya (kalo lin'olo kalitwesha kumanishiwa), ³⁶ mwa amba oyu ana hangula Tata no kumutuma mu kaye ci, 'Wa yengwa,' mukonda ninamba ci, 'No mwana Nyambi'? ³⁷ Ngeci kanikwamine ekwama ya Tata, lelo mwatawa. ³⁸ Unone ngeci naikwama, shanga ci kamutawa, mutawe mu akwama nikwama ci mulimuke no kuyuvishisha ci Tata oli kukwange kalo name nili kwa Tata.'' ³⁹ Awopo aeleka kumukwata kalo unone ayepo wapothsomoka mu moko no kulithzela. ⁴⁰ Ayepo thza kalo musambwa thzo Jodani kushivaka oko atekelile Joani kukolovethza, ne ayepo kakala ko. ⁴¹ Anu owangi ayile kukwenji no kuamba, ''Joani shemwa kana kwama imonisha, unone enu yoihe ambile Joani yoyu mukwelume yashemwa.'' ⁴² Anu owangi oko kushivaka alitawile kukweni.