¹ Honi mukwelume yumweya o lithzina lyo Lazaro kuma akolile. Waku Betania lyumbo lya Maria na mukulwenji Mareta. ² Maria yoliyo waweshile Fumu maathzi o mira no kushokota maulu enji ko huki thzenji, ne Lazaro wakolile neli ndumbu thzenji. ³ Andumbu thzenji awopo atuma munu kwa Jesu, no kuka muambela ci, ''Fumu, omone, oyu ohima akola.'' ⁴ Jesu ou aiyuvile, ayepo amba ci. ''Ei ikola kali yakufa, unone ya kushangala Nyambi ci Mwana Munu ashangaliwe ko ei ikola.'' ⁵ Honi Jesu kuma ahemine Mareta no minenji no Lathzalo. ⁶ Ou ayuvile ci Lazaro akola, Jesu ayepo kala mayuwa eli kalo omo mu shivaka akalile. ⁷ Nehoni munyima wei , ayepo ambela afundishiwi enji ci, ''Tuthzenu ku Judea kalo.'' ⁸ Afundishiwi awopo amuambela ci, ''Mufundishi, n'anyin'anyi apa Majuda nafoto kuku povaula no mawe, ne wahuka ko kalo?'' ⁹ Jesu ayepo tawa, ''Liyuwa kali lili no mahola likumi no mahola eli mutanya? Ngeci munu ayepo enda mutanya, kakun'uka, mukonda amona ko mwethzi okano kaye. ¹⁰ Shanga kengeyo, ngeci aende oshiku, kenge akun'uka mukonda mwethzi wahi.'' ¹¹ Kuma ambile ei enu, ne munyima thzei, ayepo wambela ci, ''Mbushetu Lazaro onalala, unone nathza nakamupindula pa tulo.'' ¹² Honine afundishiwi awopo amuambela ci, ''Fumu ngeci onalala kenge apola.'' ¹³ Honi Jesu kuma ambile yo kufa kwenji, unone awo kuma aanekelile ci amba kulala ko kulitumwisha. ¹⁴ Nehoni Jesu ayepo wambela popakenu ci, ''Lazaro onafu.'' ¹⁵ Ninanyanyuka mukonda wenu, ou nanikana kukala ko ci mutawe. Tuthzenu kukwenji.'' ¹⁶ Tomasi oyu ishiwa Didima, ayepo ambela angenjenji afundishiwi ci, ''Tuthzenu natwe ci tukafe na Jesu.'' ¹⁷ Jesu ou akumine, anawana ci Lazaro onamana mayuwa ane mu mbumbo. ¹⁸ Honi Betania neli pepi no Jelisalema, po pepi-pepi shemwa. ¹⁹ Majuda owangi kuma akeile kwa Mareta na Maria kunawamona ko kufa kwa ndumbu thzo. ²⁰ Nehoni Mareta ou ayuvile ci Jesu akeya , ayepo mushambawela, unone Maria kuma akalile munjiyo. ²¹ Nehoni Mareta ayepo ambela Jesu ci, ''Fumu, nga konokala, ndumbu thzange nga kafile. ²² Shanga pano, nalimuka ci yoihe olomba kwa Nyambi, kenge akupa yo.'' ²³ Jesu ayepo muambela ci, ''Ndumbu thzoe kenge apinduka kalo.'' ²⁴ Mareta ayepo muambela ci, ''Nalimuka ci kenge akupinduka kalo pa liyuwa lyo kupinduka kwakakufa liyuwa lyo mahulelo.'' ²⁵ Jesu ayepo muambela ci, ''Yame kupinduka no moyo; yomuhe oyu litawa kukwange, shanga oyu fa, kenge ayoya; ²⁶ ne yomuhe oyu yoya no kulitawa kukwange kakufa. Waitawa ei?'' ²⁷ Ayepo muambela ci, ''Eee, Fumu, natawa ci yowe Kilesite, Mwana Nyambi, oyu keya mu kaye.'' ²⁸ Ou amanine kuamba ei, ayepo thza kukaisha minenji Maria kunthzimba. Ayepo amba, '' Mufundishi ono li kuno ne akuisha.'' ²⁹ Ou ayuvile ei wanguwangu ayepo katuka kuthza kukwenji. ³⁰ Honi Jesu kushime kukuma mu lyumbo unone kushili pa shivaka amuhanganine Mareta. ³¹ Honi Majuda, awa akalile nenji mu njiyo nawa akeile kunamumona, ou amonine Maria ku katuka wanguwangu no kupuna pola, awopo amushupwela, kuma anekelile ci athza ku mbumbo kuka lilela ko. ³² Maria ou anakumine ku shivaka akalile Jesu no kunamona, ayepo wela pashi ku maulu enji no kumuambela ci, ''Fumu, nga konokala, ndumbu thzange nga kafile.'' ³³ Jesu ou amumonine ku lila, no Majuda awa akeile nenji nawo kwa lila, ayepo liyuva n'eke mu mupepo no kuliyuva omango; ³⁴ Ayepo amba, ''Kupi munamupaka?'' Awopo amuambela ci, ''Fumu, okeye nomone.'' ³⁵ Jesu ayepo lila. ³⁶ Honi Majuda awopo amba, ''Mumone omu nahemena Lazaro!'' ³⁷ Unone wamweya kukwo awopo amba ci, ''Kali yoliyo napolisha munu okufa meho ci amone, nga onapolisha oyu mukwelume naye ci afa?'' ³⁸ Honi Jesu ko kuyuva n'eke nene, ayepo thza ku mbumbo. Honi neli liteke nalikala mu liwe, ne liwe kuma naliyanjeliwa ku shelo thza lyo. ³⁹ Jesu ayepo amba, ''Mutundisheko liwe.'' Mareta ndumbu thza Lazaro, oyu wafile ayepo ambela Jesu ci, ''Fumu, shino shikati tuamba elama inolo, mukonda kunapiti mayuwa ane kutunda apa nafela.'' ⁴⁰ Jsu ayepo muambela ci, ''Kaniambile ci, ngeci watawa, kenge omona kutethzima kwa Nyambi?'' ⁴¹ Honi awopo atundishako liwe. Jesu ayepo yelulela meho enji muwilu no kuamba, ''Tata, nakandelela kukoye ci waniyuva. ⁴² Ninalimuka ci waniyuvanga lolungi, unone naamba ei mukonda wawa anu owangi ananipaka mukaci, ci atawe ci onanitumu.'' ⁴³ Ou amanine kuamba ei, ayepo kuwa no liywi lyoshokulu, ''Lazaro, opune!'' ⁴⁴ Mukwelume wafile ayepo puna; maulu no moko enji kwana angiwa no ito, no mutwi wenji kounavungeliwa mu shito. Jesu po wambela ci, ''Mumu angulule ne mumushiye athze.'' ⁴⁵ Nehoni Majuda owangi awa akeile kwa Maria awa amonine ei akwamine Jesu, alitawile kukwenji. ⁴⁶ Unone wamweya kukwo awopo athza kwa afalisi kuka watongwela enu akwamine Jesu. ^{47 48} Nehoni apulisita owakulu na afalisi awopo awaneka kuta pofoci no kuamba, ''Kenge tukwama ngepi? Oyu munu akwama imonisha yoingi. Ngeci tumushilele kengeya, anu wahe kenge alitawa kukwenji; aka Roma kenge akeya kunashimba litunga lyetu no kunashimba anu etu. ⁴⁹ Shanga kengeyo, mukwelume yumweya mukaci ko, Kayafa, oyu wakalile mupulisita omukulu oo mwaka, ayepo wambela ci, ''Kwithsa ei mulimuka. ⁵⁰ Kamumono ci kunaloo kukwenu ci munu yofoci afele anu kupita ci anu wahe afe.'' ⁵¹ Honi kanaliambelile pohuma. Unone, pa kukala mupulisita o mukulu oo mwaka o, kuma apolofitile ci Jesu kenge afela anu; ⁵² ne kali kufela anu pohuma, unone ci ana Nyambi awa analihanda aliwane pofoci. ⁵³ Honi kutunda elyo liyuwa awopo afota omu atwesha kupaela Jesu. ⁵⁴ Jesu ayepo shiya kuende mukaci ko Majuda kwamumona, unone ayepo tunda ko kuthza mu litunga eli lili popepi no lihalaupa kukengena mu mongi thziishiwa Efraimi. Ayepo kakalako na afundishiwi enji. ⁵⁵ Honi mukiti o paseka o Majuda kuma wakalile popepi, ne anu owangi kuma atundile mu litunga no kuthza ku Jelusalema liyuwa lyo mukiti kolishime kukuma ci akalikenishe. ⁵⁶ Kuma afotile Jesu, kwa nemana mu tempele awopo aliipaula ci, ''Mwa anekela ngepi? ci kakeya ko kuno ku mukiti nji?'' ⁵⁷ Honi apulisita owa kulu na afalisi kuma ambelile anu ci ngeci kwali munu oyu limuka oku ali Jesu, awatongwele ci amukwate.